Paulus ni surat ber soranyar na Kolose
Salam
1 Ye surat nof yakw Paulus ma waninrar Timotius. Yak kweluk Yesus ninr Ray Silai Ni mangsiduk klwarat Ratu Ni mpempeang. 2 Yak kurengi surat ye ber wangur a kmi na kote Kolose, ma myeluk Ratu Ni tomwatar, ma dedesar ma mlyarat Yesus ninr Ray Silai. Yak ktwak ma weni Amninrar Ratu nfatutu Ni dalam ngamone, ma nal maline ber a kmi.
Paulus nsampayang ma nose alang ber Ratu
3 Noak ma kam msampayang ber a kmi, kam dedesar ma mose alang ber Ratu. Ratu ye, Yesus ninr Mangnrure Amany ma I a ne ninr Ray Silai nbal. 4 Kam mose alang ber Ratu fali kam mdengar feti kmi dedesar ma milele Yesus ninr Ray Silai ma mkyamis Ratu Ni tomwatar monuk. 5 Kmi myose farane fali milele Ratu na kabain ngamonar ma nau ber a kmi na surga. Kmi mifai ngrie ne fali luryain e mdyengar ibar ma botuan lo, iane Ibar Ngamone. 6 Ibar Ngamone ma mdyengar a ne nsor monuk saryamprene. Ma ibar a ne nose ma tomwatar rafbweberi rbali nir momorip. Iane farlan kmi a nbal ma mifbweberi mbyali mir momorip noak ma mdyengar Ibar Ngamone, ma mkyaul myal botuan Ratu Ni dalam ngamone. 7 Kmi mifai monuk kabanir a ne nof tbwarmyamar Epafras, ma mkamis i a ne. I ye Yesus ninr Ray Silai Ni mangkaryae ma nalarat liry ber Ratu, ma nkarya la ntulung a kmi. 8 I nafbotin ber kam a nbal feti Ratu Smwangtany Ni kuase nose ma mikamis a kmi.
9 Iane nwayat ma kam dedesar msampayang ber a kmi noak ma mdengar ibar na kmi. Kam mtak Ratu nema Ni Smwangtany nal anfai silai ber a kmi, ma nose ma mkyaul myal safe-safe monuk ma Ratu npeang. 10 Nema mir momorip a ne mlyarat Ratu Ni mpempeang ma mifsenange dalamy na safe kabain. Ma dedesar ma myose kabain ngamonar, ma mtyafal ma mifai Ratu. 11 Kam mtak a nbal ma Ratu nal Ni kuase ma nlie nlengan a ne la nafkoran a kmi, nema noak ma mkyoman suse, dedesar ma msyabar ma bomir myal ma mibare. 12 Kam msyampayang a nbal nema kmi dedesar ma myose alang ber Amninrar Ratu myor dalmir senange. Fali I nfil a kmi lo nema bise ma myonri safe ma nau ber Ni tomwatar monuk, na Ni ain farete ma idak ne. 13 I nalin kit nof makrokap dalam, iane smwangat yatkar nir ulun ni kuase. Ma nor kit far Anaky ma nkamis I a ne, Ni ain farete. 14 Fali Anaky a ne nmat la nlitan kit nof ninr salar mpa Ratu to nukun kit.
