Paulus nkarya ber tomwatar ma to Yahudi sir
1 Wangur, Ratu nfatutu Ni dalam ngamone ber kit, mpa yakw dedesar ma kswampayang ber a kmi. Ma yakw ye kumin sel fali kufwibar Ibar Ngamone ber tomwatar ma to Yahudi kmi. 2 Ma kmi mdyengar lo nre, feti Ratu nfatutu Ni dalam ngamone ber yakw mpa nal karyae ber yakw ma kufwibar Ibar Ngamone ber a kmi. 3 Luryain e tomwatar to rafai Ratu Ni rerengyar a ne, nempa lere ye Ratu nafbotin ber yakw. Ma ngrie ne yakw kfwalyole tubun ber a kmi na surat ye lo. 4 Farlan mbyaca fengamone safe ma kurengi ne, keta mifai desar safe ma kwaul kal a ne. Iane Ratu Ni rerengyar ma tomwatar to rafai fuky, ma nafdiat na Yesus ninr Ray Silai. 5 Luryain e tomwatar to rafai Ratu Ni rerengayar a ne, nempa lere ye Ni Smwangtany nafbotin ber Ni mangsidkwar ma nabyar ma nfil sir a ne. 6 Ratu Ni rerengyar a ne farye: Tomwatar ma to Yahudi kmi, keta myonri berkat ma feleles farlan ma Ratu nyoding ber tomwat Yahudyar a ne, fali milele Ibar Ngamone. Ma keta miktem tomwat Yahudyar myeluk Ratu Ni tomwatar. Mpa keta myonri safe ma Ratu nyoding ber Ni tomwatar, fali dalmir lese myor Yesus ninr Ray Silai lo.
7 Ma Ratu nfil yakw ma kweluk Ni mangkaryae ma kufwibar Ibar Ngamone, fali Ni dalam ngamone ber yakw. Ma nal kuase ber yakw nbal nema boang nal ma kwarya. 8 Nof monuk Ratu Ni tomwatar, yakw ye ma to ubangw desar. Nempa Ratu nfatutu Ni dalam ngamone ber yakw, mpa nal karyae ye ber yakw ma kufwibar Ibar Ngamone ber tomwatar ma to Yahudi sir. Iane feti keta ronri berkat ma nlie nlengan ma to terik, nof Yesus ninr Ray Silai. 9 Ma nfil yakw a nbal ma kfwalyole ber tomwatar monuk feti felan farpe ma Ratu nafdiat safe ma nreng a ne. Luryain e Ratu nose langit ma saryamprene nempa I namudim safe ma nreng ber tomwatar a ne ngarkar rose ngarkar. 10 Iane feti smwangtar monuk ma rkuase ma rfarete na sorga ne, rafai feti Ratu Ni andaun ngamone ma nlie nlengan ma nose kabanir felnir mpane. Ma keta I nfatutu kabanir a ne ber sir, nalyole tomwatar ma dalmir lese ror Yesus ninr Ray Silai. 11 Ratu nose kabanir monuk nlarat safe ma nreng nof luryain a ne. Ma I nafdiat Ni rerengyar a ne nalyole Yesus ninr Ray Silai ma neluk ninr Mangnrure. 12 Ma lere ye kit to tamtaut ma takmat Ratu fali talele Yesus ninr Ray Silai ma dalminrar lese tor I. 13 Mpa wangur, yak ktwak ma ka kete dalmir suse noak ma mdyengar feti kwoman suse fali kmi. Fali suse ma kwoman a ne iane fen mir ngamone.
Paulus nsampayang ber tomwat Efesusar
14 Wangur ma to Yahudi kmi, Ratu nfatutu Ni dalam ngamone ber kmi lo, mpa kswatngur ma kswampayang ber Amninrar Ratu. 15 Ratu ye neluk Ame ber ninr dasdalmir monuk ma ramin surga ma saryamprene. 16 Yakw ktwak Ratu ma Ni berkat ma Ni kuase ma nlie nlengan a ne, ma weni nal Ni Smwangtany la nafkoran dalmir. 17 Yak ktwak Yesus ninr Ray Silai dedesar ma namin dalmir fali milele I. Ma ktwak a nbal ma ka mtyafal ma mkyamis Ratu ma mkyamis tomwat walyetar. Ma ka weni mir ankamis a ne farlan katutun ma wakrir raoli bab. 18 Yak ktwak ma miktem Ratu Ni tomwatar monuk bise ma mkyaul myal Ratu Ni ankamis ber a kmi ma nlie nlengan ma to terik. 19 Yak kpweang ma mkyaul myal Ratu Ni ankamis ma nlie nlengan a ne, boloka to bise ma mkyaul monuk. Iane nwayat ma ktwak ma Ratu nose ma mkyaul myal Ni ankamis terik ma mir adat a ne mbyalak I.