Snyurtar ber kangkir ma ene ame
1 Hei kangkir a kmi, ka dedesar ma mdyengar enmir amir fali dalmir lese myor ninr Mangnrure lo, kmi myose farane iane ma diat. 2 Ma ka “myalang enmir amir.” Iane faret luryain ma rarengi na Ni Kitap Lelerap dalam. Farlan myose farane keta myonri berkat ma Ratu nyoding farye: 3 keta nal ngamone ber a kmi ma naflawas rekmir na saryamprene ye.
4 Ma ber amngur a kmi, ka kete mfyengarat angkimir nema kete sir dalmir maninik a kmi. Nempa ka msyalan sir fengamone ma msyurat sir myor ninr Mangrure Ni anftutwar.
Snyurtar ber karwar ror nir bosar
5 Ma ber karwar a kmi, ka dedesar ma myose mlyarat mir bosar na saryamprene. Ma ka myalang sir ma mkyarya ber sir myor dalmir kateman, feleles farlan ma mkyarya ber Yesus ninr Ray Silai. 6 Ma kete ramin a betno mkyarya mibotuan nema rdangin a kmi. Nempa ka mkyarya ber sir myor dalmir kateman, farlan ninr Ray Silai Ni mangkaryayar ma rose rlarat Ratu Ni mpempeang ror dalmir kateman. 7 Ma ka mkyarya ber mir bosar a ne myor dalmir senange farlan ma mkyarya ber ninr Mangnrure, ma to ber tomwatar. 8 Kmi mifai feti ninr Mangnrure keta nal sewe ber tomwatar mpane, nlarat kabain ngamonar ma rose ne, boloka karwar sir nre to karwar sir.
9 Ma ber bosar a kmi, ka myose ngamone mir karwar farane nbal, ma kete mkyanre sir. Ka minremi feti kmi a ma mir karwar a ne mir bos lan lese, iane ninr Mangnrure ma namin surga, ma I to nasalan souw.
Ka tpaki safe kabain ma Ratu nal a ne la tbangal smwangat yatkar
10 Wangur, na surat ye ni mangtany famudi e kfwalak ber a kmi: ka dedesar ma mifkoran dalmir myor fakoran nof ninr Mangnrure Ni kuase, fali dalmir lese myor I lo. 11 Ma kmi miprang ma mbyangal smwangat yatkar nir ulun mpa ka mpyaki safe kabain ma Ratu nal ber a kmi a ne, nema noak i nfule kmi nor ni lepuskwar e kmi dedesar ma myakoran. Kmi mpyaki kabanir ma Ratu nal a ne farlan tentarar sa ma npaki ni minkar la nbangal ni musu. 12 Fali kit to taprang ma tbangal tomwatar, nempa tbangal smwangat yatkar nir ulun nor smwangat yatak walyetar ma rkuase na langit. Sir a ne ma rkuase tomwatar ma ramin makrokap dalam na saryamprene ye. 13 Iane nwayat ma ka mpyaki kabanir monuk ma Ratu nal ber a kmi a ne neluk teteri. Nema noak ma kabain yatkar monuk a ne diat kmi e keta to msyue kmi, ma bomir myal ma mbyangal terik ma omp.
14 Mpa ka dedesar ma myakoran. Ma ka dedesar mlyarat Ratu Ni anftutw botunar fali iane neluk bebebe ber a kmi. Ma ka myose safe kabain e dalmir a ramlonr fali iane neluk teteri ber a kmi noak ma miprang. 15 Ma ka dedesar ma msyiap ma mifwibar Ibar Ngamone feti Yesus ninr Ray Silai nose ma tomwatar rangamon a rbali ror Ratu lo. Iane farlan sabatwemar ma mpyaki. 16 Ma na lerar mpane e ka myakoran ma milele ninr Mangnrure fali keta neluk teteri ber a kmi. Mpa kmi bise ma mfyen monuk tunis au ma smwangat yatkar nir ulun ntate ber a kmi a ne. 17 Ma ka dedesar ma milele feti Ratu nfair a kmi lo, fali iane farlan ma mpyaki topi baja ma nteri ulmir. Ma Ratu Ni ngribatnir ma Ni Smwangtany ma nal ber a kmi a ne, neluk smade. 18 Ma kmi miprang ma mbyangal smwangat yatak nir ulun mpa ka dedesar ma msyampayang, ma mtyak Ratu Smwangtany ma nfatutu kmi ma msyampayang. Ma ka mijake kmi fengamone, ma msyampayang dedesar nema mimkoran ma bomir myal kabanir monuk ma keta rbotin a ne. Ma ka dedesar ma msampayang a nbal ber Ratu Ni tomwatar monuk. 19 Ma msyampayang ber yakw a nbal, nema noak ma kutanuk e kfwalak lan kabain botunar ma Ratu nfatutu ne. Ma bise ma kbwaran ma kufwibar Ibar Ngamone ma luryain e tomwatar to rafai fuky. 20 Yakw ye Yesus ninr Ray Silai Ni Mangsiduk ma kumin sel fali kufwibar Ibar Ngamone. Mpa ka msyampayang a nbal nema boloka kumin sel nempa kbwaran ma kfwalak ber tomwatar klwarat safe ma botuan.
Salam Penutup
21-22 Wangur, yak klwuan Tikikus ma nafbotin safe-safe monuk na yakw ber a kmi. Tikikus ye waninrar ma tkamis i fali dalminrar lese tor Yesus ninr Ray Silai. I ye ninr Mangnrure Ni mangkaryae ma nalarat liry ma maktem a mkarya, ma keta nafbotin ibar na kam nema dalmir a ramkoran.
23 Yakw ktwak ma weni Amninrar Ratu ma Yesus ninr Ray Silai ma neluk ninr Mangnrure ne, rose ma mikamis a kmi, myorip e mingamon myor tomwatar, ma mtyafal ma milele dedesar Yesus ninr Ray Silai. 24 Ma yak ktwak a nbal ma weni Ratu nfatutu Ni dalam ngamone ber kmi monuk ma mkyamis Yesus ninr Mangnrure ma ninr Ray Silai ne. Ma mkyamis I myor ankamis ma to terik. Salam nof yakw Paulus.