Ka myebas mir adat yatkar ma myose mir adat ngamonar
1 Wangur, Ratu nafmorip a nbali ninr Ray Silai lo mpa Ratu nafmorip a nbali kmi a nbal, iane feti nal momorip beberi ber a kmi. Mpa ka dedesar ma mdyaun safe-safe monuk na surga, iane ain ma ninr Ray Silai nfarete na Ratu seriny fiana. 2 Ka dedesar ma mdyaun safe-safe monuk na surga ne, ma kete mdyaun kabain saryamprenar. 3 Ma kmi ma milele ninr Ray Silai ne farlan ma myat myor I. Iane nwayat ma to mdyaun kabain saryamprenar lo, ma myonri momorip beberi myor I. Nempa tomwatar ma to ralele Ratu to rkaul ral mir momorip beberi ne fuky. 4 Ma lan ninr Ray Silai ma nal momorip beberi ber a kmi. Ma noak ma nbali I a nma e keta miktem I a mbyotin myor Ni dadangin.
5 Mpa ka myebas monuk mir makeus saryamprenar na mir momorip. Ka kete minronr, ma kete mir andaun yatak, kete mimkeus tomwatar sawnir, kete mimkeus ma myose kabain yatkar, ma kete mkyampres. Farlan mkyampres iane feleles farlan tomwatar ma rsampayang ber dewayar. 6 Ratu keta nukun tomwatar ma to rlarat I, iane sir ma rose kabanir ma farane. 7 Luryain e koko kmi myose kabain yatkar a ne nbal na mir momorip. 8 Nempa lere ye milele ninr Ray Silay lo mpa ka myebas monuk kabanir ye: kete mires, kete mikarat nif tomwatar, kete mkyedan tomwatar, ma kete msyoi lamain tomwatar nre miyaman. 9 Ma kete miflepusuk a kmi, fali myebas monuk mir momorip wangim ma mir adat yatkar lo. 10 Ma lere ye Ratu nal momorip beberi ber a kmi lo mpa dedesar ma nafbweberi mir momorip a ne. Iane nwayat ma mtyafal ma mifai botuan I nema mir adat a ne feleles farlan Ratu ma nose kmi a ne. 11 Ma kmi myorip a na momorip beberi lo, mpa kete misalan sou feti sir a ne tomwat Yahudyar ma sir a ne tomwat Yunanyar. Sir a ne rsunat sir ma sir a ne to rsunat sir a fuky. Sir a ne mangmwar ma sir a ne tomwatar ma raulur. Sir a ne karwar ma sir a ne tomwat melar. Ma Ratu to nasalan sou fali na souny lury e sir monuk a ne feleles. Mpa farlan kmi monuk dalmir lese myor ninr Ray Silai, ma I namin dedesar dalmir e, lan iane ma nlengan nof monuk-monuk.
12 Ratu nkamis a kmi ma nfil a kmi a neluk Ni tomwatar mpa ka mlyompang tomwatar, myose ngamone tomwatar, kete mifdas a kmi, ka myalas ber tomwatar, ma ka msyabar ber tomwatar. 13 Ma farlan tomwatar rose yatak a kmi, ka kete misnyalik ma mires. Ma ka sa nlure sa fali ninr Mangnrure nlure mir salar lo mpa ka myose farane nbal. 14 Ma nlengan desar e ka mikamis a kmi fali iane ma nose ma myorip e dalmir lese fengafele.
15 Ka weni Yesus ninr Ray Silai nkuase dalmir ma nose ma myorip e mingamon myor tomwatar. Fali Ratu nfil a kmi ma myeluk Ni tomwatar ma dalmir lese myor I, farlan I tenany. Mpa ka myorip e mingamon myor mir soranyar, ma dedesar ma myose alang ber I. 16 Ma ka dedesar ma mnyau ninr Ray Silai Ni anftutwar nema nawakar na dalmir. Ma ka myal monuk mir anfai silai ma miftutu ma msyurat tomwatar. Ma ka mbyeu mazmur ma beu dadangin numur beu gerejar. Mbyeu farane la myose alang ber Ratu. 17 Ma safe-safe monuk ma kmi myose ma mfyalak, ka myose mlyarat Yesus ninr Mangnrure Ni mpempeang. Ma ka myose alang ber Amninrar Ratu na safe ma Yesus nose ber kit a ne.
Snyurtar ber tomwat Kristenar nir das dalmir
18 Ber bat mangafsawar a kmi, ka mdyengar sawmir. Kmi myose farane iane ma diat fali milele ninr Ray Silai lo.
19 Ma ber merwan mangafsawar a kmi, ka mkyamis sawmir ma kete mfyengarat sir.
20 Ma ber kangkir a nbal, ka dedesar ma mdyengar enmir amir fali iane ma mifsenange Ratu dalamy.
21 Ma ber makenar a kmi, ka kete mirese angkimir fali keta dalmir maninik ma nir andaun to ntai.
22 Ma ber karwar a kmi, ka dedesar ma mdyengar mir bos saryamprenar. Ka kete mlyarat sir na sonir lury ma mifsenange sir motak. Nempa ka mlyarat sir myor dalmir kateman fali mimtaut Ratu. 23 Safe-safe monuk ma kmi myose ne ka myose myor dalmir kateman, feleles farlan ma mkyarya ber Ratu ma to ber tomwatar. 24 Kmi mifai feti keta Ratu nal berkat ber a kmi ma I nau ne neluk mir sewe. Fali ninr Ray Silai ye, mir Tuan ma kmi e myeluk Ni mangkaryae. 25 Ise ma nose sale, keta Ratu nukun i nlarat ni sale ne fali I to nasalan sou.