Yesus nmorip a nbali nof mamate
1 Wangur! Lere ye yak kpweang ma minremi mbyali Ibar Ngamone ma luryain e kufwibar ber a kmi a ne. Ma Ibar a ne, ma kmi mlyangun ma mimkoran ma milele terik lere ye. 2 Ma kmi dedesar ma mimkoran ma milele Ibar Ngamone ma kufwibar ber a kmi a ne, mpa Ratu nfair a kmi lo. Nempa farlan to mimkoran ma milele Ibar Ngamone ne, keta iane to ubany.
3 Safe ma kfwalak ber a kmi a ne, yakw klwangun kof Yesus ninr Ray Silai. Ma nof safe-safe monuk ma kufwibar a ne ma uban desar e iane feti Yesus ninr Ray Silai nmat ma ntebus ninr salar farlan ma rarengi na Kitap Lelerap dalam. 4 Lama I nmat e tomwatar rafonak I. Nempa ni lerar tel e Ratu nafmorip a nbali I, farlan ma rarengi na Kitap Lelerap dalam. 5 Noak ma nmorip a nbali e nafbotin I ber Kefasa, betno ber Ni manglarat buti resin du a nbal. 6 Ne nafbotin I a nbal ber manglarat walyetar ratlim resnir a ne. Ketnir nof sir a ne rmat lo, nempa yadin lolone rmorip terik lere ye. 7 Ne nafbotin I a nbal ber Yakobus betno Ni mangsidkwar monuk. 8 Ma famudi e nafbotin I ber yakw nbal. Yakw ye to far Ni mangsiduk walyetar, mpa yakw farlan kangkir sa ma ramtoranbabe i e ni bulnar to dengan a fuky. 9 Yak kfwalak farane fali nof Ratu Ni mangsidkwar monuk e to rekan desar yakw. Mpa to ubangw desar ma kweluk Yesus Ni mangsiduk, fali luryain e kswiksa tomwatar ma ralele I. 10 Nempa Ratu nfatutu Ni dalam ngamone ber yakw, mpa lere ye bise ma kweluk Yesus Ni mangsiduk farye. Ma Ni dalam ngamone ma nfatutu ber yakw ne ubany desar. Mpa yak kwarya ma kmwat a klwai desar klwengan kof Ni mangsiduk walyetar. Ma safe-safe monuk a ne to koko yakw ma kwarya nempa Ratu nfatutu Ni dalam ngamone ma ber yakw, mpa bise ma kwarya. 11 Mpa boloka kmi mlyangun Ibar Ngamone ne myof yak nre Ni mangsiduk walyetar, iane feleles motak. Fali ma ubany e kam mafwibar Ibar Ngamone ne ber a kmi ma milele.
Ratu keta nafmorip a nbali kit ma talele I
12 Wangur, kam mafwibar feti Ratu nafmorip a nbali ninr Ray Silai nof mamate. Mpa safema tomwatar ketnir nof a kmi a ne rfalak feti Ratu keta to nafmorip a nbali tomwatar nof nir mamate? 13 Farlan Ratu to nafmorip a nbali tomwatar nof nir mamate, iane feti I to nafmorip a nbali ninr Ray Silai nof Ni mamate nbal. 14 Ma farlan Ratu to nafmorip a nbali ninr Ray Silai, safe ma kam mafwibar ber a kmi ne to ubany, ma to uban ma milele ninr Ray Silai nbal. 15 Farlan botuan feti Ratu to nafmorip a nbali mangmwatar, I to nafmorip a nbali Yesus ninr Ray Silai. Farlan farane iane nfatutu desar feti kam mlepusuk na Ratu. Kam mfalak feti I ma nafmorip a nbali ninr Ray Silai nof Ni mamate safo to botuan. 16 Fali farlan botuan feti Ratu to nafmorip a nbali mangmwatar, iane feti I to nafmorip a nbali ninr Ray Silai nof Ni mamate nbal. 17 Ma farlan Ratu to nafmorip a nbali ninr Ray Silai, keta to ubany ma milele ninr Ray Silai, fali iane nfatutu feti Ratu to nlure mir salar a fuky. 18 Ma to lan a kmi nempa tomwatar ma ralele Yesus ma rmat a ne nbal, keta Ratu nukun sir ma rmat dedesar. 19 Noak ma tmorip a na saryamprene kit talele feti ninr Ray Silai nose kabain ngamonar ber kit. Nempa farlan talele I ma nose farane na lan ninr momorip saryamprene, ma to na ninr momorip ma nma ne, keta yore desar kit tof tomwatar monuk.
