Ka mijak fengamone terik ma Yesus ninr Mangnrure ne nma nbali saryamprene
1 Wangur mir kateman! Na surat dalam ye kam to mperlu ma marengi feti bengfir e Yesus ninr Mangnrure ne nma. 2 Fali koko kmi mifai lo feti ninr Mangnrure ne nma e nfetryat farlan mangamnange nma na nronram. 3 Na lere ne tomwatar rdaun feti, saryamprene ye nangamon motak. Nempa metryat e, Ratu keta nukun sir ma to ralele ne, ma keta to tomwate fen lese ma bise nliak i nof susar ne. Iane farlan bate ma nose ma namtoranbab. 4 Nempa wangur mir kateman! Noak ma Yesus nma e keta kmi to metryat fali misusan dalmir lo. Ma kmi to mbyalak tomwatar ma rarwa na nronram ma metryat noak ma mangamnange nma ma namnang sir. 5 Farlan kmi myose kabain ngamonar mlyarat Ratu Ni mpempeang la mifsenange dalamy iane farlan tomwatar ma rmorip a na ngaodir. Ma ni botuan e kit ye teluk Ratu Ni tomwatar mpa to tose kabain yatkar farlan tomwatar ma rmorip a na makrokap. 6 Mpa ka tfenai ma tajak dedesar ma kete farlan tomwatar ma rarwa onir. 7 Fali na nroram e tomwatar ranabuk ma rarwa. 8 Nempa kit ye ma tmorip a na ngaodir mpa ka tose kabain ngamonar. Ma ka talele dedesar Yesus ninr Mangnrure ma takamis kit. Farlan tose farane kit farlan tentara ma najake tenany ma keta to sasaf diat i noak ma naprang. Iane feti keta to sasaf diat kit fali Ratu nfair kit nof ninr salar. 9 Fali Ratu to nfil kit ma nukun kit, nempa npeang ma nfair kit tof ninr salar nalyole nof ma talele Yesus kit ninr Ray Silai. 10 Yesus ye ma nmat la nlitan kit mpa boloka tmat nre tmorip keta dedesar ma tor I noak ma nbali I a nma saryamprene. 11 Mpa ka misurat a kmi ma sa nafkoran sa farlan ma myose ye lo.
Paulus nsurat soranyar na Tesalonika
12 Wangur mir kateman! Kam mtak ma ka myalang tomwatar ma reluk mangnrure ber a kmi. Sir ye ma rkarya ma rmat a rlai desar ber a kmi ma rsurat a kmi fali miktem dalmir lese myor Yesus ninr Mangnrure lo. 13 Mpa ka myalang resi sir ma mkyamis sir myor dalmir kateman fali rkarya la rtulung a kmi. Ma myorip e kete mibangal ma mingamon motak.
14 Wangur kam mtak a nbal, ma mfyalak ber tomwatar ma rsisrat a ne ma ka rkarya, miftesi tomwatar ma dalmir e to ramkoran, ma mifkoran tomwatar ma ralele Ratu ror dalmir tubun motak a ne, ma ka msyabar ber tomwatar monuk. 15 Ka mijake ma kete mbyalas yatak ber tomwate ma nose yatak a kmi, ma ka dedesar ma myose ngamone ber kmi mpane ma ber tomwatar monuk.
16 Ka dedesar ma mimpumpuki kmi, 17 ma msyampayang dedesar. 18 Ma ka myose alang ber Ratu na safe safe monuk. Myose farane iane ma Ratu npeang fali dalmir lese myor Yesus ninr Ray silai lo.
19 Farlan Ratu Smwangtany nkuase tomwatar sa ma nafbotin Ni snyurat ber tomwatar ma ralele Yesus, ka kete miftery i. Farlan myose farane iane feti myose mteri Ratu Smwangtany Ni karyayar, 20 mpa farlan tomwatar sa nafbotin snyurat nof Ratu kete miboti feti nlepusuk. 21 Nempa ka msyalan fengamone safe- safe ma rafbotin a ne fuky feti botuan nof Ratu nre tate. Farlan botuan nof Ratu e ka myose mlyarat. 22 Ma ka mkyatar a kmi myof kabain yatkar.
Salam
23 Wangur mir kateman! Ka weni Ratu nal maline ber a kmi ma naflerap monuk dalmir. Ma ka weni Ratu ntulung a kmi nema mir andaun ngamone, myose kabain ngamonar ma to mir makeus yatak, nema noak ma Yesus ninr Ray Silai ne nma, to tomwate fen lese ma bise nfasale kmi. 24 Botuan e Ratu nfil a kmi lo ma myeluk Ni tomwatar ma myose mlyarat safe ma nfalak a ne fali la nafdiat safe ma nyoding a ne. 25 Wangur mir kateman, msyampayang ber kam a nbal.
26 Ma myose salam ber soranyar monuk na iane ma miomat lim myor sir la mfyatutu feti dalmir lese.
27 Na Yesus souny lury yakw ktwak desar kof a kmi ma ka mbyaca surat ye ber soranyar monuk.
28 Ka weni Yesus ninr Ray Silai ne nfatutu Ni dalam ngamone ber a kmi, ma nor kmi monuk. Nater ye.
Salam nof yakw,
Paulus.