Tomwatar ma ralele Yesus ninr Ray Silai ka rmorip e dalmir lese
1 Wangur, Ratu nfatutu Ni dalam ngamone ber a kmi lo, mpa ktwak desar kof a kmi ma ka mfyatutu mir wewelmpampan ngamonar na mir momorip, farlan tomwatar ma Ratu nfil sir a ne lo. Ma lere ye yak kumin sel ma kurengi surat ye ber a kmi. Ma kumin sel fali kwarya ber ninr Mangnrure. 2 Ma kete mifdas a kmi ma mdyaun feti silai kmi a mlyengan myof tomwat walyetar. Ma ka msyabar, kete mfyengarat tomwatar, ma ka mitulung a kmi la mfyatutu feti mikamis a kmi. 3 Ratu Smwangtany nose ma dalmir lese lo, mpa ka mireke ma myorip e mingamon myor tomwatar ma kete mkyafre. 4 Ma kit monuk ma dalminrar lese tor Yesus ninr Ray Silai ye farlan tene. Ma lan lese ma namin dalminrar iane Ratu Smwangtany. Ma lan lese ma kit talele tof Ratu fali I nfil kit ma teluk Ni tomwatar. 5 Kit ninr Mangnrure lan lese, ma kit talele lan I, ma nof lan ma radiris kit ror Ratu ngarany iane faniak feti kit teluk Ratu Ni tomwatar. 6 Ratu ye lan lese. I ye ma neluk Ame ber tomwatar monuk. Ma I neluk Mangnrure nbal ber sir, ma nkarya na nir momorip. Ma dedesar ma namin tomwatar monuk dalmir.
7 Boloka dalminrar lese tor Yesus ninr Ray Silai nempa nal anfai mpane ber kit e to feleles. Ma nal anfai ne ber kit ma tkarya tlarat Ni mpempeang. 8 Iane feleles farlan ma rarengi na Kitap Lelerap dalam farye:
“Lama I nafufu monuk Ni kanrar I nfangat far ain medase desar,
I nonr tomwatar yadin ma nafufu sir a ne;
ma I nal kabain ngamonar ber tomwatar monuk.”
9 Farlan I nfangat far ain medase iane feti I ntompur baluan far saryamprene mangtany bab desar.a 10 I ye ma ntompur lo, ma I a nbal ma nfangat far ain medase desar ma nlengan nof langit, nema nfarete safe safe monuk na surga ma na saryamprene. 11 I nal a nbal anfai ber kit mpane nlarat safe ma ntetak. Ma nfil ketnir reluk mangsidkwar, nabyar, mangafwibar Ibar Ngamone, tuanggurwar ma ketnir a nbal e reluk mangnrure ber soranyar. 12 I nal anfai mpane ber sir ma rose ma soranyar monuk bise ma rkarya ber Ratu, ma rlangun Ni tomwat walyetar. Farlan sir rose farane keta tomwatar monuk ma ralele Yesus ninr Ray Silai rtafal ma ramkoran ma ralele I, fali sir monuk a ne farlan I tenany. 13 I nal anfai ber sir a ne nema nait ni tewat e dalminrar lese ma talele I ma tkaul tal botuan Ratu Anaky. Nema nti a nti e ninr adat tbalak Yesus ninr Ray Silai. 14 Farlan kit tmorip farane keta ninr momorip to far kangkir ma tomwatar bise rfule sir ror nir aklar. Ma to bise rose ma tlarat nir anftutw lepuskwar ma nose ma ninr andaun to ntai farlan sori ma mnaur nayeban i far dol far da. 15 Sir to bise ma rfule kit fali tamkoran ma talele Ratu Ni anftutw botunar ma dedesar ma takamis kit. Farlan tose farane keta nti a nti e ninr adat tbalak Yesus ninr Ray Silai, ma I neluk ulun ber soranyar kit. 16 Farlan I neluk ulun keta I bise ma nfarete kit ma teluk tenany. I nose matnir, tangnir, emnir ma fen lese ma ramin mpane anir ma nangafel na tenany, nema bise ma rkarya ma nangafel. Mpa, farlan kit a nbal bise ma tkarya ma nangafel tlarat safe ma Ratu nal ber kit mpane, keta tafal ma tamkoran ma takamis kit.
Momorip beberi tor Yesus ninr Ray Silai
17 Wangur, Yesus ninr Mangnrure nal kuase ber yakw lo mpa kfwalak desar ber a kmi: Kete myose mbyali mir adat ma farlan tomwatar ma to rafai Ratu ne, ma rdaun lan ngriar ma to ubnir sasaf. 18 Sir ulnir arwaluk ma to rpeang ma rafai sasaf na Ratu mpa nir andanwar raktem ma to ronri momorip beberi nof Ratu. 19 Ma to nir memeat lo mpa dedesar ma rose kabain yatkar rlarat lan nir makeus yatkar.
20 Nempa Yesus ninr Ray Silai Ni wewelmpampane ma raftutu ber a kmi a ne to farane. 21 Ni botuan e kmi mdyengar na I lo, ma tomwatar raftutu anftutw botunar na I ber a kmi. 22 Mpa ka myebas monuk mir adat yatkar ma myose na mir momorip wangim ne. Fali mlyarat lan mir makeus a ne nwayat ma mpyan sale ma mir momorip nayatak. 23 Ma ka myinrang ma Ratu nafbweberi dalmir ma mir andanwar a ne, 24 ma myorip a na momorip beberi ma Ratu nal ber kmi a ne. Ratu nose momorip beberi ne nlarat Ni adat. Mpa farlan mlyarat Ni adat keta myorip e mimlonry, minglerap, ma myose lan kabain ngamonar.
25 Ma ka mfyalak lan kabain botunar ber mpane kmi ma kete mlyepusuk. Kit monuk ye lan lese ma to bise ma takes tasam kit, fali kit farlan Yesus ninr Ray Silai matnir, tangnir, emnir ma ramin tenany. 26 Ma farlan mirese tomwatar, ka mijake kmi ma kete myose salar. Ma kete mirese sir terik ma lere nfuf, 27 nema to lety ber smwangat yatkar nir ulun ma nteman a kmi. 28 Mpa tomwate ma namnang, ka kete namnang lo. Nempa ka nkarya ma nangafel ma nmat a nlai nema bise ma nmorip, ma ntulung tomwatar ma rawatan. 29 Ma ka kete mfyalak ngribatin yatkar ber tomwatar, nempa ka myal ngribatin ngamonar la mifkoran tomwatar rlarat safe ma rperlu ma rdengar, fali iane fen nir ngamone. 30 Ma ka kete myose kabanir ma Ratu Smwangtany to npeang. Fali Ratu nal Smwangtany ber a kmi ma nfatutu feti kmi myeluk Ni tomwatar. Ma keta namin kmi terik ni tewat ma Ratu nalin a kmi nof mir salar. 31 Ma ka myebas monuk mir adat ma farye: dalmir maninik tomwatar, mirese tomwatar, mikarat nif tomwatar, myose mimiri, mirikan tomwatar. Ma ka myebas kabain yatak walyetar a nbal. 32 Nempa ka myose ngamone tomwatar, mikamis a kmi, ma ka mlyure mpane mir salar farlan ma Ratu nlure kmi fali dalmir lese myor Yesus ninr Ray Silai lo.