Yesus ntar mangfutar ma rlarat I
1 * Ler sa e, Yesus namdir twemul Genesaret seriny.a Tomwatar yadin rti rkolu I ma rdengar Ratu Ni ngribatnir. 2 Yesus nsalan soryar du ma rloi twemul seriny a ne. Ma mangfutar rtompur ma raflerap nir fuat. 3 Yesus nfangat Simon ni sori, ne nluan ma nsuar sori far melaman. Ne Yesus namtoran sori ne ma naftutu tomwat ngayadin.
4 Lama naftutu monuk e I nfalak ber Simon, “Mbwes far melamam ma mlui nim fuat nema nte inar.”
5 * Ne Simon nfalak, “Amang Tuangguru, kam mlui fuat mol nronram ngadoe ye lo ma to ntey sasaf! Nempa Amangw nluan, mpa la yak klwui kbwal.” 6 * Noak ma rlui e, fuat a nte inar yadin desar nwayat ma nir fuat ketla ntarbis. 7 Mpa rkafy tbwarnir ma ramin sory walyete nema rsai sir. Lama rait e raktem a raflen inar na soryar du a ne terik ma rfen, mpa ketla ratloram. 8 Lama Simon nsalan farane, i nsatngur na Yesus souny lury ma nfalak, “Tuhan mkwatar Ko mof yakw, fali tomwat sale yakw!”
9 Simon nor tbwarnir a ne rampriang fali fuat a nte inar yadin. 10 Feleles a nbal farlan Yakobus radu Yohanes, Zebedeus angkir. Sir ye Simon tbwarnir. Ne Yesus a nfalak ber Simon, “Kete mumtaut! Ntabw nof lere ye, ko to mswinaut lo nempa keta munriak tomwatar ma rlarat Yakw.” 11 Lama Simon nor tbwarnir rakei nir soryar far da e, rnaukalin monuk nir safe kabain ma rlarat Yesus.
Yesus nafngamone mangampalwar sa
12 Lain sa e, Yesus namin kote sa. Na iano merwan sa ma nampaul.b Noak ma i nkeban Yesus, nsatngur na Yesus souny lury ma nfalak, “Amangw, yak kufai feti Ko nim kuase ma mufngamone yakw. Mpa, farlan mlwompang yakw e, muflerap tenangw ye.”
13 Mpene Yesus nsaup limany na tomwate ne betno nfalak, “Yak klwompang ko, mpa mungamon lo!” Lama nfalak farane, tomwate ne nangamon desar. 14 * Ne Yesus nfalak ber tomwate ne nema kete nasaur ber tomwatar. I nfalak a nbal, “Mtwi mukmat mangsompe, ma mfwatutu tenam ber i nema nsalan feti mungamon lo nre lolone. Betno mlwoik snyompe ber Ratu farlan Musa ni tetetak, nema tomwatar rafai feti mungamon lo.”
15 Nempa ibar na Yesus ntafal ma namelir na mpenempen, mpa tomwatar yadin rma ma rdengar Ni ngribatnir, mla rtak ma nafngamone nir maningkyar. 16 Boloka farane, biase koko I a nti ain tatutkwar sa ma nsampayang.
Yesus nafngamone mangamluktwar sa
17 Na ler sa e Yesus naftutu Ratu Ni ngribatnir na das e sa. Na iane tomwat Farisyar a mla mangaftutu Musa ni faretar ramtoran ma rasaitling I. Sir ye rma rof pnuar monuk na yampren Galilea ma Yudea mla kote Yerusalem. I nafngamone mangafansar fali Ratu Ni kuase norang I. 18 Tomwatar ketnir rabare mangamlukut na mpeluk. Sir rareke ma ror mangamlukut a ne, ma rnau i a na Yesus souny lury. 19 Nempa to ain ma ror i far dalam fali tomwatar yadin, mpa rfair i far bubungan das betno rbange daftar, ma rtolar mangamlukut ne numur ni mpeluk na Yesus souny lury, na tomwat ngayadin a ne.
Sir rbange daftar ma rtolar mangamlukut ne nor ni mpeluk na Yesus souny lury (5:19)
21 Nempa mangaftutu Musa ni faretar mla tomwat Farisyar rafalak ber sir, “Ali ise I, mampe nbaran desar ma nafbwere Ratu. To tomwate fen lese ma nlure tomwatar nir salar, ma lan Ratu e.”
22 Nempa Yesus nafai nir andanwar, mpa I nfalak ber sir, “Falisafe ma mdyaun farane? 23 Impe ma nangafel, kfwalak feti, ‘Klwure nim salar,’ nre ‘Mpwote ko ma mpwan!’ 24 Nempa lere ye kufdiat ber a kmi feti, na saryamprene ye Yakw, Tomwate Anaky ningw kuase ma klwure salar.” Ne Yesus nfalak ber mangamlukut ne, “Mpwote ko, mwal nim mpeluk ma mbwali ko!”
25 Ne mangamlukut a ne npote desar i, betno nal ni mpeluk ma nbali i mla ndangin Ratu. 26 Tomwatar monuk na iane rampriang resi ma ramtaut, mpa rdangin Ratu ma rfalak, “Lere ye betno tsalan kabain mpasalnar ma nlie nlengan!”
Yesus ntar Lewi ma nlarat I
27 Mpene Yesus nma burit, ne nsalan mangtak ulbatyar sa ngarany Lewi. I namtoran na ain ma ntak ulbati. Ne Yesus nfalak ber i, “Mlwarat Yakw.” 28 Ne Lewi namdir ma naukalin monuk ni kabanir, ma nlarat Yesus.
29 Ne Lewi nose festa silai ber Yesus na ni das. Mangtak ulbatyar yadin ma tomwat salar raktem a rtame. 30 * Tomwat Farisyar ketnir mla mangaftutu Musa ni faretar nroke-nraki sir ber Yesus Ni manglartar ma rfalak, “Safema kmi mtyame myenum myor mangtak ulbatyar ma tomwat salar?”
31 Ne Yesus nfalak ber sir, “Tomwatar ma to rafanas to ranriak dokter, lan mangafansar. 32 Yak kmwa e to ktwar tomwatar ma rase feti to nir sal, nempa ber tomwat salar nema rtate nir salar.”
Kete milompe Yesus Ni anftutw beberi myor tomwat Yahudyar nir anftutw wangim
33 Ne tomwat Farisyar rfalak a nbal ber Yesus, “Yohanes ni manglartar ma kam mamy manglartar biase rpuase ma rsampayang, nempa Nim manglartar e rtame renum dedesar.”
34 Mpa Yesus nfalak tnyanuk pupule ber sir farye, “Na festa nikah, merwan mangafsaw beberi tbwarnir bise ma rpuase e? Tate nre! 35 Nempa keta nait ni tewat ma tomwatar ral merwan mangafsaw beberi ne nof sir, na lere ne betno bise ma rpuase.”c
36 Ne Yesus nal tnyanuk pupule nbal ber sir farye, “Tomwatar to ral rabit beberi ris la raban rabit wangim. Fali keta nbis rabit beberi ne, ma to nordeng nor rabit wangim. 37 Farlan a nbal tomwatar to rbui anggur beberi na lufw wangim, fali anggur beberi ne keta nbis lufu ne ma nayatak. Ma anggur ne keta ntarbui.
_LB00145B.jpg)
Anggur lufu ma rose rof binatang kultir (5:37)