Paulus ni karyayar na Tesalonika
1 Wangur mir kateman! Kmi mifai feti kam mamy mamae noak a ne ubany ber a kmi. 2 Kmi mifai feti noak ma mamin Filipi ne, tomwatar rsil a rbabal kam ma rarikan kam. Ma mait Tesalonika ye sir rose kam farane nbal. Boloka farane ninr Ratu nafkoran dalmyamar nwayat ma mbarany ma mafwibar Ibar Ngamone nof Ratu ber a kmi. 3 Fali safe-safe ma kam maftutu ber kmi a ne botuan ma to mlepusuk nre to mamy andaun yatkar la manriak doit. 4 Ratu nfil kam ma mafwibar Ibar Ngamone. Ma nsalan dalmyamar lo mpa nafai feti safe-safe ma mfalak a ne to mose ma mafsenange tomwatar nempa mose ma mafsenange I. 5 Kmi mifai lo feti kam to matanuk la mfas a kmi ma to mamy andaun ma manriak doit mof a kmi, ma Ratu nsalan dalmyamar a nbal. 6 Ni botuan e tomwatar ka ralang kam fali kam ye Yesus ninr Ray Silai Ni mangsidkwar. Boloka farane kam to manriak ma kmi nre tomwat walyetar ralang kam. 7 Ma noak ma mor a kmi a ne, kam malas ber a kmi. Iane farlan batmakenar sa ma npiare angkir. 8 Ma mamy ankamis ber a kmi a ne nwayat ma to mafwibar lan Ibar Ngamone ber a kmi, nempa mpeang ma morip mor a kmi ma mose safe-safe motak la mtulung a kmi. 9 Wangur mir kateman! Kmi lolone minremi nre! Noak ma mor a kmi e mkarya ma mat a mlai desar. Fali kam to mpeang ma mose suse kmi mpa boloka mafwibar Ibar Ngamone nempa lere nronram e mkarya nbal. 10 Wangur mir kateman ma milele Yesus, noak ma mor a kmi e koko kmi a msyalan feti mamy momorip e farpe. Ma Ratu nsalan a nbal lo feti mamy momorip mamlonry, manglerap ma kam to mose kabanir ma tomwatar bise rfasale kam. 11-12 Kmi mifai nbal feti kam msurat a kmi ma mafkoran dalmir. Iane farlan makenar sa ma nsurat angkir. Ma kam mtak desar mof a kmi nema myorip a mlyarat Ratu Ni mpempeang. Fali I nfil a kmi lo ma myeluk Ni tomwatar ma keta nrure kmi na are ma nma ne nema myorip myor I.
Soranyar na Tesalonika rose ma Paulus a ka rsenang resi
13 Wangur mir kateman! Kam dedesar ma mose alang ber Ratu nbal fali noak ma kam mafwibar ibar nof Ratu ber a kmi, kmi mlyangun ibar a ne farlan ma Ratu natanuk, ma to mdyaun feti iane tomwatar motak ma ratanuk. Ma ni botuan e Ratu Ni ngribatnir a ne ma nafbeberi kmi ma milele Yesus ne mir momorip. 14 Wangur, safe-safe ma kmi mkyoman, iane farlan Ratu Ni soranyar ma ramin Yudea ma ralele Yesus ninr Ray Silai ne. Fali kmi mkyoman suse myof mir nuse feleles farlan soranyar ma ramin Yudea rkoman suse nbal rof nir tomwat Yahudyar. 15 Tomwat Yahudyar a ne ma rfen Yesus. Sir feleles farlan empnir nusnir ma rfen nabyar luryain a ne. Ma lere ye rsil a rbabal kam a nbal. Sir ye ma dedesar e rbangal Ratu ma rkedan tomwatar. 16 Sir rose rteri kam a nbal ma mafwibar Ibar Ngamone ber tomwatar ma to Yahudi sir nema Ratu kete nfair sir rof nir salar. Mpe tomwat Yahudyar a ne nir salar rtafal ma yadin mpa ni tewat lo ma Ratu nukun sir.
Paulus npeang ma natungan nor soranyar na Tesalonika
17 Wangur mir kateman! Boloka taktem a takleti far dodo nempa kam to mamlufe kmi. Ma manremi desar a kmi mpa dedesar manriak dalamtene ma mti makmat a kmi. 18 Kam mpeang ma mti msalan a kmi. Ma yakw e kose ma ktwi lain fir ye lo nempa smwangat yatkar nir ulun dedesar ma nose nteri kam. 19 Kam mpeang desar ma mti msalan a kmi, fali kmi ye ma keta mpyote somyamar noak ma Yesus ninr Mangnrure nma. Kam mafai feti kmi dedesar ma milele Ratu ma iane nwayat ma kam msenang resi ma malele desar Yesus Ni mamae. 20 Botuan feti lere ye kmi ye ma mpyote somyamar ma myose ma kam msenang resi.