Batar ma rlangun Yesus
1 To dodo a nbal e, Yesus nmpan a nlole kotar ma pnuar ma nafwibar Ibar Ngamone feti keta Ratu neluk Rai ma nfarete tomwatar. Ni manglarat buti resiny du a ne rmpan a rlarat I. 2 * Ma batar ketnir ma Yesus nafngamone nir maningkyar ma natian kalin smwangat yatkar nof sir a ne rlarat I a nbal. Batar a ne Maria ma rtar feti Magdalena.a I ye ma Yesus natian kalin smwangat yatkar itw nof i. 3 Sa nbal e Yohana (Yohana ye Khuza sawany ma Khuza ye Herodes ni mangomat doit), sa nbal e ngarany Susana numur bat walyetar yadin a nbal. Batar ye koko sir ral nir dotyar ma rlangun Yesus nor Ni manglartar.
Tnyanuk pupule na tomwate ma nyefar fini
4 Tomwatar rof kotar yadin rti rakmat Yesus dedesar. Noak ma tomwatar rtafal ma yadin sir e Yesus nasaur tnyanuk pupule farye: 5 “Mangaosboar sa nti nyefar fini na ni lete. Noak ma nyefar finyar a ne, ketnir rfufw na lalate. Ne tomwatar ma rlanre rof a ne rtai sir, ma ketnir a nbal mangkyar rane rafere.b 6 Finyar ketnir rfufw na ompak baty dasyar. Nait ma ratrump e raplai fali ompak a nmangretw. 7 Ketnir a nbal rfufw na skiki-kakari dalam. Ne ratrump ror skiki-kakari ne, mpa skiki-kakari rmpalam a rfen sir. 8 Nempa finyar ketnir a nbal rfufw na ompak mpariang, ne ratrump e rangafel, nait ma rabu e nresy ntaul desar.”c
Yesus nasaur monuk e nfalak, “Ise ma tlingnir e, ka ndengar fengamone!”
Yesus nfalyole tnyanuk pupule isiny na tomwate ma nyefar fini
9 Yesus Ni manglartar renrat I feti tnyanuk pupule ye isiny farpe. 10 * Ne Yesus nfalak ber sir, “Ratu nal andaun ngamone ber a kmi lo nema mifai safe ma tomwatar to rafai fuky. Iane feti keta Ratu neluk Rai ma nfarete tomwatar ye felan farpe. Nempa ber tomwat walyetar Yak kfwatutu ngrie ne kor tnyanuk pupule, nema rdengar nempa to rafai isiny ma rsalan nempa to rafai sasaf.
11 Tnyanuk pupule ne isiny farye: Fini ne Ratu Ni ngribatnir. 12 Finyar ma rfufw na lalate ne, farlan tomwatar ma rdengar Ratu Ni ngribatnir, nempa smwangat yatkar nir ulun nma ma nal ngribatnir a ne nof dalmir, ne sir to ralele, mpa Ratu to nfair sir. 13 Finyar ma rfufw na baty dasyar, farlan tomwatar ma rdengar Ratu Ni ngribatnir, ma rlangun ror dalmir senange. Nempa nir anlele to namkoran farlan katutun ma to nawakar. Noak ma anteman a nma e sir ratliur Ratu. 14 Finyar ma rfufw na skiki-kakari dalam, farlan tomwatar ma rdengar Ratu Ni ngribatnir, nempa dalmir suse ma rdaun lan nir momorip, nir anoskai ma nir senange. Kabanir monuk a ne nose ma ratngup, nwayat ma to ubany ma rdengar Ratu Ni ngribatnir a ne. 15 Ma finyar ma rfufw na ompak mpariang a ne, farlan tomwatar ma rdengar Ratu Ni ngribatnir ma rnau na dalmir. Sir ye ma rlarat dedesar Ratu Ni ngribatnir ma na nir momorip e rose lan ngamone.”
