Paulus ni surat ber soranyar na Filipi
Ngribatin luryanir
Paulus ni surat ber soranyar na Filipi. I narengi surat ye noak ma namin sel. Kote Filipi ye namin propinsi Makedonia balisya timur. Noak ma Paulus npan ma nafwibar Ibar Ngamone na Yesus ninr Ray Silai ber tomwatar fen lain du, i nafburat soranyar na Filipi ye. Sir ye luryain e reluk soranyar na Eropa. Noak a ne i nti e nor tbwarnir tel. Sir a ne Silas, Timotius ma Lukas.
Paulus narengi narengi surat ye ma nfalak ber soranyar na Filipi feti i dalam a nsenag fali rtulung i a na ni karyae ma rafwibar Ratu Ni Ibar Ngamone na Yesus ninr Ray Silai ber tomwatar. Sir rtulung i noak ma betno luryain ma ralele Yesus ninr Ray Silai (Filipi 1:3-11). I nfalak a nbal feti keta rfen i fali nafwibar Ratu Ni Ibar Ngamone ber sir. Ma farlan botuan farane keta i nlangun monuk -monuk a ne nor dalam senange (Filpi 2:17). I npeang a nbal ma nfalak ber sir ma ka ranremi ma dedesar e ralele Yesus ninr Ray Silai boloka rkoman suse (Filipi 1:27-30;4:1). I nfalak a nbal nema dedesar ma rmorip e dalmir lese, rakamis sir ma to rafdas sir farlan Yesus ninr Ray Silai (Filipi 2:1-5). I nfalak a nbal ma ma ka tafai feti Yesus ninr Ray Silai ye ubany nlengan nof safe-safe monuk. (Filipi 3:1-11). Na surat ye i ntak a nbal terima kasi nof soranyar na Filipi fali rtulung i ma ral doit ber Epafroditus ma nonr ber i (Filipi 4:15-20).
Surat ye isin farye:
1:1-2 Salam
1:3-11 Paulus nsampayang ber soranyar na Filipi
1:12-26 Paulus namin sel nempa Ibar Ngamone ntafal ma nsor
1:27-30 Paulus nsurat tomwat Filipiar nema dedesar ma ralele Yesus ninr Ray Silai
2:1-11Ka tmorip e tbalak Yesus ninr Ray Silai ma nafufu nbali I
2:12-18 Ka ninr momorip farlan ngaodir ma nidak saryamprene
2:19-30 Timotius ma Epafroditus
3:1-11 Lan Yesus ninr Ray Silai ma neluk dalamten malonri
3:12-16 Ka dedesar ma tose tlarat Yesus ninr Ray Silai Ni mpempeang
3:17-21 Snyurtar ber soranyar na Filipi
4:1-9 Paulus ntak a nbal ma soranyar na Filipi ma rose lan kabain ngamonar
4:10-20 Paulus nose terima kasi na safe ma ral ber i
4:21-23 Salam