Ka tmorip a na ngaodir dalam
1 Wangur, kmi ye Ratu angkir ma nkamis a kmi, mpa ka myose mlyarat Ratu Ni wewelmpampane. 2 Ma na mir momorip e, ka mikamis a kmi, farlan ma Yesus ninr Ray Silai nkamis kmi a nbal. Yesus ye ma nanrenre I ma nmat la ntebus kit, ma neluk syompe ma nafsenange Ratu dalamy.
3 Ma Ratu Ni tomwatar ber kmi mpa ka kete minronr, kete miosangry, ma kete mkyampres. Ka kete mdyaun desar kabanir a ne fali to rangafel ber a kmi. 4 Ma kmi a nbal e kete mlyang ngribatin yatkar nre ansalik yatkar fali kabanir a ne to ubnir ma to rangafel ber a kmi. Ni ngafele e mlyoik dalmir ma myose alang ber Ratu. 5 Wangur, mdyengar fengamone safe ma kfwalak ye: Tomwatar ma ranronr, raosangry, ma rkampres, keta Ratu ma Yesus ninr Ray Silai to rfarete sir reluk Nir tomwatar. Fali rose kabanir a ne farlan ratwar ma rsatngur ber sir.
6 Ma ka kete myinrang ma tomwatar rfule kmi ma mlyarat sir ma myose kabanir a ne, iane sir rlepusuk. Fali Ratu narese tomwatar ma rose kabanir a ne, ma keta nukun sir ma to rlarat I. 7 Mpa ka kete mitbwarin myor tomwatar ma rose farane. 8 Botuan feti luryain e kmi myose kabanir a ne nbal fali kmi myorip a na makrokap dalam. Nempa lere ye kmi myeluk Ratu Ni tomwatar lo ma myorip a na ngaodir dalam. Mpa ka mir wewelmpampane mbyalak tomwatar ma rmorip a na ngaodir dalam. 9 Tomwatar ma rmorip a na ngaodir dalam keta rose lan kabain ngamonar, ma dalmir a ramlonry, ma rmorip e rafsenange Ratu dalam. 10 Ma ka mireke ma mifai feti myose safe la mifsenange Ratu dalamy. 11 Ka kete myose mlyarat tomwatar ma rmorip a na makrokap dalam fali kabanir ma rose ne to ubnir sasaf. Nempa ka mfyatutu ber tomwatar feti kabanir monuk ma sir rose ne, iane kabain yatkar. 12 Fali farlan tfalak motak kabain yatkar ma sir rose ramudim a ne, tmeat desar. 13 Mpa ka mfyatutu feti kabanir ma rose ne kabain yatkar, nema rfenai feti sir rose salar lo. Iane farlan ngaodir ma idak na makrokap dalam, keta tomwatar bise ma rkeban desar safe-safe monuk. 14 Iane farlan ma tomwatar rfalak,
”Hei, kmi ma mirwa mpyote kmi,
ma kmi ma myat myorip a mbyali.
Ma keta Yesus ninr Ray Silai nodir dalmir.
15 Mpa ka mijake mir wewelmpampanar fengamone. Ma kete myorip a mbyalak tomwat modar, nempa ka mbyalak tomwatar ma rafai resi. 16 Ma lerar monuk e ka dedesar ma mireke ma myose kabain ngamonar, fali na are ye tomwatar dedesar ma rose kabain yatkar. 17 Mpa kete mbyalak tomwat modar, nempa ka mireke ma mkyaul myal safe ma Yesus ninr Mangnrure npeang ma myose.
18 Ka kete minabuk fali keta nwayat ma myose kabain yatkar. Nempa ka mtyak Ratu Smwangtany ma nkuase kmi. 19 Ma farlan mitanuk e ka sa nafkoran sa myor beu mazmur ma beu dadangin ma Ratu Smwantany nal ber a kmi. Mpa mya ma mbyeu la mdyangin ninr Mangnrure myor dalmir katemany. 20 Ma ka dedesar ma myose terima kasi ber Amninrar Ratu na safe-safe monuk. Kmi myose farane fali dalmir lese myor Yesus ma neluk ninr Mangnrure ma ninr Ray Silai ne.
Snyurtar ber mangafsawar
21 Ma ka sa nalang sa la mfyatutu feti kmi myalang Yesus ninr Ray Silai.
22 Ber bat mangafsawar a kmi, ka myalang sawmir farlan ma myalang Yesus ninr Mangnrure. 23 Fali merwanar reluk ulun ber sawnir, feleles farlan Yesus ninr Ray Silai neluk uluny ber tomwatar ma ralele I. I ye ma nfair soranyar a ne, iane I tenany. 24 Mpa bat mangafsawar ka ralang sawnir na safe kabain, farlan ma soranyar ralang Yesus ninr Ray Silai.
25 Ma ber merwan mangafsawar a kmi, ka mkyamis sawmir farlan ma Yesus ninr Ray Silai nkamis Ni soranyar. I nkamis desar sir mpa nanrenre I ma nmat la ntebus sir. 26 I nose farane ma nfil a nkese sir ma reluk Ratu Ni tomwatar. Ma Ni ngribatnir a ne farlan weye ma naflerap sir. 27 I nose farane nema reluk Ni tomwatar ma ranglerap ma to nir sal, ma tomwatar to bise ma rfasale sir. Mpa noak ma ramdir sounlury e sir farlan tnyiman bate ma nfonak i e nangafel resi ma ndaf ni tnyiman. 28 Ber merwan mangafsawar a kmi a nbal, ka mkyamis sawmir farlan ma mkyamis tenmir. Fali ise ma nkamis sawan iane i nkamis a nbali i. 29 To tomwate fen lese ma to nlompang tenany, nempa keta npiare ma najake tenany. Iane farlan Yesus ninr Ray Silai ma Ni soranyar ma reluk tenany a ne, keta npiare ma najake sir. 30 I nose farane fali kit monuk ye farlan matnir, tangnir, emnir ma ramin tenany. 31 Iane farlan ma rarengi na Kitap Lelerap dalam farye: “Merwane ka nti a ntate enany amany ma nafsau nor sawany nema radu rmorip fen lese.” 32 Ayat ye masumput desar nempa nof ningw andaun e, ayat ye nfatutu feti Yesus ninr Ray Silai ma Ni soranyar e dalmir lese. 33 Boloka farane ayat ye nfatutu mangafsawar a kmi a nbal: Mpa ber merwanar a kmi ka mkyamis sawmir farlan ma mkyamis tenmir. Ma ber batar ka myalang sawmir.