Yesus Ni kuase ma ntetak yayatrwar na Yahudyar nir ler sanari
1 * Na ler sa, na tomwat Yahudyar nir ler sanari,a Yesus nor Ni manglartar rmpan rof let gandum dalam. Ni manglartar rusir gandum, ma rfusak kalin kiktir betno rane isnir.
_HK00099B.jpg)
Gandum ye (6:1)
3 * Ne Yesus nfalak, “Fali kmi to mbyaca safe ma Daud nose noak ma i nor ni tomwatar ramlafar a ne? 4 * I nti Ratu Ni befak dalam ma nal roti ma rsompe ne lo ma nane ketan, betno nal lian ber ni tomwatar. Safo nof tetetak agame lan mangsompar ma bise rane roti ne.” 5 Ne Yesus nfalak, “Yakw, Tomwate Anaky ningw kuase ma ktwetak safe ma tomwatar bise nre to bise rose na ler sanari!”
Yesus nafngamone mangamluktwar sa na Yahudyar nir ler sanari
6 Na ler sanari sa nbal e, Yesus nti naftutu na das sampayang. Na iane tomwat sa liman fian namlukut. 7 Mangaftutu Musa ni faretar ketnir ma tomwat Farisyar ranaumat dedesar Yesus feti keta I nafngamone tomwate ne na nir ler Sanari nre tate. Rose farane la ranriak Ni sale. 8 Nempa Yesus nafai nir andanwar. Mpa I nfalak ber tomwate ma liman fian namlukut a ne, “Mwa ma mumdir lury ye!” Ne tomwate ne nti namdir lury. 9 Mpene Yesus nfalak ber sir, “Yak kwenrat a kmi: Nof Musa ni tetetkar e kit tose safe na ler sanari? Tose ngamone nre tose yatak? Tafngamone tomwatar nre tsalan lonri ma rmat motak?” 10 Yesus nfon a nlole monuk sir, betno nfalak ber tomwat mangamlukut a ne, “Mkwondar limam!” Mpa nkondar liman, ne nangamon desar.
11 Mpa mangaftutu Musa ni faretar ma tomwat Farisyar a ne rares desar, ne rafalak ber sir, “Keta tose farpe I a nbal?”
Yesus nfil Ni mangsiduk buti resiny du
12 Na ler sa e Yesus nti lenir sa ma nsampayang. Na iane I nsampayang ber Ratu nronram ngadoe. 13 Lama bobolisin e I ntar Ni manglartar, ne nfil tomwate buti resiny du nof sir a ne. I nafneni sir a na mangsidkwar. 14-16 Sir a ne ye:
Simon ma Yesus nafngare i a na Petrus,
ma Simon wainy Anrreas,
Yakobus
ma Yohanes,
Filipus
ma Bartolomeus,
Matius
ma Tomas,
Alfeus anaky Yakobus,
ma Simon ma rtar i feti tomwat Zelot,c
Yakobus anaky Yudas,
betno Yudas Iskariot ma keta nfenri Yesus.
Yesus naftutu ma nafngamone tomwatar yadin
17 Mpene Yesus nor Ni mangsidkwar rnrunrur rof lenran a ne, ma rnary na ain manesan. Na iane Ni manglarat walyetar rabut sir lo. Tomwatar yadin rma rof monuk yampren Yudea ma Yerusalem mla rof nus laran Tirus ma Sidon. 18 Sir rma ma rdengar Ni anftutu, ne rtak ma nafngamone sir rof nir maningkyar. Yesus nalin kawelin smwangat yatkar nof sir a nbal. 19 Tomwatar monuk a ne rareke ma rasyol I, fali kuase ma nbie nof I a ne la nafngamone sir.
Yesus natanuk na suse ma senange
20 Yesus nfon Ni manglartar ma nfalak,
“Ngamone ber a kmi ma miwatan,
fali keta myeluk Ratu Ni tomwatar ma keta I neluk Rai ber a kmi.
21 Ngamone ber a kmi ma lere ye mimlafar,
fali keta Ratu nafbotan a kmi!
Ngamone ber a kmi ma lere ye mtyasing,
fali keta Ratu nose ma myalip.
22 * Ngamone desar ber a kmi ma tomwatar ma to rmpeang a kmi, ratian a kmi, rarikan a kmi, ma rsoi lamain kmi fali mlyarat Yakw, Tomwate Anaky.
23 * Luryain e nusnir rose nabyar farane nbal. Mpa farlan tomwatar rose kmi farane, ka mimpumpuki kmi ma mlyampyor, koli keta Ratu nal sewe silai ber a kmi na surga.
24 Nempa tomwat mangoskayar a kmi, keta mtyungan suse maberat desar,
fali mir momorip e msyenang lo.
25 Kmi ma lere ye mibotan keta mtyungan suse maberat desar,
fali keta mimlafar!
Ma kmi ma lere ye myalip keta mtyungan suse maberat desar,
fali keta dalmir suse ma mtyasing!
26 Farlan tomwatar monuk rdangin a kmi, keta mtyungan suse maberat desar,
fali noak a ne nusnir rdangin nabi wawatar farane nbal.”
