Smwangat yatkar nir ulun nateman Yesus na ain letkyape
1 Noak ma Yesus nti a ntate weri Yordan, Ratu Smwangtan norang I ma nrure I far ain letkyape. 2 I namin iano doan lere buty fat. Ma smwangat yatkar nir ulun nma ma nateman I. Na lere buty fat a ne I nfodam mpa nkoman ni lafar. 3 Ne smwangat yatkar nir ulun nfalak ber Yesus, “Farlan Ko ye Ratu Anaky e, mose bati ye fen roti.”
4 * Nempa Yesus nfalak ber i, “Na Kitap Lelerap dalam rarengi feti, ‘To lan roti ma nafmorip tomwatar.’”
5 Mpene i nrure Yesus far ain medasar sa, ma nfatutu nusar monuk na saryamprene ber I ma nsalan sapat motak. 6 Smwangat yatkar nir ulun nfalak ber I, “Keta kal kuase numur kabain saryamprenar monuk a ne ber Ko. Fali monuk-monuk a ne Ratu nal ber yakw lo, mpa keta kal ber ise nre se motak klwarat ningw mpempeang. 7 Mpa farlan mswatngur ber yakw, keta monuk-monuk ne ber Ko.”
8 * Nempa Yesus nfalak ber i, “Na Kitap Lelerap dalam rarengi feti, ‘Ka mswatngur ber lan nim Tuhan ma nim Ratu, ma mkwarya ber I motak!’”
9 Mpene i nor Yesus far Yerusalem ma rti ramin Ratu Ni Das Silai ni bubungan, betno nfalak ber I, “Farlan Ko ye Ratu Anaky, mpwutuk mof ye far bab. 10 * Fali na Kitap Lelerap dalam rarengi feti, ‘Keta Ratu nfarete Ni malaektar ma rajake Ko, 11 ma keta ral tangnir la rsaluk Ko, nema kete mtwutuk emar a na bati.’”
12 * Yesus nfalak, “Na Kitap Lelerap dalam rarengi feti, ‘Kete muteman nim Tuhan ma nim Ratu!’”
13 Lama smwangat yatkar nir ulun nal monuk matan ribun la nateman I, i nti a ntate Yesus ma ndaf lety ngamonar sa ma nateman I a nbal.
Yesus nbali I far yampren Galilea
14 Mpene Yesus nbali I far Galilea, ma Ratu Smwangtan norang I. Mpe Ngarany nsorw yamprene ni kateman. 15 I naftutu Ratu Ni ngribatnir na das sampangar ma tomwatar monuk rdangin I.
Tomwat Nasaretar rasipur Yesus
16 Yesus nti Nazaret ain ma raslyai I a na ne, ma ka biase na Yahudyar nir ler sanari e I nti das sampayang, ne namdir ma keta nbaca Kitap Lelerap,a 17 ne mangsampayang nal kitap nabi Yesaya ber I, ma lama nbanril e nbae ayat ma rarengi farye,
18 * “Ratu Smwangtany namin Yakw,
fali Tuhan nfil Yakw lo ma kufwibar Ibar Ngamone ber tomwatar ma rawatan.
Ma I nsiduk Yakw lo ma kfwalere ber tomwatar ma rmpan kawar a ne feti keta Ratu nalin sir.
Ma nose matbolar ma rakeban
mla nalin tomwatar ma ramin ngaorat dalam,
19 Ma I nsiduk Yakw nbal ma kufwibar feti nait ni tewat lo ma Ratu nfatutu ngamone ber Ni tomwatar.”
20 Mpene nlulun kitap a ne, ma nal a nbali ber mangsampayang betno namtoran. Tomwatar monuk na das sampayang dalam ne rfon I.
Nlulun kitap a ne ma nal ber mangsampayang (4:20)
22 Tomwatar monuk ne rampriang ma ryoding Ni tnyanuk ngafelar ma nfalak a ne, nempa sir rfalak, “I ye Yusuf anaky motak I a ma!”
