Lan Yesus ninr Ray Silai ma neluk dalamten malonri
1 Wangur mir kateman, ka dedesar ma mimpumpuki kmi fali dalmir lese myor Yesus ninr Mangnrure lo. Yak to kufelingat ma kufbotin safe ma luryain e kfwalak ber a kmi. Nema bise ma mijake kmi myof tomwatar ma raftutu anftutw lepuskwar a ne. 2 Ka mijake kmi myof tomwatar ma rfule kmi ror anftutw lepuskwar. Sir a ne nir adat farlan aswar. Ma rfalak feti tomwatar ka rsunat sir nema reluk Ratu Ni tomwatar. 3 Yak kfwalak farane fali na Ratu souny lury e kit ye ma rsunat kit nempa sir a ne tate. Ratu Smwangtany ma ntulung kit ma tsatngur ber Ratu ma teluk Ni tomwatar. Ma ntulung kit a nbal ma tdangin Yesus ninr Ray Silai na safe-safe monuk ma I nose ber kit a ne. Ma kit to talele sunat nre yayatrwar ma tomwatar rose rlarat nempa talele lan feti Ratu ma nfair kit nof ninr salar ma to nukun kit. 4 Yakw bise motak ma kulele yayatrwar ma tomwatar rose ne. Mpa farlan tomwatar rdaun feti Ratu nlangun sir fali rose rlarat yayatrwar a ne, ni botuan e yakw klwengan sir a nbal. 5 Noak ma ningw lerar walw e rsunat yakw. Yakw ye kof Israel ma kof suku Benyamin. Ma yakw ye tomwat Ibrani asli fali empung nusingw tomwat Ibrani sir. Ma yak klwarat desar tetetkar monuk ma empninrar nusninrar rnau ber kit a ne fali tomwat Farisi yakw. 6 Fali klwarat desar tetetkar ma luryain Ratu nal ber Musa ne nwayat ma kswiksa tomwatar ma ralele Yesus. Ma farlan tlarat tomwat Yahudyar nir yayatrwar e to tomwate fen lese bise ma nfasale yakw. 7 Luryain e kdwaun feti safe-safe ma kulele ne uban ber yakw, nempa lere ye to uban desar fali kulele lan Yesus ninr Ray Silai. 8 To lan iane nempa safe-safe monuk ma luryain e kdwaun feti uban lere ye to uban desar. Yak kufai botuan feti Yesus ninr Ray Silai ne ningw Mangnrure nbal, ma lan iane ma nlengan nof safe-safe monuk. Mpa kyebas monuk safe-safe ne fali kdwaun feti iane kamaknisar motak. Yak kose farane nema bise ma klwarat Yesus Ninr Ray Silai kor dalangw kateman, 9 ma kmworip dalam lese kor I. Ma Ratu to nafdiat yakw nof ningw salar fali klwarat tetetkar ma luryain e nal ber Musa ne, nempa nafdiat yakw fali kulele Yesus ninr Ray Silai. 10 Yak kpweang desar ma kufai Yesus ninr Ray Silai, ma kpweang ma konri Ratu Ni kuase na ningw momorip. Iane kuase ma Ratu nal ber Yesus la nafmorip a nbali I. Ma kpweang a nbal ma kwoman suse farlan ma I nkoman terik ma nmat. 11 Ma kulele feti Ratu keta nafmorip a nbali yak kof ningw mamate.
Ka dedesar ma tareke ma tose tlarat Yesus ninr Ray Silai Ni mpempeang
12 Soranyar mir kateman, yak to kfwalak feti yak kmworip a kbalak Yesus ninr Ray Silai ma to ningw sal e lo. Nempa dedesar ma kureke ma kmworip farlan I, fali nfil yak ma kweluk Ni tomwate lo. 13 Ni botuan e dedesar ma kureke ma kose monuk kabanir a ne. Ma lan lese ma yak kdwaun, iane feti kyebas monuk safe-safe ma kose luryain a ne, nema bise ma kmworip farlan Yesus. 14 Yak dedesar ma kureke ma kmworip farlan Yesus, iane farlan ma klwarat pertandingan falae. Keta kufla kureke ma kmwenang nema konri hadiah. Iane feti kmworip dedesar kor Ratu, fali dalangw lese kor Yesus ninr Ray Silai lo. 15 Mpa kit monuk ma tamkoran ma talele Yesus ye ka ninr andaun lese ma tlarat safe ma kfwalak a ne. Ma farlan tomwatar sa nof kit ye ma ni andaun to feleles nor safe ma kfwalak a ne keta Ratu koko I nose ma nkaul nal. 16 Boloka ninr andaun to feleles, lan ye ma uban ber kit: ka dedesar ma tmorip a tlarat safe ma Ratu nfatutu ber kit nof luryain a ne.
Snyurtar ber soranyar na Filipi
17 Wangur mir kateman, ka mlyarat ningw wewelmpampane. Ma ka msyalan tomwatar ma nir momorip farlan kam a nbal ma myose mlyarat. 18 Yak kfwalak lain yadin ber a kmi lo. Ma lere ye ktwasing ma kfwalak ber a kmi a nbal feti tomwatar yadin ramsoal Yesus ninr Ray Silai ma nmat na katutun sangwalu. 19 Tomwatar ma nir momorip farane keta famudi e Ratu nukun sir monuk terik ma omp sir, fali rmorip a rlarat lan nir makeus. Ma rafdas sir na safe kabain ma rose, safo kabanir a ne la rafmweat a rbali sir fali rdaun lan ma rose kabain saryamprenar. 20 Nempa kete tose tbalak sir fali kit ye tof surga ma Ratu Ni tomwatar ber kit. Ma dedesar ma tdaf ninr Rai Mangtebus ma keta nma nof surga, I a ne Yesus ninr Ray Silai. 21 Kit ninr teninrar ye rmafun ma bise ma rmat. Nempa noak ma Yesus ninr Ray Silai nma nbali saryamprene, keta I nose ma teninrar ye ramkoran ma to bise ma rmat farlan I tenany. Ma I bise ma nose safe-safe monuk ma rlarat Ni faretar ma rsatngur ber I, fali Ni kuase nlengan nof kuasar monuk.