Yesus nafngamone suldadu Romar nir ulnir sa ni kawar
1 Lama Yesus nfalak monuk ber tomwat ngayadin a ne, I nti kote Kapernaum. 2 Na kote ne suldadu Romar nir ulnir sa ni kawar, ma nkamis resi i nafanas ma ketla nmat.a 3 Suldadu Romar nir ulun ne ndengar feti Yesus namin Kapernaum, mpa naluan maken Yahudyar ketnir ma rti rtak Yesus, ma nma nafngamone ni kawar a ne. 4 Lama rait e, tomwatar ne raloloi desar sir ma rfalak, “Maken, mtwulung mamy suldadwar nir ulun yo fuky, 5 fali nkamis tomwat Yahudyar kit, ma nafdiri nbal das sampayang ber kam.”
6 Mpene sir raktem Yesus a rti. Noak ma ketla rait ni das, suldadwar nir ulun ne naluan tbwarnir ma rti rfalak ber Yesus feti, “Kete nawar I ma nma ningw das lo, fali kmweat ma klwangun I. 7 Iane nwayat ma yakw to bise ma kukmat I a nbal. Mpa nfalak motak ngribatnir sa e, ningw kawar ye nangamon lo. 8 Fali yakw e tomwatar sa nfarete yakw nbal, ma yakw nbal e kfwarete suldadwar. Ma farlan kfwalak ber suldadwar sa feti, ‘Mtwi!’ Ne i nti, ma kfwalak ber sa nbal feti, ‘Mwa!’ Ne i nma. Nre ber ningw kawar, ‘Mose ye!’ Ne nose desar.”
9 Lama Yesus ndengar tomwate ne ni tnyangkwar, I nampriang desar. Ne nbali I ma nsalan tomwat ngayadin ma rlarat I a ne, ma nfalak, “Mdyengar fengamone, tomwate ye ni anlele silai desar. Na tomwat Israelar monuk e, to lain sa ma ktwungan nir anlele silai farlan tomwate ma to Israel i ye!” 10 Lama tbwarnir ma nluan sir a ne rbali sir far ni das e, rsalan kawar a ne nangamon lo.
Yesus nafmorip tabwery sa na Nain
11 Mpene Yesus nal far kote sa ngarany Nain. I nti nor Ni manglartar, mla tomwat ngayadin rnrur a rlarat I a nbal. 12 Ketla rait kote ne ni finru matany, tomwatar rabare mangmwate na mpeluk far kote burit. Mangmwate ne tabwery mesan, i ye bat som sa anaky. Tomwatar yadin rof kote ne rorang bate ne. 13 Noak ma Tuhan Yesus nsalan bat some ne nlompang i, mpa nfalak, “Batmaken, kete mtwasing lo!” 14 Mpene nti nlosir mpeluk ne ma nasyol. Mpa mangabarar ne ramdir a rtabu sir. Ne I nfalak, “Tabweri mpwote ko!” 15 Ne npote desar i ma natanuk, ne Yesus nal i ber enany.
16 Tomwatar monuk na iane ramtaut. Sir rdangin Ratu ma rfalak, “Nabi silayar sa nbotin ber ninr kateman lo! Ratu nma ma nfair Ni tomwatar lo!” 17 Mpe ibar na Yesus ne namelir monuk na Yudea ma na yamprenar seriny baldu.
Yohanes mangadiris nluan ni manglartar ma rti renrat Yesus
18 Lama Yohanes ni manglartar rasaur ansarwar monuk ne ber i, 19 mpe ntar ni manglartar du ma rti renrat Tuhan Yesus feti, “Mpe I ye Rai Mangtebus ma Ratu nyoding lo nre lolone tdaf tomwat walyetar sa nbal?” 20 Ne Yohanes ni manglartar du a ne rti renrat Yesus, “Amangw, Yohanes mangadiris naluan ma menrat feti, Ko ye Rai Mangtebus ma mwa ye lo nre ka mdaf tomwat walyetar sa nbal?”
21 Noak a ne Yesus nafngamone tomwatar yadin nir maningkyar felnir mpane. Natian kalin a nbal smwangat yatkar nof sir, mla nafngamone matbolar ma rakeban. 22 * Mpa Yesus nfalak ber sir, “Mbyali kmi, ma mfyalak ber Yohanes, safe ma kmi mkyeban ma mdyengar. Matbolar rakeban, mangamluktwar rmpan, mangampalwar rangamon a rbali, mangtokar radengar, mangmwatar rmorip a rbali, ma ber tomwatar ma rawatan kufwibar Ibar Ngamone. 23 Ngamone ber tomwatar ma to ramsoal Yakw.”
