1 Ber tomwatar ma reluk bos! Ka myose ngamone mir mangkaryayar ma ka mimlonr ber sir. Ma ka minremi feti mir bos namin surga nbal.
Snyurat walyetar ber soranyar
2 Soranyar, kete msyisrat ma msyampayang, ma myose alang ber Ratu. 3 Ma ktwak ma msampayang ber kam a nbal nema Ratu nal lety ber kam ma bise mafwibar Ibar Ngamone na ninr Ray Silai ma luryain e tomwatar to rafai. Iane nwayat ma lere ye yakw kumin sel. 4 Mpa msyampayang dedesar ber yakw ma bise ma kfwalyole ibar a ne fengafele ber tomwatar nema bise ma rkaul ral. Fali iane ma Ratu npeang ma yak kose.
5 Noak ma miktem tomwatar ma to ralele Yesus ne, kete mifelingat ma mfyatutu mir momorip ngamone ber sir nema ralele ibar na ninr Ray Silai. Ma ka myose farane lerar monuk. 6 Ma noak ma mitanuk myor sir e, ka myal ngribatin ngamonar nema rpeang ma rdengar mir tnyangkwar a ne. Farlan myose farane keta bise ma mbyali nir ngengentar a ne fengamone.
Penutup ma salam
7 Waninrar Tikhikus ma tkamis i a ne, keta nafbotin safe safe monuk na yakw ber a kmi. I ye ninr Ray Silai Ni mangkaryae ma nalarat liry, ma maktem a mkarya. 8 Yakw kwluan i ber a kmi ma nafbotin ibar na kam ma nafkoran dalmir a nbal. 9 Ma keta klwuan i ma radu Onesimus ma tkamis i a ne, rti rakmat a kmi. Sir keta rafbotin ber a kmi na kabanir ma diat kam a na ye. Onesimus ye waninrar ma nalele Ratu, nalarat liry ma pnue lese nor a kmi.
10 Aristarkhus ma namin sel nor yakw ne nkirim salam ber a kmi. Ma Markus nkirim salam ber a kmi a nbal. Markus radu Barnabas ye amnir awayar sir. (Minremi safe ma kfwalak a ne: farlan Markus nma ma nakmat a kmi e, ka mlyangun i ma nangafel). 11 Ma Yesus ma rtar i feti Yustus a ne, nkirim salam ber kmi a nbal. Nof tomwat Yahudyar ma ralele ninr Ray Silai ne, lan ratel ye ma ror yakw ma maktem a mkarya ber Ratu. Sir ye ma rose ma dalangw namkoran.
12 Ma Epafras nkirim salam ber a kmi a nbal. I ye pnue lese nor a kmi a nbal. I ye, Yesus ninr Ray Silai Ni mangkaryae ma dedesar nsampayang ber Ratu nor dalam kateman. I ntak Ratu nema kmi mtyafal ma milele ninr Ray Silai, ma mkyaul myal Ratu Ni ngribatnir fengamone, nema bise ma mlyarat monuk Ni mpempeang. 13 Ma koko yakw kswalan desar lo feti i nkarya ma nmat a nlay ber a kmi, ma ber tomwatar ma ralele Yesus na Laodikia ma Hierapolis. 14 Ma dokter Lukas ma tkamis i a ne ma Demas, rkirim salam ber kmi a nbal.
15 Ma mfyalak mamy salam ber waninrar na Laodikia, ma ber Nimfa, ma ber soranyar ma biase rafburat sir na ni dasa a ne nbal. 16 Farlan mbyaca monuk surat ye, ka myonr ber soranyar na Laodikia ma rbaca nbal. Ma surat ma yak kwirim ber soranyar na Laodikia ne, ka myal ma mbyaca ber a kmi a nbal. 17 Ma mifbotin ber Arkhipus ma ka nsoru karyayar monuk ma Ratu nal ber i a ne.
18 Yakw Paulus, koko yakw ma kurengi ningw surtar monuk ye. Ma ka minremi feti yakw lolone kumin sel. Ma ktwak a nbal ma weni Ratu ninr Mangnrure ne nfatutu Ni dalam ngamone ber a kmi. Salam nof yakw Paulus.