Paulus ni surat ber soranyar na Efesus
Salam
1 Ye surat nof yakw Paulus, ber Ratu Ni tomwatar na kote Efesus ma dalmir lese ror Yesus ninr Ray Silai. Yak kweluk Yesus ninr Ray Silai Ni mangsiduk klwarat Ratu Ni mpempeang. 2 Yak ktwak ma weni Amninrar Ratu, ma Yesus ninr Ray Silai ma neluk ninr Mangnrure ne rfatutu Nir dalam ngamone ma ral maline ber a kmi.
Ratu nberkat kit fali dalminrar lese tor Yesus ninr Ray Silai
3 Wangur, mya ma tdangin Ratu. Ratu ye Yesus ninr Mangnrure ma neluk ninr Ray Silai ne Amany. Ma Ratu nal kabain ngamonar monuk nof surga la nberkat kit fali dalminrar lese tor Yesus ninr Ray Silai. 4 Noak ma Ratu to nose saryamprene fuky e, I nfil a nkese kit nema dalminrar lese tor Yesus ninr Ray Silai, ma tanglerap ma to ninr sal na Ratu sounlury. 5 Ma Ratu ntetak nof luryain lo feti keta nfil kit ma teluk angkir, nalyole safe ma Yesus ninr Ray Silai nose na katutun sangwalu. Ma Ratu nose farane nlarat Ni mpempeang fali nkamis kit. 6 Mpa mya ma tdangin Ratu fali dedesar ma nfatutu Ni ankamis ma Ni ngamone ma nlie nlengan ber kit a ne. I nose farane nalyole Anaky ma nkamis I a ne fali dalminrar lese tor I.
7 Ma I nfatutu Ni dalam ngamone ma nlie nlengan ber kit, mpa nanrenre Anaky ma nmat na katutun sangwalu. Ma daran a ntarbui la ntebus ninr salar nema Ratu to nukun kit. 8 Ma Ratu dedesar ma nfatutu Ni dalam ngamone ber kit. I nal Ni anfai silai ber kit a nbal nema tafai safe-safe monuk ma I nose ne. 9 Ratu Ni rerengyar nof luryain a ne feti keta Yesus ninr Ray Silai ne ma nafdiat safe ma nreng. Ma lere ye koko I ma nafbotin ber kit, Ni rerengyar ma luryain e tomwatar to rafai fuky a ne. 10 Ratu nose Ni rerengyar a ne terik ma I nose safe safe monuk ma ramin sorga ma saryamprene ma fen lese, nema Yesus ninr Ray Silai neluk ulun ber sir.
11 Ratu nose safe-safe monuk nlarat Ni mpempeang ma nlarat safe ma ntetak a ne. Ma nfil kit nof luryain ma teluk Ni tomwatar fali dalminrar lese tor Yesus ninr Ray Silai lo. 12 I nose farane nema kit ma talele baluan ninr Ray Silai ne, tdangin Ratu fali Ni kuase ma nlie nlengan a ne.
13 Feleles farlan kmi a nbal, noak ma mdyengar ibar botuan nof Ratu, kmi milele Yesus ninr Ray Silai ne, fali dalmir lese myor I. Kmi milele ibar botuan a ne, mpa Ratu nfair a kmi nof mir salar, ma nal Smwangtany far ma nyoding a ne ma nfatutu feti kmi myeluk Ni tomwatar lo. 14 Ratu Smwangtany ma nal ber kit a ne keta nor kit dedesar terik ma tonri monuk safe ma Ratu nyoding ber kit a ne. Iane feti ntebus kit nof ninr salar nema teluk Ni tomwatar. I nose farane la tdangin Ni kuase ma nlie nlengan a ne.
Paulus ni sampangar
15 Wangur mir kateman, Ratu nal berkat ma nlie nlengan ber a kmi lo, mpa noak ma kdwengar feti kmi milele Yesus ninr Mangnrure, ma mkyamis Ratu Ni tomwatar monuk, 16 yakw dedesar ma kose alang ber Ratu na kmi. Ma dedesar ma kunremi kmi a na ningw sampayang. 17 Ratu ye ma Ni kuase nlie nlengan. I ye, Yesus ninr Mangnrure ma ninr Ray Silai ne Amany. Yak ktwak ma nal Ni Smwangtany ma anfai silai ber a kmi nema mifai I botuan. 18 Yak ktwak nema Ratu nose ma mkyaul myal ngri ngamon safar ma milele myof Ratu ma nfil a kmi a ne. Ma ktwak a nbal nema mifai berkat ma nlie nlengan ma Ratu nau ber Ni tomwatar a ne. 19 Ma ktwak a nbal nema mkyaul myal Ratu Ni kuase ma nlie nlengan, ma I nal ber kit ma talele I a ne. Kuase ma nlie nlengan a ne feleles farlan, 20 kuase ma Ratu npaki la nafmorip a nbali Yesus ninr Ray Silai nof Ni mamate, ma naftoran I a na serin fiany na sorga.
21 Kit ninr Ray Silai ye Ni kuase silai nlengan nof smwangtar monuk ma rfarete na sorga ma saryamprene. Ma Ni kuase ne silai nlengan nof mangfaretar monuk a nbal, to lan lere ye nempa terik ma dedesar. 22 Mpe Ratu nal kuase ber ninr Ray Silai ne ma nkuase safe-safe monuk, ma nose nbal ma neluk uluny ber tomwatar kit ma talele I.
23 Kit ninr Ray Silai ne farlan ulun, ma tomwatar ma ralele I a ne farlan tenany. Ma safe-safe monuk ma ramin I a ne keta nal ber Ni tomwatar. Ma I nkuase safe-safe monuk na mpenempen.