23 Mpa Yesus nfalak ber sir, “Botuan feti keta kmi myal a mbyali tnyanuk pupule ye ber Yakw, ‘He mangatebak ko, mufngamone mbwali ko. Mose kabain mpasalnar a nbal na nim pnue sori, farlan ma kam mdengar safe ma mose lo na Kapernaum.’” 24 * Yesus nfalak a nbal, “Mdyengar fengamone, ni botuan e to nabi fen lese ma ralang i a na ni pnue sori. 25 * Yak kfwalak ber kmi: Luri ne na are nabi Elia e udan to ntompur ngarkar tely lian, mpa lafar nsorw monuk yamprenar ye. Noak a ne bat somar yadin na Israel. 26 Boloka farane, Ratu to naluru Elia ma nti ntulung bat somar a ne sa, nempa naluru i ma nti ntulung bat somar sa na kote Sarfat namin yampren Sidon. 27 * Farlan a nbal na are nabi Elisa, tomwat mangampalwar yadin na Israel, nempa Ratu to nafngamone fen lese nof sir, lan Naaman tomwat Siria ne.”
28 Tomwatar monuk ma ramin das sampayang dalam ne rdengar farane, rares desar. 29 Mpa ramdir ma ratian Yesus far kote burit, ma ror I far mtetebin, betno rose ma rsikul i far bab. Fali nir kote ne namin bubuar das. 30 Nempa Yesus nmpan nof twalelenir ma nti a ntate sir.
Yesus natian kalin smwangat yatak nof tomwat sa na Kapernaum
31 Mpene Yesus nti Kapernaum, kote sa na Galilea. Na iano I naftutu tomwatar na das sampayang na Yahudyar nir ler sanari. 32 * Sir rampriang ma rdengar safe ma I naftutu ne, fali natanuk e farlan tomwat silayar sa ma ni kuase. 33 Na das sampayang dalam ne tomwat sa ma smwangat yatak nsung i. I nafwayak Yesus ma nfalak, 34 “He Yesus tomwat Nazaret, Ko mwa ye ma mose safe? Mwa ma mufyatak kam e? Yak kufai lo feti Ko ye Ratu Ni Mangsiduk Ngalerap!”
35 Nempa Yesus ndotar smwangat yatak ne ma nfalak, “Mnwau! Mbwie mof tomwate ye!” Mpene tomwate ma smwangat yatak nsung i a ne napelak na tomwatar sonir lury, betno smwangat yatak ne nbie ma to nose sasaf i. 36 Tomwatar monuk rampriang, ma rafalak ber sir, “Tomwate ye nbal, bise ma natian smwangat yatkar nor Ni kuase ma rbie desar!” 37 Mpe ibar na Yesus a ne nsorw monuk yamprene ne.
Yesus nafngamone tomwatar yadin
38 Yesus nbie nof das sampayang a ne ma nti Simon ni das. Simon yanany bate isiny mefanas resi, mpa rtak Yesus ma nafngamone i. 39 Mpene Yesus nti namdir nlosir batmakene ne, betno natian maninik nof i, mpe i nangamon desar. Ne npote i ma nlangun sir.
40 Nait ma lere nfufw e, tomwatar monuk ror urnir wanir ma nir maningkyar mpane ber Yesus. I nsaup limany na tomwatar mpane ma nafngamone sir. 41 Smwangat yatkar rbie rof tomwatar yadin. Ne fwayak fwoik sir ma rfalak, “Kam mafai lo feti Ko ye Ratu Anaky!” Nempa Yesus ntampu nteri sir fali rafai feti I ye Rai Mangtebus.
Yesus nafwibar Ratu Ni ngribatnir na Yahudyar nir das sampangar
42 Nait ma bobolisin, Yesus nbie nof kote ne ma nti ain tatutkwar sa. Nempa tomwat ngayadin ranriak I. Lama rtungan I e rareke desar ma kete nti a ntate sir. 43 Nempa Yesus nfalak ber sir, “Ka ktwi kote walyetar a nbal ma kufwibar Ibar Ngamone feti Ratu nose ma nfarete neluk Rai. Fali iane nwayat ma Ratu nsiduk Yak kmwa saryamprene ye.” 44 Mpene Yesus nti yampren Yudea ni kateman ma nafwibar Ibar Ngamone na das sampangar.b