Ibar na Yesus Ni mamate na katutun sangwalu
1 Wangur, noak ma kukmat a kmi ma kufbotin ibar nof Ratu ma tomwatar to rafai fuky a ne, yakw to kutanuk kor ningw anfai silai. Ma to kutanuk a nbal kor ngribatin ngafelar la kfwas a kmi. 2 Noak ma kor a kmi e yak ktwetak lo feti keta to kfwalak kabain walyetar, nempa kfwalak na lan Yesus ninr Ray Silai ma nmat na katutun sangwalu. 3 Noak ma kor a kmi e tenangw to babain. Ma kumtaut ma batingw maninik fali nre kete to boang nal ma kose karyae ma Ratu nal ber yakw ne. 4 Noak ma kutanuk ma kufwibar Ratu Ni ngribatnir ber a kmi a ne to kal ningw anfai silai la kfwas a kmi nempa Ratu Smwangtany Ni kuase ma nkarya na dalmir, nwayat ma milele feti safe ma kufwibar a ne botuan. 5 Yakw kose farane nema Ratu Ni kuase nose ma milele Ratu Ni ngribatnir, ma to nof ma milele tomwatar nir anfai silai.
Ratu Smwangtany nose ma tkaul tal Ni anfai silai
6 Wangur, boloka farane noak ma kutanuk kor tomwatar ma ramkoran ma ralele Ratu, yak kutanuk kor anfai silai. Nempa anfai silai ne to nof tomwat saryamprenar nir andanwar. Ma to nof mangkuase saryamprenar a nbal ma nir kuase ne keta nlai. 7 Ma ibar ma yak kufwibar a ne iane Ratu Ni anfai silai ma luryain e tomwatar to rafai fuky. Nempa noak ma I to nose saryamprene fuky e I ntetak lo feti keta nafbotin Ni anfai silai ne ber kit nema tonri kabain ngamonar sa ma nlie nlengan nof Ratu. 8 Ma mangkuase saryamprenar ye to fen lese ma nkaul nal Ratu Ni anfai silai ne. Ratu Ni anfai silai iane feti keta nsiduk Yesus ninr Ray Silai. Fali farlan sir rkaul ral Ni anfai silai ne sir to rsangwalu ninr Mangnrur Silai ma tdangin I a ne. 9 Na Kitap Lelerap dalam rarengi farye:
“Ratu nau kabain ngamonar ber tomwatar ma rkamis I,
kabanir a ne tomwatar to rsalan, to rdengar, ma to rdaun a fuky.”
10 Tomwatar to rafai kabanir a ne nempa Ratu Smwangtany nkarya na dalminrar ma nafbotin kabanir a ne ber kit. Ratu Smwangtany nafai nbal safe-safe kabain na Ratu, boloka nau kabanir a ne na dalamy. 11 Fali to tomwate fen lese nbal ma nafai tomwat walyetar dalmir lan koko sir, feleles farlan Ratu nbal, lan koko I ma nafai dalamy. 12 Ma kit a nbal e to tlarat andaun saryamprenar. Nempa Ratu nal Ni Smwangtany ber kit nema tkaul tal Ni dalam ngamone ma nfatutu ber kit a ne. 13 Noak ma kam mfalyole ibar nof Ratu ber tomwatar ma Ratu Smwangtany namin sir a ne, kam to mfalyole mor tomwatar nir anfai silai. Nempa kam mfalyole ber sir mor anfai silai nof Ratu Smwangtany. 14 Nempa tomwatar ma Ratu Smwangtany to namin sir, to rkaul ral ibar nof Ratu Smwangtany a ne. Ma rfalak feti ibar a ne kabain modar. Ma sir to rkaul ral ibar a ne fali lan Ratu Smwangtany ma nose ma rkaul ral. 15 Fali lan tomwate ma Ratu Smwangtany namin i a ne, ma nkaul nal ibar nof Ratu Smwangtany. Nempa tomwate ma Ratu Smwangtany to namin i a ne, keta to nkaul nal tomwate ma Ratu Smwangtany namin i a ne ni andaun. 16 Na Kitap Lelerap dalam rarengi farye:
“To tomwate fen lese nbal ma nafai Ratu Ni andaun,
ma to tomwate fen lese nbal ma bise nsurat I.”
Nempa kit ma talele Ratu ye, ninr andaun feleles farlan Yesus ninr Ray Silai.