Paulus ni surat luryain ber soranyar na Tesalonika
Ngribatin luryanir
Paulus ni surat luryain ber soranyar na Tesalonika.
Tesalonika ye ibu kote na propinsi Makedonia na kerajaan Roma. Na kote ne Paulus, Silas ma Timotius rafburat soranyar na iane. Noak a ne sir rpan a rlole Eropa ma rafwibar Ibar Ngamone na Yesus. Lama rafburat monuk soranyar a ne, tomwat Yahudyar ma ramin kote ne ranriak a ngri ror Paulus a ka. Sir ribut Paulus a ka ma rbie rof kote Tasalonika, nwayat ma Paulus a ka rbie rof iane (17:1-10). Noak ma Timotius natungan a nbali nor Paulus a ka na kote Atena, Pauluss nsiduk Timotius ma nbali i ma nsalan tomwatar na tesalonika ne feti sir farpe ma Paulus e nti kote korintus. Lama nait kote Korintus, Timotius nonr ibar ber Paulus na tomwatar na Tesalonika (3:1-5). Na kote Korintus ye Paulus narengi surat luryain ye ber tomwatar na Tesalonika.
Paulus narengi surat ye fali tomwatar na iane betno ralele Yesus. Na noak a ne nbal Paulus a ka rbie rof kote Tesalonika, mpa to lety ber Paulus ma naftutu sir fen ngamone.
Na surat dalam ye, Paulus nafbotin ber tomwatar ma betno ralele Yesus na Tesalonika feti dalamy nsenang resi fali ralele ma dedesar ma rlarat Yesus ninr Mangnrure, boloka tomwatar rsiksa sir ma rose suse sir. I naftutu sir feti tomwatar ma ralele Yesus ka rmorip felan farpe. I naftutu sir a nbal na safe ma keta diat tomwatar ma ralele Yesus ma rmat lo noak ma Yesus ninr Ray Silai nma nbali saryamprene.
Surat isin farye:
1:1Salam
1:2-10 Soranyar na Tesalonika rfatutu nir wewelmpampan ngamonar ma dedesar ma ralele Yesus
2:1-12 Paulus ni karyayar na Tesalonika
2:13-16 Soranyar na Tesalonika rose ma Paulus a ka rsenang resi
2:17-20 Paulus npeang ma ntungan nor soranyar na Tesalonika
3:1-13 Paulus radu Silas rluan Timotius ma nti Tesalonika
4:1-12 Tafsenange Ratu Dalam na momorip
4:13-18 Yesus kit nir Mangnrure ne nma nbali saryamprene
5:1-11Ka mijak fengamone terik ma Yesus ninr Mangnrure nma nbali saryamprene
5:12-22 Paulus nsurat soranyar na Tesalonika
5:23-28 Salam