Tafsenange Ratu dalamy na ninr momorip
1-2 Wangur mir kateman! Kam maftutu kmi lo ma myorip ma mifsenange Ratu dalamy. Ma safe ma maftutu ber a kmi a ne, iane nof Yesus ninr Mangnrure. Botuan feti kmi myose mlyarat lo, nempa kam mtak desar mof a kmi ma mtyafal ma myose farane nbal fali taktem a talele Yesus ninr Mangnrure. 3 Ratu npeang ma myorip e minglerap, iane feti kete minronr. 4 Ma ber merwanar e ka mtyayan mir makeus ma kete minronr. Ma myalang batar ma kete myose bolar sir. 5 Ma kete mimkeus batar far tomwatar ma to rafai Ratu. 6 Na ngrie ye kete myose bolar mir soranyar ma ka mtyayan mir makeus nema kete myayat sawnir ma milalin myor sir. Luryain e kam mfalak dedesar ber a kmi lo feti keta Yesus kit ninr Mangnrure ne nukun tomwatar ma rose farane. 7 Ratu nfil kit nema na ninr momorip e kete talalin nempa ka tanglerap. 8 Ise ma to nlarat safe ma kam mfalak ye iane to namsoal kam, nempa namsoal Ratu ma nal Ni Smwangtany ber i a ne.
9 Yakw to kpwerlu ma kurengi feti felan farpe ma mikamis a kmi fali Ratu koko I a naftutu lo ma mikamis a kmi. 10 Botuan feti kmi mfyatutu mir ankamis ber wangur ma ralele Yesus na provinsi Makedonia ni kateman. Nempa kam mtak desar ma mtyafal ma mkyamis sir. 11 Ka myorip e mingamon myor tomwatar, kete myurus tomwatar nir ngriar, ma ka mngyabo ma mkyarya. Kam mfalak ngriar monuk a ne ber a kmi lo. 12 Kmi myose farane, nema tomwatar ma to ralele Yesus a ne ralang a kmi fali to milele tomwatar ma ral ber a kmi.
Yesus kit ninr Mangnrure ne nma nbali saryamprene
13 Wangur mir kateman! Kam mpeang ma mafbotin ber a kmi feti tomwatar ma ralele Yesus ma rmat a ne keta sir farpe, nema kete dalmir suse farlan tomwatar ma to ralele Yesus. 14 Fali talele feti Yesus nmat ma nmorip a nbali lo, mpa ka talele nbal feti keta Ratu nafmorip a nbali tomwatar ma ralele Yesus ma rmat a ne, ma rmorip ror I noak ma nma nbali. 15 Kam mpeang a nbal ma mafbotin ber a kmi safe ma Yesus ninr Mangnrure ne nfalak: noak ma I nma, kit ma lolone tmorip ye keta takmat I nempa sir ma rmat a ne keta rbalun rof kit. 16 Noak ma Yesus ninr Mangnrure ne nose ma ntompur e keta nfarete tomwatar ma ralele Yesus ma rmat a ne rmorip baluan. Ma keta malaektar nir ulun nfalere, ma Ratu Ni tburi delak. 17 Mpene kit ma tmorip ye keta Ratu nfair kit. Ma taktem mangmwatar ma rmorip a rbali ne tkakal ninr Mangnrure na langit. Ntabw nof a ne keta kit tor I dedesar. 18 Mpe myal ngribatnir ye la sa nafkoran sa.