Tnyanuk pupule na damar ma rsungap i
16 * “Tomwatar to rtutun damar, betno ral ngusi la rsungap i, nre rnau na koi lebaban. Nempa rtikloi na impan nema tomwatar rma das dalam e rkeban ngaodir. 17 * Farlan safe-safe monuk ma ramudim a ne, keta Ratu nafbotin. Ma safe-safe monuk ma tomwatar to rafai keta I naftutu sir. 18 * Mpa mdyengar fengamone safe ma kfwalak. Ise nmpeang ma nafai yadin mla nkaul Ratu Ni ngribatnir, la Ratu nal andaun ngamone ber i ma ntafal ni anfai. Nempa ise ma to nmpeang ma nafai, la Ratu nkokap ni andaun nema ntafal ma to nafai sasaf.”
Tomwatar ma rmpan a rlarat Ratu Ni ngribatnir sir farlan Yesus enany ma wanir
19 Ler sa e Yesus enany ma wanir rti rakmat I nempa to lety ma rti rait I, fali tomwatar yadin. 20 Mpa tomwat sa nfalak ber I, “Maken, anoi ma wamyar a ramin burit a no, sir rmpeang ma ratungan ror Ko.”
21 Nempa Yesus nfalak, “Tomwatar ma rdengar Ratu Ni ngribatnir ma rmpan a rlarat, sir a ne enangw ma wangur.”
Yesus nafline mnaur uman
22 Na ler sa e Yesus nor Ni manglartar rfangat kumal, ne Yesus nfalak ber sir, “Mya ma ti twemul balisya.” Ne raktem a rti. 23 Lolone lety e Yesus narwa lo. Metryat farye mnaur uman nma twemul ne, mpa weye nti kumal a ne dalam nwayat ma ketla ratloram.d
Mnaur uman na twemul a ne (8:23)
Ne Yesus npote I ma ntampu mnaur ma nerar ma rafefar a ne. Mnaur ma nerar a ne rtolar sir ma twemul ne namlin desar. 25 Ne Yesus nfalak ber sir, “Kmi to milele Yakw e?”
Sir rampriang ma ramtaut. Ma raenrat sir, “Tomwate ye ise I, mampe mnaur ma nerar ye rlarat Ni farete?”
Yesus natian kalin smwangat yatak nof tomwat Gerasa sa
26 Yesus nor Ni manglartar rafla raloran ma rti rsaran na nus Gerasa,e na twemul Galilea balisya timur. 27-29 Lama Yesus ntompur far da e, merwan sa nof kote ne nti nakmat Yesus. Tomwate ne smwangat yatkar rsung i ma namlus doan ye lo. I to namin das ma namin lan bangar, iane kubur anir. Smwangat yatkar biase raklibur i. Iane nwayat ma ral rewe la rkete liman eman ma rajake i, nempa bise ma nosit. Ma smwangat yatak nor i far ain tatutuk. Noak ma nsalan Yesus, i nafwayak ma nsatngur na Yesus souny lury. Mpa Yesus natian kalin smwangat yatkar a ne nof i. Ne smwangat yatkar a ne rfalak, “Yesus, Ratu Anaky Mangamin medase Ko! Nim urusan safe mor yakw? Kete mswiksa yakw nrela!”
30 Ne Yesus nenrat i, “Ngaram se?”
I nfalak, “Legion.” (Legion isiny feti yadin fali smwangat yatkar yadin rsung i.) 31 Mpene smwangat yatkar a ne raloloi sir ma rtak Yesus, nema kete natian sir far tetebin mamate.
32 Sesedin ain a ne babyar yadin ranriak tnyame na bubuar lebaban. Ne smwangat yatkar a ne rfalak ber Yesus nema ninrang sir ma rsung far babyar a ne, mpa Yesus ninrang sir. 33 Mpe smwangat yatkar a ne rbie rof tomwate ne, ma rsung babyar a ne. Ne babyar a ne rafla ma rputuk rof tetebin far twemul dalam, ne rlonrur ma rmat.