Mkyamis mir kanrar
27 “Nempa kfwalak ber a kmi ma mdyengar Yakw lere ye: Mkyamis mir kanrar, ma myose ngamone ber tomwatar ma to rmpeang a kmi. 28 Msyampayang ber Ratu nema nberkat tomwatar ma rangoak a kmi, ma msyampayang a nbal ber tomwatar ma rose yatak a kmi. 29 Farlan tomwatar rtef totokmir balisya e, minrenre totokmir balisya e nbal. Farlan tomwatar ral mir rabit melaswar, myal a mbyal mir rabit seselwar. 30 Farlan tomwatar rtak kabanir sa rof a kmi e, myal ber sir. Farlan tomwatar rkampres mir kabanir e ka kete mtyak a mbyali. 31 * Safe ma kmi mpyeang ma tomwatar rose ber a kmi a ne, ka myose farane nbal ber sir.
32 Farlan mkyamis lan tomwatar ma rkamis a kmi, keta Ratu to nal nimet ber a kmi. Fali tomwat salar rkamis tomwatar ma rkamis sir a nbal. 33 Farlan myose ngamone ber lan tomwatar ma rose ngamone kmi, keta Ratu to nal nimet ber a kmi. Fali tomwat salar rose farane nbal. 34 Ma farlan kmi myal doit ber lan tomwatar ma bise ral a rbali ber a kmi, keta Ratu to nal nimet ber a kmi. Tomwat salar rose farane nbal, fali ralele feti keta ral a rbali monuk. 35 Ma kmi e ka kete myose farane! Ka mkyamis mir kanrar ma myose ngamone sir. Myal doit ber mir kanrar ma kete milele feti keta ral a rbali ber a kmi. Farlan kmi myose farane dedesar, keta mir sewe silai, ma keta kmi myeluk Ratu Mangamin medase angkir. Fali Ratu dalamy ngamone ber tomwatar ma to rafai rose terimakasih, ma ber tomwat yatkar a nbal.d 36 Ka mir lolompang ber tomwatar monuk, feleles farlan Amir ma Ni lolompang ber tomwatar monuk.”
Kete mfyasale tomwatar
37 Yesus nfalak ber tomwat ngayadin, “Ka kete mfyasale tomwatar, nema Ratu kete nfasale kmi a nbal. Kete myukun tomwatar, nema Ratu kete nukun a kmi a nbal. Mlyure tomwatar nir salar, nema Ratu nlure mir salar a nbal. 38 Myal ber tomwatar nema Ratu nal a nlengan nof iane ber a kmi a nbal. Farlan tomwate nsar fase, keta ntean ma nawawan ma ntafal a nbal terik ma nputuk. Farlan myal ber tomwatar farane, keta Ratu nal farane nbal ber a kmi.”
39 * Mpene Yesus nfalak tnyanuk pupular sa ber sir farye, “Farlan matbole nkolat matbole, botuan feti keta radu a rfuf far meloke dalam nre?
40 * To kanak a skole ma ni andaun ngamone nlengan nof ni tuangguru, nempa farlan nsoru ni skole lo keta i feleles nor ni tuangguru.
41 Katutun sit ma namin wamir matnir e, kmi msyalan, ma balak ma namin matmir e, to mkyeban. 42 Safema kmi mfyalak ber wamir feti, ‘Awa, mwa ma kalin katutun sit kof matam dalam a ne,’ safo balak ma namin matmir a ne to mkyeban. He lepuskwar a kmi, myalin kalin balak ma namin matmir dalam a ne fuky, nema mkyeban miflyonri ma bise myalin kalin katutun sit myof wamir matnir.”
Tomwate ni adat nfatutu dalamy
43 Yesus nasaur ber tomwat ngayadin farye, “Katutun ma nangafel keta buany nangafel, ma katutun ma to nangafel keta buany to nangafel a nbal. 44 * Kit tafai tal katutun nof buany. Fali tomwatar to rtikar ara buany rof skiki kakari, ma to rtikar anggur buany rof katutun matjemnir. 45 Tomwat ngamone keta nose lan ngringamonar fali ndaun lan kabain ngamonar. Tomwat yatak keta nose lan ngriyatkar fali ndaun lan kabain yatkar. Safe ma tomwate nfalak a ne, iane nof dalamy.”
Das makoran ma das mamafun
46 Yesus nfalak ber tomwat ngayadin a nbal, “Kmi to myose mlyarat safe ma Yak kfwalak mpa uban safe ma mtyar Yakw feti, ‘Tuhan, Tuhan’. 47 Tomwatar ma rakmat Yakw ma rdengar Ningw ngribatnir, ma rmpan a rlarat, keta kal tnyanuk pupule farye: 48 Sir farlan tomwate ma nafdiri ni das. Luryain e nkal ompak melaman desar, betno naftoran fanderen na bati das. Nait ma kdyaip silai nma e to nrake das a ne, fali fanderen namkoran. 49 Nempa ise ma ndengar Ningw ngribatnir ma to nmpan a nlarat, i farlan tomwate ma nafdiri das ma to fanderen. Nait ma kdyaip a nma e, nrake das a ne ma namsos desar.”