Paulus radu Silas rluan Timoteus ma nti Tesalonika
1-4 Wangur mir kateman! Boloka tomwatar rsil a rbabal kmi e kete mitliur Yesus, fali koko kmi a mifai lo feti kit monuk ma talele I a ne ka tkoman suse. Noak ma lolone taktem e kam mfalak monuk ber a kmi lo feti keta tkoman suse. Mpa lere ye suse ne diat a kmi far ma mfalak a ne. Iane nwayat ma kam mpeang resi ma matungan mor a kmi, mpa kam mdaun feti ni ngafele e madu Silas mamin Atena, ma msiduk Timoteus ma nti nsalan a kmi na Tesalonika. Timoteus ye ma maktem a mkarya ma mafwibar Ibar Ngamone na Yesus ninr Ray Silai. Ma kam msiduk i ber a kmi nema nafkoran dalmir ma nsurat a kmi ma dedesar milele Yesus. 5 Yakw kpweang resi ma kufai feti kmi lolone milele Yesus nre tate mpa kusnyalik ma kswiduk Timoteus ber a kmi. Kose farane fali dalangw suse feti nre kete smwangat yatkar nir ulun nateman a kmi lo nwayat ma mamy karyayar a ne to ubany sasaf.
6 Nempa lere ye Timoteus nbali i a nma lo ma nonr ibar ma nose ma dalmyamar rsenang. I nfalak feti kmi dedesar ma milele Yesus ma mikamis a kmi. Ma nfalak a nbal feti noak ma minremi kam e dalmir a rsenang resi, ma mpyeang ma mitungan myor kam feleles farlan kam a nbal. 7 Mpe wangur mir kateman, boloka tomwatar rtean kam nwayat ma mkoman suse desar na ye nempa dalmyamar ramkoran fali kam mdengar ibar na kmi feti dedesar ma milele Yesus. 8 Ma lere ye kam morip mor maline lan feti kmi dedesar ma milele Yesus ninr Mangnrure. 9 Kam mose alang desar ber Ratu fali kmi dedesar ma milele Yesus nwayat ma kam msenang resi. 10 Lere nroram kam msampayang mor dalmyamar kateman ma mtak Ratu ma tatungan nema kam bise ma mafkoran kmi ma mtyafal ma milele Yesus.
11 Kam mtak Amninrar Ratu ma Yesus kit ninr Mangnrure ma nal dalamten ngamonar sa ma tatungan a tbali. 12 Kam mtak a nbal ma Yesus ninr Mangnrure ne ntafal ma nose ma mikamis a kmi, ma mkyamis tomwat walyetar a nbal farlan ma mkamis a kmi. 13 Kam mtak I ma nafkoran dalmir nema minglerap ma to mir sal na Amninrar Ratu souny lury, noak ma Yesus kit ninr Mangnrure nma nor Ni malaektar.