34 Mangajak babyar rsalan farane rafla ma rti rasaur ngrie ne na kotar ma pnuar seriny baldu. 35 Tomwatar ma rdengar ansaur a ne rafla rbie rof kotar ma pnuar ma rsalan ngrie ma Yesus nose ne lo. Lama rait e rsalan tomwate ma smwangat yatkar rbie rof i a ne, namtoran nlosir Yesus emnir. Nfonak i ma ni andaun nangamon lo, mpe sir ramtaut. 36 Tomwatar ma koko sir a rsalan ngrie ne, rasaur ber tomwat walyetar na Yesus nafngamone tomwate ma smwangat yatkar rsung i a ne. 37 Ne tomwatar monuk na nus Gerasa rtak Yesus, nema nti a ntate sir fali ramtaut resi. Mpa Yesus nfangat kumal ma nbali I far Galilea.
38 Tomwate ma smwangat yatkar a rbie rof i a ne, ntak Yesus ma nlarat a nbal. Nempa Yesus nfalak ber i, 39 “Mbwali ko far nim das ma musaur safe ma Ratu nose ber ko a ne lo.” Ne tomwate ne nti nlole monuk kotar ma nasaur safe ma Yesus nose ber i a ne.
Yesus nafmorip Yairus anaky ma nafngamone batar sa ma ni olimpane nma e to nater
40 Lama Yesus a nbali I nof twemul balisya, tomwatar yadin rkakal I fali sir monuk rdaf I lo. 41 Mpene tomwat sa nma, ngarany Yairus. I ye ulun na das sampayang na ain a ne. I nsatngur na Yesus souny lury ma ntak naloloi nema nti ni das, 42 fali anaky bate ne nafanas ma ketla nmat. Ma kanak ne mesan ma ni ngarak buti resiny du. Ne Yesus nlarat ma raktem a rti. Sir lolone dalamtene lety e, tomwatar yadin rasesekan sir ma rkolu Yesus.
43 Na tomwat ngayadin a ne, batar sa ma ni olimpane nma e to nater. Ni maninik a ne ngarak buti resiny du lo. [I nfenri monuk ni kabanir la nfarobat ni maninik]. Nempa to tomwate fen lese ma nafngamone nal i. 44 Bate ne nmpan nof mudy ma nti nlosir Yesus, betno nasyol Yesus Ni rabit melawas suin, ne ni olimpane nater desar.f 45 Ne Yesus nenrat, “Ise ma nasyol Yakw ye?”
Nempa to tomwate fen lese nbali. Mpa Petrus nfalak, “Tuangguru, tomwatar yadin rasesekan sir ma rkolu Ko.”
46 Ne Yesus nfalak, “Yak kwoman e tomwatar sa nasyol Yakw, fali ningw kuase nbie nof Yakw.” 47 Mpe bate ne nfenai feti Yesus nafai i lo. Mpa i nti nakmat Yesus e ngangasar. I nsatngur na Yesus souny lury, ne nasaur ber tomwat ngayadin feti safema nasyol Yesus ma nasyol e nangamon desar. 48 Mpene nfalak ber bate ne, “Batmakeng, ko mulele Yakw mpa mungamon lo. Mbwali ko mor maline!”
49 Yesus lolone natanuk e tomwatar sa nof Yairus ni das a nma ma nfalak, “Yairus, kete mufngol Tuangguru ma nti nim das, fali angkam a nmat lo!”
50 Ndengar ibar a ne, Yesus nfalak ber Yairus, “Kete mumtaut, mulele motak, fali keta angkam nangamon.”
51 Rait Yairus ni das, Yesus to ninrang tomwate fen lese ma nlarat I far kamar dalam, lan Petrus, Yohanes ma Yakobus, mla kanaky ne enany amany. 52 Tomwatar monuk rtasing ma ralol fali kanak a ne nmat lo. Nempa Yesus nfalak ber sir, “Kete mtyasing, i to nmat nempa narwa motak!”
53 Ne rmalip I, fali rafai feti kanak ne nmat lo. 54 Mpene Yesus nomat kanak ne liman ma nfalak, “He kanak, mpwote ko.” 55 Kanak ne smwangtany nsung a nbali i ma npote i desar ma namdir. Ne Yesus nfalak ma ral tnyame ber i. 56 Kanak ne enany amany rampriang desar. Nempa Yesus nfalak ber sir ma kete rasaur ngrie ne ber tomwatar.