Paulus ni surat ber soranyar na Filipi
Salam
1 Ye surat nof yakw Paulus ma Timotius. Kam ye Yesus ninr Ray Silai Ni mangkaryae. Kam marengi surat ye ber Ratu Ni tomwatar monuk ma dalmir lese ror Yesus ninr Ray Silai, ma ramin kote Filipi. Kam marengi surat ye nbal ber mir mangonbain gerejar ma diakenar.
2 Ma weni Amninrar Ratu ma Yesus ninr Mangnrure rfatutu nir dalam ngamone ma ral maline ber a kmi.
Paulus nsampayang ber soranyar na Filipi
3 Soranyar mir kateman, lerar ma kunremi kmi e yak kose terima kasi ber Ratu ma kswatngur ber I a ne. 4 Ma lerar ma kswampayang ber kmi monuk e dedesar ma dalangw nsenang resi. 5 Yakw kose terima kasi nbal fali kmi mtyulung yakw ma kufwibar Ratu Ni Ibar Ngamone ntabw nof ma milele Yesus terik lere ye. 6 Ratu nose kabain ngamonar na mir momorip lo. Ma yak kulele feti keta nose farane dedesar terik ma Yesus ninr Ray Silai nma nbali saryamprene. 7 Ma safe-safe ma kose ber kmi a ne diat desar fali kwamis resi kmi. Ma fali kmi monuk mtyulung yakw na karyayar ma Ratu nal ber yakw fali Ni dalam ngamone ne, boloka kumin sel nre kumin burit. Yak kfwatutu feti Ibar Ngamone ne ibar ma botuan ber tomwatar ma rbangal Ibar ne, ma dedesar ma kfwalak ber sir nema rlarat botuan Ibar Ngamone ne. 8 Ratu nafai feti kpweang desar ma kukmat kmi fali kwamis resi kmi farlan Yesus ninr Ray Silai nkamis kmi.
9 Yakw kswampayang ber a kmi nema mtyafal ma mkyamis Ratu ma tomwatar. Ma mtyafal a nbal ma mkyaul myal botuan Ratu Ni mpempeang, mpa bise mifai feti mpe ma diat ma mpe ma sale. 10 Yak kswampayang farane nema kmi bise ma mfyil feti mpe ma nangamon, nema dedesar ma minglerap ma tomwatar to bise ma rfasale kmi terik ma Yesus ninr Ray Silai nma nbali saryamprene. 11 Ma keta na mir momorip a ne kmi dedesar ma myose kabain ngamonar fali Yesus ninr Ray Silai ntulung a kmi. Mpe tomwatar ma rsalan mir momorip ne keta ralang ma rdangin Ratu.
Paulus namin sel nempa Ibar Ngamone ntafal ma nsor
12 Wangur mir kateman, yakw kpweang ma mifai feti suse ma diat yakw na ye nose ma tomwatar rtafal ma yadin ma rdengar ma ralele Ibar Ngamone ne. 13 Suse ma diat yakw ne nose ma suldadwar ma rajake istana ma tomwatar ma ramin kote ye rafai feti tomwatar rnau yak na sel fali kwarya ber Yesus ninr Ray Silai. 14 Ma yak kumin sel ye nbal nwayat ma tomwatar ma ralele Yesus ne yadin rtafal ma ralele I. Sir to ramtaut nempa rtafal ma rbaran ma rafwibar ibar nof Ratu. 15 Tomwatar ketnir nof sir a ne rafwibar na Yesus ninr Ray Silai ror dalmir maninik fali to rpeang ma tomwatar rdengar yakw ma rpeang lan ma rdengar sir. Nempa ketnir e rafwibar na Yesus ninr Ray Silai ror dalmir lelerap. 16 Sir ye ma rafwibar na Yesus ninr Ray Silai fali rkamis I ma yakw. Ma sir rafai feti Ratu nfil yakw lo ma kuflonri feti Ibar Ngamone ne ibar ma botuan. 17 Nempa tomwatar ketnir ma to rpeang yakw ne nir andaun yatak ma rdaun lan tenir. Sir rdaun feti rose farane nema ktwafal ma kwoman suse na sel.
18 Farlan rose farane to sasaf ma farane motak. Dalmir ranglerap nre rarai e iane to uban, lan feti ibar na Yesus ninr Ray Silai ne dedesar ma nsor. Fali iane ma uban ma nose ma dalangw a nsenang. Ma keta nose ma kswenang dedesar. 19 Yakw kufai feti mir sampangar ma Yesus ninr Ray Silai Ni Smwangtany ma ntulung yakw ne, ma nose ma keta rtate yakw rof sel. 20 Yak kpweang desar ma kose klwarat Ratu Ni mpempeang nema to kmweat na karyayar ma nal ber yakw ne. Ma kpweang a nbal ma dedesar e kbwaran ma kutanuk. Yak kose farane nema tomwatar dedesar ma rdangin Yesus ninr Ray Silai, boloka kmworip nre kmwat. 21 Fali farlan yakw kmworip, iane lety ber yakw ma kwarya ber Yesus ninr Ray Silai. Ma farlan kmwat e iane nangafel a nlengan fali keta kmworip kor Yesus ninr Ray Silai. 22 Nempa farlan yakw lolone kmworip na saryamprene ye iane feti ka kuloran karyayar ma Yesus ninr Ray Silai nal ber yakw ne. Ma to kufai feti keta kfwil mpe. 23 Fali ngriar du a ne rwayat ma to kufai feti kose farpe. Yak kpweang ma kmwat nema kmworip kor Yesus ninr Ray Silai, fali iane nangafel resi. 24 Nempa uban desar ma kumin saryamprene ye nema bise ma ktwulung a kmi. 25 Mpa yakw kulele desar feti keta dedesar ma kmworip a na saryamprene ma ktwulung a kmi, nema mtyafal ma milele Yesus ninr Ray Silai, ma dalmir a rsenang fali milele I. 26 Ma farlan kbwali yakw ma ktwi kukmat a kmi, keta kmi mtyafal ma msyenang ma mdyangin Yesus ninr Ray Silai.
Paulus nsurat tomwat Filipiar nema dedesar ma ralele Yesus ninr Ray Silai
27 Boloka safe safe ma diat yakw na ye nempa ka myorip mlyarat Yesus ninr Ray Silai Ni Ibar Ngamone. Yakw to kufai feti keta kmwa ma kukmat a kmi a nbal nre tate. Nempa farlan tate, yakw kulele feti keta kdwengar ibar na kmi feti dedesar ma dalmir a ramkoran. Ma mireke ma dalmir lese ma milele Yesus mlyarat Ibar Ngamone nof Ratu ne. 28 Ma kete mimtaut ma mbyangal tomwatar ma rbangal kmi a ne. Farlan to mimtaut iane faniak ber sir feti Ratu keta nukun sir monuk terik ma omp sir. Nempa kmi e Ratu keta nfair kmi nof mir salar ma to nukun a kmi. 29 Fali Ratu to nfil a kmi ma milele lan Yesus ninr Ray Silai, nempa nfil a kmi a nbal ma mkyoman suse fali milele I. 30 Lere ye kmi mkyoman suse fali tomwatar rtean a kmi na Ibar Ngamone ma mifwibar a ne. Iane farlan ma luryain ne msyalan na yak. Ma suse ne lolone kubare terik lere ye farlan ma mdyengar lo.