Mangsiduk walyetar rlangun Ibar Ngamone ma Paulus a nafwibar
1 Lama ngarak buti resin fat a relak, yakw ktwi a kbwal Yerusalem. Yak ktwi e kor Barnabas ma Titus a nbal. 2 Yak ktwi Yerusalem fali Ratu nfalak ber yakw ma ktwi. Na iano yakw kufburat kor lan sir ma reluk ulun ber soranyar ma kfwalyole Ibar Ngamone ma kufwibar ber tomwatar ma to Yahudi sir. Yakw kose farane ma bise kufai feti sir rlangun ningw karyae ne nre tate, nema safe ma kose nof luryain terik lere ye to nti letkyape. 3 Nempa kfwalyole monuk e, sir rlangun safe ma kufwibar a ne. Mpa boloka Titus ma nor yakw ne Yunani i, sir to rpaksa ma rsunat i rlarat tetetkar ma Ratu nal ber Musa. 4 Botuan feti tomwatar ketnir rpaksa ma rsunat Titus. Sir a ne rose felnir far tomwatar ma ralele Yesus ninr Ray Silai. Sir rma ma ranaumat kit feti lolone tafpwane tetetkar ma luryain e Ratu nal ber Musa ne nre tate. Sir rose farane fali rpeang ma tpan kawar na tetekar a ne, safo to tlarat tetekar a ne nbal fali dalminrar lese tor Yesus ninr Ray Silai lo. 5 Nempa kam to mlarat sir fen rufuky a nbal, fali kam to mpeang ma sir rfule kmi ror nir anftutw lepuskwar. Kam mose farane nema kmi dedesar ma milele lan anftutw botunar na Ibar Ngamone ma kam mafwibar a ne.
6 Wangur, tomwatar ma reluk ulun ber soranyar na Yerusalem a ne to rfalak sasaf la rtafal anftutwar ma kuftutu ne. Boloka tomwatar rdaun feti tomwat silayar sir nempa yakw e tate, ma kdwaun feti sir feleles nor yakw motak fali Ratu to nasalan sou. 7 Mangonbanir a ne to rfalak sasaf la rtafal anftutwar ma kuftutu ne, nempa rtafal ma ryoding feti Ratu nal karyae ber yakw ma kufwibar Ibar Ngamone ber tomwatar ma to Yahudi sir. Iane feleles farlan ma I nal karyae ber Petrus ma nafwibar Ibar Ngamone ber tomwat Yahudyar. 8 Ma botuan feti Ratu ma nafkoran Petrus ma neluk Yesus Ni mangsiduk ber tomwat Yahudyar, mpa I nafkoran yakw nbal ma kweluk Yesus Ni mangsiduk ber tomwatar ma to Yahudi sir. 9 Ma Yakobus, Petrus ma Yohanes ryoding feti Ratu nfil yakw ma kweluk mangsiduk, mpa raomat lim ror yakw ma Barnabas. Sir ye ma tomwatar rfalak feti tomwat silayar sir na Yerusalem. Sir rose farane neluk faniak feti sir ryoding ma maktem a mafwibar Ibar Ngamone. Mpe kam mafwibar Ibar Ngamone ber tomwatar ma to Yahudi sir, ma sir e rafwibar ber tomwat Yahudyar. 10 Ma nir tatake lan lese ma ber kam iane feti ka kam msalan tomwatar ma rawatan. Mpe iane ma kpweang desar ma yakw kose.
