Soranyar na Korintus raale sir
1 Wangur, noak ma kor a kmi e yakw to kuftutu kmi farlan kuftutu tomwatar ma Ratu Smwangtany namin dalmir. Nempa kuftutu kmi farlan kuftutu kangkir ma lolone rsus. Fali milele Yesus myor dalmir tubun motak ma myose mlyarat lan mir makeus. 2 Kangkir ma lolone rsus a ne keta renum lan susu ma to bise ma rane tnyam makornar. Iane feleles farlan kmi a nbal. Luryain e yak kuftutu kmi kor anftutwar ma merawe ma to kuftutu kmi kor anftutwar ma masumput. Anftutwar ma merawe ne farlan susu ma aftutwar ma masumput a ne farlan tnyam makornar. Yakw to kuftutu kmi kor anftutwar ma masumput fali keta to mkyaul myal. Ma terik lere ye kmi to mkyaul myal anftutwar a ne fuky. 3 Yak kfwalak farane fali kmi lolone myorip mlyarat makeus saryamprenar. Ma kmi to mpyeang ma tomwatar rlengan a kmi, ma miale kmi. Iane nfatutu feti kmi lolone myorip mlyarat makeus saryamprenar farlan tomwatar ma to ralele Ratu. 4 Fali farlan ketnir a rfalak, “Kam mlarat Paulus,” ma ketnir e rfalak, “Kam mlarat Apolos.” Iane nfatutu feti kmi myorip farlan tomwatar ma lolone rlarat nir makeus saryamprenar.
5 Kmi myose farane, fali mdyaun feti kam madu Apolos ye meluk safe? Ni botuan e kam ye tomwat biase motak kam. Kam ye Ratu Ni mangkaryayar motak ma maftutu kmi ma milele Yesus ninr Ray Silai. Ma kam ye mafpwane lan karyayar ma Ratu nal mpane ber kam a ne. 6 Na Ratu Ni karyae, yakw Paulus ma kufwibar Yesus ninr Ray Silai Ni ngribatnir. Iane farlan tomwate ma nyefar fini. Ma Apolos nma ma naftutu kmi na safe ma kufwibar a ne. Iane farlan tomwate ma nal weye la nsiram finyar a ne. Nempa lan Ratu ma nose ma milele I, iane farlan ma nose ma finyar a ne ratrump. 7 Na karyae ne tomwate ma nyefar fini ma tomwate ma nsiram sir a ne to uban. Lan Ratu ma nose ma finyar a ne ratrump ma uban. 8 Ni botuan e tomwate ma nyefar fini ma tomwate ma nsiram, radu ye feleles motak. Ma keta Ratu nal sewe ber sir nlarat nir karyayar mpane. 9 Kam ye ma maktem a mkarya ber Ratu. Ma wangur a kmi a ne farlan Ratu Ni lete. Ma kmi a nbal e farlan Ni das.
Yesus ninr Ray Silai neluk fanderen na ninr momorip
10 Wangur, Ratu Ni dalam ngamone ber yakw mpa nfil yak ma kweluk Ni mangsiduk ma kufwibar baluan Yesus ninr Ray Silai Ni ngribatnir ber a kmi. Betno tomwat walyetar rma ma raloran ningw karyae ne. Yakw farlan tuknar sa ma nangafel ma nafdiri das. Baluan e yakw kuftoran fanderen, betno tomwat walyetar raloran ningw karyae ma rafdiri das na fanderen a ne. Nempa tomwatar ma rafdiri das a ne ka rsalan fengamone feti keta rafdiri das a ne felan farpe. 11 Ratu koko I a nose ma Yesus ninr Ray Silai neluk fanderen na das a ne. Iane feti talele lan Yesus, mpa ka kete tomwate fen lese ma nose fanderen walyete la rlikur fanderen a ne. 12 Tomwatar ketnir rafdiri das na fanderen a ne ror kabanir ma kotkir farlan mase, perak ma permata. Sir a ne Ratu Ni mangkaryayar ma nir karyae nangafel. Nempa tomwatar ketnir rafdiri das ror kabanir ma to kotkir farlan katutun, ur mangretwar ma jerami. Sir a ne Ratu Ni mangkaryayar ma nir karyae to nangafel. 13 Fali noak ma Yesus ninr Ray Silai nma nbali saryamprene, keta nsalan tomwatar nir karyayar mpane ma ntetak feti impe ma nangafel ma impe ma to nangafel. Iane farlan au ma nane dasar sa. Das ma rose rof katutun, ur mangretwar, ma jerami ne keta au nane nafere monuk. Nempa das banir ma rose rof mase, perak ma permata keta au to nane. 14 Farlan au to nane das a ne, iane feti ni karyae nangafel mpa keta Ratu nal sewe ber i. 15 Nempa farlan au nane nafere das a ne, iane feti ni karyae to nangafel mpa keta ni mangolin a ne nti letkyape. Boloka farane Ratu keta nfair i. Ma i farlan tomwate ma rabut i nof au dalam. 16 Kmi to mifai feti kmi ye myeluk Ratu Ni das e? Ma to mifai feti Ratu Smwangtany namin dalmir e? 17 Kmi ye farlan Ratu Ni das ma nanglerap. Mpa tomwate ma nafyatak Ni das a ne keta Ratu nukun i.
18 Ka kete tomwate fen lese naflepusuk a nbali i ma ndaun feti ni anfai silai. Farlan tomwatar ketnir nof a kmi ye rdaun feti nir anfai silai na tomwatar sonirlury, ni ngafele e kete rfatutu nir anfai ne ma reluk tomwat mode na tomwatar sonirlury. Sir rose farane nema na Ratu sounlury e reluk tomwate ma ni anfai silai. 19 Fali tomwatar ma rdaun feti nir anfai silai na tomwatar sonirlury, keta nir anfai ne to uban na Ratu sounlury. Ma rarengi na Kitap Lelerap dalam, “Tomwate ma ni anfai silai keta Ratu nal Ni anfai silai ne la nafufu i.” 20 Ma rarengi na Kitap Lelerap dalam farye nbal, “Ratu nafai tomwatar ma nir anfai silai ne nir andanwar. Nempa andanwar monuk a ne to ubany.” 21 Iane nwayat ma ka kete mifdas a kmi feti myeluk manglarat ber tomwatar sa, fali Ratu nal monuk-monuk ber kmi a ne lo fen mir ngamone. 22 I nfil yakw, Apolos ma Petrus ber a kmi ma fen mir ngamone. Ma I nal saryamprene ye, nal momorip, ma nal mamate nbal ber a kmi. I nal lere ye, ma lere ma nma ne ber a kmi. Ma monuk-monuk a ne Ratu nal ber a kmi fen mir ngamone. 23 Ma ka minremi feti kmi ye myeluk ninr Ray Silai Ni tomwatar, ma ninr Ray Silai ne Ratu Ni tomwate.