Soranyar na Korintus rabutin dotyar la rtulung soranyar na Yerusalem
1 Wangur, yak kpweang ma kfwalak ber a kmi na dotyar ma mibutin la mtyulung Ratu Ni soranyar na Yerusalem. Yak ktwak ma ka myose mlyarat safe ma yak kuftutu ber soranyar mpane na Galatia. 2 Na ler Minggwar mpane, ka leles mpane myau mir dotyar fen rufuky myof mir karya dalmir a ne. Ka myose farane nof lere ye ma kete mdyaf yakw, nema noak ma kmwa e to mibutin mir dotyar lo. 3 Noak ma kmwa e keta klwuan tomwatar ma milele sir ma ronr dotyar far Yerusalem. Ma keta kose surat tukrir sa ma sir ronr a nbal. 4 Ma farlan mdyaun feti ni ngafele e yakw klwarat sir, la maktem a mti.
Paulus nose ma nti Korintus
5 Wangur, la ktwi kswalan a kmi. Nempa keta kwelat propinsi Makedonia, fali kpweang ma kswalan soranyar a na iane fuky. 6 Ma keta yak kor a kmi far dodo a na iane. Nre kumin a ne terik ma nmauk nririn omp. Nema noak ma kuloran ningw mpampane nof a ne, kmi bise ma mtyulung yakw na ningw perluar. 7 Fali to kpweang ma kwelat motak ma kswalan a kmi. Ma farlan Ratu nlarat e kpweang ma kor a kmi far dodo. 8 Ma lere ye yak kumin kote Efesus, terik ma ler silai Pentakosta. 9 Yakw lolone kumin ye fali iane lety ber yak ma kwaryae karyae ma uban ber tomwatar na ye, boloka yadin nof sir a ne nbal ma rbangal yakw.
10 Farlan Timotius nma ma nakmat a kmi, ka mlyangun i ma nangafel nema dalam a nsenang ma nor a kmi, fali i nkarya ber Ratu feleles farlan yakw. 11 Ma boloka tabweri i nempa ka myeleng i. Ma ka mtyulung i a na ni perluar nema bise ma naloran ni mpampane ma nangafel. Kmi myose farane nema bise ma nbali i ma nakmat yakw. Fali yak knwengar i ma keta nor wanir ketnir a rma ye. 12 Yak dedesar ma ktwak waninrar Apolos nor tbwarnir ma rti rsalan a kmi lo. Nempa lere ye i to npeanga ma nti a fuky, ma keta ndaf lety ngamonar sa betno nti nsalan a kmi.
Salam penutup
13 Wangur, ka mijake kmi fen ngamone! Ma ka mimkoran ma milele Yesus. Ma ka kete mimtaut, ma ka dalmir a ramkoran ma milele I. 14 Ma ka mfyatutu mir angkamis na safe-safe ma kmi myose. 15 Wangur, kmi mifai feti na propinsi Akhaya ne, Stefanus nor ni das dalam ma ralele baluan Yesus. Ma rkarya ror dalmir kateman la rtulung Ratu Ni tomwatar. 16 Mpa ktwak desar kof a kmi ma ka myalang tomwatar ma farane, numur a nbal tomwatar ma raktem a rkarya ber Ratu. 17 Ma noak ma Stefanus, Fortunatus ma Akhaikus rma ye yak kswenang resi. Fali boloka to mimin ye nempa sir ramin ye la rlikur a kmi. 18 Sir rafkoran dalangw feleles farlan ma sir rose ber a kmi a nbal, mpa ka myalang tomwatar ma farane.
19 Tomwatar ma ralele Ratu ma ramin propinsi Asia kecil rkirim salam ber a kmi. Ma Akwila ma Priskila numur tomwatar ma ralele Ratu ma biase rafburat sir a na nir das a ne, rkirim salam ber a kmi a nbal. Ma iane rfatutu feti rkamis desar a kmi fali dalmir lese myor Yesus ninr Ray Silai lo. 20 Soranyar ma ramin ye rkirim salam ber a kmi a nbal. Ma myose salam ber soranyar monuk na iane, ma miomat lim la mfyatutu feti dalmir lese.
21 Yakw Paulus, koko yak ma kurengi salam ye. Salam nof yakw Paulus.
22 Tomwatar ma to rkamis Yesus ninr Mangnrure ror dalmir kateman, la Ratu nukun sir. Maranata - Ka weni ninr Mangnrur Silai nma!
23 Ka weni Yesus ninr Ray Silai ma neluk ninr Mangnrure ne nfatutu Ni dalam ngamone ber a kmi.
24 Ma yakw kwamis desar a kmi ma dalmir lese myor Yesus ninr Ray Silai. Nater lan ye.