24 Lama Yohanes ni manglartar a rbali sir, Yesus nasaur ber tomwat ngayadin na Yohanes, “Ubany safe ma mtyi msyalan Yohanes mangadiris na ain letkyape no? Mtyi msyalan riar ma mnaur nanrir sir a ne e? 25 Nre mtyi msyalan safe? Mtyi msyalan tomwatar ma rfonak rabit ngafelar e, tate nre? Tomwatar ma rfonak rabit ngafelar ma nir momorip nangafel, ramin lan rayar nir das silayar. 26 Mpa mtyi msyalan safe? Mtyi msyalan nabyar sa e? Au, iane ma nwayat Yohanes silai i a nlengan nof nabi walyetar. 27 * Fali na Kitap Lelerap dalam Ratu nfalak na Yohanes lo feti:
‘I ye ma keta kswiduk i ma nbalun nof Ko.
Keta i naflawar dalamtene ber Ko!’”
28 Yesus nfalak, “Mdyengar fengamone, na saryamprene ye to tomwate fen lese ma ni kuase silai nlengan nof Yohanes mangadiris. Nempa nait ma Ratu neluk Rai ma nfarete tomwatar, sir ma to ubnir sasaf na Ratu Ni ain farete keta silai sir a rlengan Yohanes mangadiris.”
29 * Tomwatar monuk ma mangtak ulbatyar, ryoding Ratu Ni ngribatnir ma Yesus nfalak a ne. Sir a ne ma Yohanes nadiris sir lo. 30 Nempa tomwat Farisyar ma mangaftutu Musa ni faretar to rlampir ma rlarat Ratu Ni mpempeang. Sir to rmpeang ma Yohanes nadiris sir.
31 Mpene Yesus nfalak a nbal, “Keta kal safe la kpasal tomwatar na are ye? 32 Sir farlan kangkir ma ramtoran pasar, klop sa nabali nor klop sa:
‘Kam mtef tibalb ber a kmi,
nempa to mlyampir ma myenari,
kam mbew beu mangmwate,
nempa to mtyasing!’
33 Farlan Yohanes mangadiris a nbal, i nma e to nane roti ma to nenum anggur, ne mfyalak, ‘Smwangat yatak nsung i!’ 34 Yakw, Tomwate Anaky kmwa e, ktwame ma kenum ne kmi mfyalak, ‘No msyalan tomwate ne! Nampayatak, manganabuk, natbwarin nor mangtak ulbatyar, mla tomwat salar.’ 35 Boloka farane, tomwatar monuk ma rlarat Ratu keta rfatutu Ratu Ni anfai silai ror nir wewelmpampane.”
Bat yatkar sa nbui ngule angat ngafele na Yesus emany
36 Tomwat Farisyar sa ngarany Simon, ntar Yesus ma ntame na ni das. Mpa Yesus nti ni das ma ntame. 37 * Na kote ne bat yatkar sa namin iane nbal. Noak ma ndengar feti Yesus ntame na tomwat Farisi ne ni das e, i nma nonr ngule angat ngafele na botal marmer anak. 38 I namdir Yesus butryan nlosir emany ma ntasing, ma lunir a ne rafmpwetan Yesus emany. Ne nal ulun bukrir la nei, betno nbon, ma nal ngule angat ngafele ne la nyonge.
Bat yatak a ne nti nlosir Yesus emany ma nal ngule angat ngafele (7:38)
40 Ne Yesus nfalak, “Simon, Yak kose ma kfwalak kabanir sa ber ko.”
Ne Simon nfalak, “Au Amang Tuangguru, mfwalak motak.”
41 Mpene Yesus nfalak, “Tomwat sa nafmpwane ni dotyar ma naosanak ber tomwatar du. Tomwat sa nutang doit gobang ratlim, ma sa nbal e gobang butlim. 42 Tomwatar du a ne to rbaras ral nir utngar. Mpa tomwate ma nafmpwane dotyar a ne nkes kalin motak. Nof tomwatar du a ne ise ma nkamis resi tomwate ma nafmpwane ni dotyar a ne?”
43 Simon nfalak, “Yak kdwaun feti tomwate ma ni utang yadin a ne.”
Ne Yesus nfalak, “Nim andaun ne diat!” 44 Mpene Yesus nmange I ma nfon bate ne betno nfalak ber Simon, “No mswalan bate ye. Yak kmwa nim das e, ko to mnwau weye ma mbwur emngur, nempa bate ye nal lunir la nafmpwetan emngur, betno nal ulun bukrir la nei. 45 Yak kmwa nim das e to mbwon Yakw, nempa ntabw ma kumin das ye bate ye dedesar ma nbon emngur. 46 Ko to myonge ngule na ulungw, nempa bate ye nyonge ngule angat ngafele na emngur. 47 Mdwengar fengamone ma kfwalak, bate ye nkamis desar Yakw fali ni salar ma yadin a ne Yak klwure lo. Nempa tomwate ma Ratu nlure ni salar lan ketnir, keta ni ankamis lan rufuk a nbal.”
48 Mpene Yesus nfalak ber bate ne, “Klwure nim salar lo.”
49 Mpa tomwatar ma rtame ror Yesus ne rdaun a na dalmir, “Ise I ye? Mampe bise nlure tomwatar nir salar?”
50 Nempa Yesus nfalak ber bate ne, “Ko mulele Yakw, mpa kfwair ko. Mbwali ko mor maline!”