1 Wangur, yakw kpweang ma kmi mifai feti felan farpe ma kwarya ma kmwat a klwai desar ber a kmi, ma ber tomwatar ma ralele Yesus ma ramin Laodikia, ma ber tomwatar monuk ma to rafai yakw fengamone fuky. 2 Yakw kose farane nema kmi monuk dalmir a ramkoran, ma yoyouk lese fali mikamis a kmi. Iane nwayat ma kmi bise ma mkyaul myal ma mifai botuan safe ma luryain e Ratu namudim a ne, iane safe-safe monuk na Yesus ninr Ray Silai. 3 Ratu Ni andaun ngamone ma Ni anfai silai ma luryain e tomwatar to rafai ne, lere ye bise ma tkaul tal fali Yesus ninr Ray Silai nafbotin ber kit lo. 4 Yakw kfwalak ngriar monuk ye ber a kmi nema tomwatar kete rfule kmi ror nir ngribatin ngafelar. 5 Boloka yakw to kor a kmi nempa dedesar ma kunremi kmi. Ma kswenang resi fali kdwengar feti kmi dedesar ma dalmir lese ma mimkoran ma milele Yesus ninr Ray Silai.
Momorip beberi tor Yesus ninr Ray Silai
6 Wangur, kmi myoding feti Yesus ninr Ray Silai ne mir Mangnrure, mpa ka mir wewelmpampane feleles farlan tomwatar ma dalmir lese ror I. 7 Ma mireke ma mimkoran ma milele ninr Ray Silai, farlan katutun wakrir ma romat tenany ma namkoran. Ma mtyafal ma milele ninr Ray Silai mlyarat safe ma raftutu ber a kmi a ne. Ma dedesar ma myose alang ber Ratu.
8 Ka mijake kmi nema tomwatar ketnir kete rfule kmi ma mlyarat nir anftutw lepuskwar, fali anftutwar a ne to ubnir sasaf ma rwayat ma kmi mpayan sale. Ma nir anftutuwar a ne nlarat lan empnirnusnir nir wewelmpampane ma smwangtar ma rkuase saryamprenar, nempa to nlarat ninr Ray Silai. 9 Yak kfwalak farane fali noak ma ninr Ray Silai neluk tomwate na saryamprene, Ratu namtoran narwayan I, mpa Ni adat, Ni kuase ma Ni safe-safe monuk ramin ninr Ray Silai nbal.
10 Lan ninr Ray Silai ye ma Ni kuase nlengan nof smwangtar monuk ma rkuase ma rfarete saryamprene, mpa farlan dalmir lese myor I keta safe-safe ma ramin I, ramin mir momorip a nbal.
11 Ma fali dalmir lese myor ninr Ray Silai mpa kmi bise ma mfyalak feti rsunat a kmi lo. Ma sunat ye to far ma tomwatar rose nempa sunat ma nor ninr Ray Silai Ni kuase. Iane feti I nalin kalin makeus yatkar nof a kmi. 12 Fali noak ma radiris kmi ror ninr Ray Silai ngarany iane farlan ma myat ma rafonak a kmi. Ma noak ma radiris a kmi ror ninr Ray Silai ngarany, iane farlan a nbal ma rafmorip a rbali kmi ror I. Fali kmi milele Ratu Ni kuase ma nafmorip a nbali I nof mangmwatar.
13 Luryain e kmi myorip nempa smwangtimir rmat lo. Kmi myorip farane fali myose salar, ma to Yahudi kmi mpa to rsunat a kmi rlarat tetetkar ma luryain e Ratu nal ber Musa. Boloka luryain smwangtimir rmat lo fali mir salar a ne, nempa lere ye Ratu nafmorip a nbali kmi myor ninr Ray Silai, fali Ratu nlure mir salar monuk lo. 14 Luryain e rarengi na tetetkar ma Ratu nal ber Musa feti ka Ratu nukun kit fali tlangas Ni tetetkar lo. Nempa lere ye Ratu to nukun kit lo nof safe kabain ma tlangas a ne. Ratu nose farane nalyole ninr Ray Silai Ni mamate na katutun sangwalu. 15 Noak ma rpaku ninr Ray Silai na katutun sangwalu, I nafufu monuk smwangtar ma rkuase ma rfarete ne, ma nose ma to nir kuase sasaf lo. I nose farane la nfatutu desar ber tomwatar monuk feti I nmenang lo.
Snyurtar nema kete tlarat anftutw saryamprenar
16 Mpa Wangur, ka kete myinrang ma tomwatar rfasale kmi fali to mlyarat nir yayatrwar na enu tnyame, nre to myose Yahudyar nir ler silayar farlan ler silayar na mpane bulan beberi, nre na Ler Sanari. 17 Fali Yahudyar nir yayatrwar monuk a ne, farlan ninun ma nose ma sir bise ranremi na safe ma rdaf dedesar ma keta nma ne. Ma safe ma rdaf dedesar a ne nma lo, iane ninr Ray Silai. 18 Ma ka kete myinrang ma tomwatar rfasale kmi fali to mlyarat safe ma rose ne. Fali farlan mlyarat sir, keta to myonri sewe ma Ratu nyoding ber a kmi a ne. Tomwatar a ne rose lole ma to rafdas sir ma rsatngur ber malaektar, safo rafdas sir ma rdaun feti lan sir ma silai fali rsalan trufar lo. Sir a ne ranriak lan ma tomwatar rdangin sir ror nir andaun saryamprenar. 19 Sir a ne to ralele ninr Ray Silai Ni anftutwar lo. Safo I ye neluk ulun ber Ni tomwatar monuk, ma Ni tomwatar a ne farlan I tenany. Kit ninr Ray Silai ye ulun ma nal fakoran ber Ni tomwatar, nema dalmir lese ma ramkoran. Iane nwayat ma rtafal ma yadin sir rlarat Ratu Ni mpempeang. Ma Ratu Ni tomwatar a ne bise ma dalmir lese ma ramkoran fali sir farlan matnir, tangnir, emnir ma safe-safe monuk ma ramin tenan, ma rabut sir ma lese la rafkoran i.
Farlan talele ninr Ray Silai iane farlan tmat ma tmorip a tbali tor I
20 Wangur, kmi ma milele ninr Ray Silai iane farlan myat myor I, ma to mlyarat smwangtar ma rkuase saryamprenar. Mpa safema lolone mlyarat yayatur saryamprenar? Fali iane feleles farlan tomwatar ma yayatrwar lolone rkete sir. 21 Keta nof sir a ne rma ma rfalak nir yayatrwar ber a kmi feti, ”Kete misyol kabanir ye,” “Kete myanak tnyamar a ne,” ma “Kete myomat kabanir ye.” 22 Yayatrwar ma raftutu ne tomwatar rose rlarat nir andanwar motak. Sir ratanuk na kabanir monuk ma ubnir to dodo. Yayatrwar a ne farlan tnyamar ma betno tane lain lese e omp lo. 23 Sir ma rose rlarat yayatrwar a ne rdaun feti iane nangafel. Ma tomwatar rsalan sir e, rngabo desar ma rsampayang. Sir rsatngur ber malaektar, rose lole ma rtomu sir, ma rlarat a nbal yayatrwar ma rsiksa rbali tenir. Ni botuan e yayatrwar monuk a ne to ubnir sasaf fali yayatrwar a ne to bise nose ma tomwatar rtayan nir makeus yatkar.