Kit ninr Ray Silai ye silai I nlengan nof safe-safe monuk
15 Tomwatar to bise ma rsalan Ratu, nempa nof ma rsalan kit ninr Ray Silai Ni adat, sir bise ma rafai Ratu fali Nir adat feleles. Noak ma saryamprene to namin a fuky e Yesus ninr Ray Silai ye namin lo. Ma silai I nlengan nof safe-safe monuk ma Ratu nose ne. 16 Fali ninr Ray Silai nwayat ma Ratu nose safe-safe monuk na surga ma na saryamprene, safe-safe monuk ma tomwatar rsalan ma to rsalan. Ma Ratu nose nbal ma smwangtar monuk nir kuase ma bise ma rfarete. Ratu nose safe-safe monuk a ne fali ninr Ray Silai, nema safe-safe monuk ma I nose ne rdangin I. 17 Noak ma safe-safe monuk to ramin a fuky e, kit ninr Ray Silai namin lo. Ma I naftoran safe-safe monuk ne ma ramin mpane anir nor Ni kuase. 18 Kit ninr Ray Silai ye farlan ulun ma Ni tomwatar e farlan tenany. I nfarete Ni tomwatar farlan ulun ma nfarete tenany. I ye ma nal momorip ber Ni tomwatar fali Ratu nafmorip I baluan nof mangmwatar, nema lan I ma Ni kuase nlengan nof safe-safe monuk. 19 Fali Ratu npeang ma namtoran narwayan Anaky Yesus, ninr Ray Silai ne, nema safe-safe monuk ma ramin I a ne, ramin monuk Anaky a nbal. 20 Ma Ratu ntetak ma nal Anaky nema safe-safe monuk ma ramin saryamprene ma surga rangamon a rbali ror I. Fali Anaky ma nmat ma darany ma ntarbui na katutun sangwalu ne nose ma safe-safe monuk ne rangamon a rbali ror Ratu.
21 Luryain e kmi mitliur Ratu ma mkyedan I a nbal fali mdyaun lan ma myose kabain yatkar. 22 Nempa lere ye Ratu nose ma mingamon a mbyali myor I nalyole Anaky Ni mamate. Ratu nose farane nema myorip e minglerap, ma tomwatar to bise ma rfasale kmi na Ratu souny lury. 23 Mpa Wangur, ka dedesar ma dalmir a ramkoran ma milele Ratu, ma kete myinrang ma tomwatar rfule kmi. Ma ka dedesar ma milele safe ma Ratu nyoding na Ibar Ngamone ma rafwibar ber a kmi a ne. Ibar a ne nsor monuk ber tomwatar na saryamprene. Ma yakw ye Paulus, yakw a nbal e kweluk Ratu Ni mangkaryae ma kufwibar ibar a ne ber tomwatar.
Paulus nafbotin ni karyayar noak ma nafwibar Ibar Ngamone
24 Boloka lere ye kwoman suse nempa yak kswenang resi fali iane fen mir ngamone. Ma yak kwoman suse farye nema bise ma kubare suse ma feleles farlan Yesus ninr Ray Silai nabare ber Ni soranyar a ne, iane I tenany. 25 Ratu nsiduk yakw ma kweluk mangkaryae ber Ni soranyar. Ma I nal karyayar ne ber yakw nema bise ma kufwibar Ni ngribatnir monuk ber a kmi. 26 Ratu namudim ibar a ne ngarkar rose ngarkar ma arar rose arar. Nempa lere ye I nafbotin ibar a ne ber Ni tomwatar monuk. 27 Ratu npeang ma Ni tomwatar rafai feti ibar ma luryain namudim a ne ibar ma nangafel resi. Ma ibar a ne lere ye I nafbotin ber tomwatar ma to Yahudi kmi. Ibar a ne feti Yesus ninr Ray Silai namin dalmir, iane nfatutu desar feti keta myorip dedesar myor Ratu na ain ngaidak, iane surga. 28 Yesus ninr Ray Silai ye ma kam mafwibar ber tomwatar monuk. Ma kam msurat ma maftutu sir monuk a nbal mor anfai silai nof Ratu. Kam mose farane nema tomwatar rafai botuan Ratu, ma rose rlarat Ni mpempeang fali dalmir lese ror ninr Ray Silai. 29 Iane nwayat ma kwarya ma kmwat a klwai desar klwarat fakoran ma ninr Ray Silai nal ber yakw. Ma yakw bise ma kose safe-safe monuk ye fali Ni kuase ma silai ne ma nafkoran yakw.