Paulus nbangal Petrus na Antiokhia
11-12 Ler sa e Petrus nma Antiokhia. Noak ma betno nma e i biase ntame nor tomwatar ma to Yahudi sir. Nempa noak ma tomwat Yahudyar ketnir ma Yakobus nluan sir a ne rma rof Yerusalem, i nose lole ma to ntame nor tomwatar ma to Yahudi sir a ne. I nose farane fali namtaut tomwat Yahudyar ma rma rof Yerusalem a ne. Sir ye ma rpaksa tomwatar ma ralele Yesus ma to Yahudi sir a ne ma rsunat sir. Ma noak ma kswalan safe ma Petrus nose ne, yak ktwampu i a na tomwatar sonirlury, fali safe ma nose ne sale. 13 Tomwat Yahudi walyetar rsalan Petrus nose farane, sir rlarat i a nbal ma rose nir lole ma to rtame ror tomwatar ma ralele Yesus ma to Yahudi sir a ne. Iane nwayat ma Barnabas nlarat sir a nbal. 14 Noak ma kswalan feti nir wewelmpampane to feleles nor anftutw botunar na Ibar Ngamone dalam, yakw kfwalak ber Petrus na tomwat ngayadin sonirlury ma rafburat sir a na iano, “Ko ye tomwat Yahudi, ma biase mlwarat tomwatar ma to Yahudi sir a ne nir wewelmpampane, mpa to uban ma mlwarat a mbwali Yahudyar nir wewelmpampane lo. Ma safema lere ye mpwaksa tomwatar ma ralele Yesus ma to Yahudi sir a ne, ma rlarat Yahudyar nir wewelmpampane?”
Ratu nafdiat tomwatar farlan ralele Yesus ninr Ray Silai
15 Wangur, kam ye Yahudyar kam fali mof das dalam Yahudi. Ma kam to far tomwatar ma to Yahudi sir a ne ma nir salar yadin. 16 Kit tafai feti to tomwate fen lese ma Ratu nafdiat i nof ma nafmpwane tetekar ma luryain e nal ber Musa ne, nempa nof lan ma nalele Yesus ninr Ray Silai. Iane nwayat ma Yahudyar kam e malele Yesus ninr Ray Silai nbal, nema Ratu nafdiat kam mof ma malele I, ma to nof ma mlarat tetetkar ma nal ber Musa ne. Fali Ratu to nafdiat tomwate nof ma nlarat tetetkar ma nal ber Musa. 17 Mpe kam mareke ma Ratu nafdiat kam nof ma malele Yesus ninr Ray Silai, ma to nof ma mlarat tetetkar ma nal ber Musa. Nempa tomwatar ketnir rfalak lo feti kam feleles farlan tomwatar ma to Yahudi sir fali to mlarat tetetkar ma Ratu nal ber Musa mpa mose salar lo. Ma malele lan Yesus ninr Ray Silai. Mpa farlan farane iane feti Yesus ninr Ray Silai ne ma nwayat kam ma mose salar e? Tate nre! 18 Luryain e klwarat desar agame ni yayatrwar ma lere ye to klwarat lo, mpa farlan klwarat a kbwali iane feti kbwangal Ratu fali to klwarat tetetkar ma Ratu nal ber Musa. 19 Noak a ne klwarat desar tetetkar ma Ratu nal ber Musa nempa tetetkar a ne to bise ma nafngamone nbali yakw kor Ratu. Mpa kose ma tetetkar a ne to rkete yak lo nema bise ma kmworip a klwarat Yesus ninr Ray Silai Ni mpempeang. Yak to klwarat tetetkar a ne feleles farlan ma rsangwalu yakw nor Yesus ninr Ray Silai lo. 20 Mpa boloka lolone kmworip, yak to kose klwarat ningw mpempeang nempa klwarat Yesus ninr Ray Silai Ni mpempeang. Ma lere ye yakw kmworip a na saryamprene ye fali kulele Ratu Anaky. I ye ma nkamis yakw ma nanrenre I ma nmat ber yakw. 21 Yak to kfwalak feti Ratu Ni dalam ngamone ma nfatutu ber yakw ne to uban. Tate desar. Fali Ratu to nafdiat tomwatar nof ma rafmpwane tetetkar ma nal ber Musa. Farlan I nose farane iane feti Yesus ninr Ray Silai Ni mamate ne to ubany.