Ratu nafmorip a nbali ninr Ray Silai mpa keta nafmorip a nbali kit ma talele I
20 Nempa ni botuan ninr Ray Silai nmorip a nbali nof mangmwatar. Ma Ratu nafmorip a nbali I baluan nema nafmorip a nbali tomwatar ma ralele I ma rmat a ne. 21 Fali tomwatar sa ni sale nwayat ma tomwatar monuk rmat. Ma keta nalyole tomwatar sa nbal Ratu nafmorip a nbali mangmwatar monuk. 22 Tomwatar monuk keta rmat fali sir a ne Adam empun nusiny. Nempa tomwatar monuk keta rmorip a rbali fali dalmir lese ror ninr Ray Silai. 23 Ratu keta nafmorip a nbali tomwatar mpane nempa farye: Baluan e I nafmorip a nbali ninr Ray Silai. Ma noak ma nma nbali saryamprene betno Ratu nafmorip a nbali tomwatar ma dalmir lese ror ninr Ray Silai ne. 24 Ratu keta nose monuk farane betno saryamprene namsos. Na lere ne nbal Yesus ninr Ray Silai nafufu monuk smwangtar ma nir kuase ma rfarete na saryamprene, ma na langit. Lama nose monuk farane I nanrenre Ni kuase ma neluk Ray ne ber Amany Ratu. 25 Fali ninr Ray Silai ye ka nfarete neluk Ray terik ma Ratu nafufu monuk Ni muswar. Iane feleles farlan ma nose ma Ni muswar monuk a ne rsatngur ber ninr Ray Silai. 26 Mamate ne farlan Ni musu ma famudi e nafufu i. 27 Na Kitap Lelerap dalam e rarengi farye, “Ratu nose safe-safe monuk ma rsatngur ber ninr Ray Silai.” Iane nfatutu feti safe-safe monuk keta rsatngur ber ninr Ray Silai. Ma lan lese ma keta to nsatngur ber ninr Ray Silai iane Ratu. Fali lan Ratu ma nose ma safe-safe monuk ma rsatngur ber ninr Ray Silai ne. 28 Nempa noak ma safe-safe monuk rsatngur ber ninr Ray Silai lo, keta koko I a nsatngur ber Amany Ratu. Ratu ye ma nose safe-safe monuk ma rsatngur ber Yesus. I nose farane ma nfatutu feti I ma nfarete na safe-safe monuk, ma I a nbal ma nose safe-safe monuk a ne rsatngur ber ninr Ray Silai.
Farlan botuan feti mangmwatar to rmorip a rbali keta mamy karyae ber Ratu to uban
29 No mdyaun, tomwatar ketnir rpeang ma radiris sir la rlikur wanir ma rmat a ne fali ralele feti Ratu keta nafmorip a nbali sir ma rmat a ne. Mpa farlan Ratu to nafmorip a nbali mangmwatar, uban safe ber sir ma rose farane? 30 Ma kam a nbal. Farlan Ratu to nafmorip a nbali mangmwatar, safema lere nronram e kam to mamtaut tomwatar ma rose ma rfen kam? 31 Wangur, lerar monuk e yak kwoman suse nwayat ma ketla kmwat. Safe ma yak kfwalak ye botuan. Ma yak dalangw nsenang resi fali dalminrar lese tor Yesus ninr Ray Silai lo. I a ne ma neluk ninr Mangnrure nbal. 32 Tomwatar na Efesus ye sir farlan binatang mangaresar. Mpa farlan Ratu to nafmorip a nbali mangmwatar uban safe ma kbwangal sir dedesar. Ma farlan Ratu to nafmorip a nbali mangmwatar ni ngafele e tlarat motak ngribatnir ye: “Mya ma tame tenum fali keta bobole e tmat lo.” 33 Nempa kete myinrang ma tomwatar rfule kmi ror ngribatnir ma farane. Ka minremi: Tomwate ma ni adat nangafel ma natbwarin nor tomwatar ma biase rose kabain yatkar, keta ni adat nayatak a nbal nlarat sir. 34 Mpa yak kfwalak ber a kmi ma ka mfyenai botuan ma kete myose sale lo. Tomwatar ketnir rof a kmi ye to rafai Ratu mpa yak kfwalak farye nema myeat.
Noak ma Ratu nafmorip a nbali kit keta I nal teninrar beberi ber kit
35 Wangur, nre kete tomwatar ketnir rof a kmi ye renrat feti keta Ratu nafmorip mangmwatar felany farpe? Ma farlan rmorip a rbali e keta tenir farpe? 36 Tomwatar ma renrat farane iane rmod! Kmi mifai feti fin batnir ma mtyanam a ne, ka rbet a fuky betno ratrump. 37 Ma farlan kmi mtyanam kabanir sa, keta mtyanam lan batnir, ma to mtyanam katutun a ne tenany nre donyar. Contoh farlan gandum batnir nre batin walyetar. 38 Ratu koko I a nose ma fin batnir a ne felnir mpane nlarat Ni mpempeang. Mpa noak ma ratrump e to feleles. 39 Farlan a nbal safe-safe monuk ma rmorip na saryamprene ye. Sir monuk a ne to feleles. Tomwatar ma binatang isnir to feleles. Ma mangkyar isnir to feleles nor inar a nbal. 40 Iane farlan kabanir ma ramin langit ma kabanir ma ramin saryamprene nbal. Boloka Ratu nose sir ma rangafel nempa nir ngafele ne to feleles. Fali kabanir ma ramin langit a ne nir ngafele nkese sir, ma kabanir ma ramin saryamprene nir ngafele nkese sir a nbal. 41 Lere, bulan ma ftunar nir snyain nangafel nempa nir ngafele ne to feleles. Ma ftunar mpane ne nir ngafele nkese sir a nbal.
42 Farlan teninrar a nbal. Noak ma tmat e rafonak teninrar mpa keta rlor. Nempa noak ma Ratu nafmorip a nbali kit e keta teninrar to bise ma rlor. 43 Teninrar ma rafonak a ne to ramkoran ma to rangafel. Nempa teninrar ma Ratu nafmorip a nbali keta ramkoran ma rangafel desar. 44 Teninrar ma rafonak a ne iane teninrar ma nof saryamprene. Nempa teninrar ma Ratu nafmorip a nbali, iane teninrar ma nof Ratu Smwangtany. Mpa tomwatar tenir rof saryamprene ramin, ma tenir rof Ratu Smwangtany ramin a nbal.
45 Na Kitap Lelerap dalam rarengi farye: “Ratu nose tomwat baluan ma rtar feti Adam ma nal sanawe ber i ma nmorip.” Nempa Adam famudi e iane Yesus ninr Ray Silai, I ye ma nal momorip dedesar ber tomwatar. 46 Teninrar ma Ratu nal baluan ber kit a ne iane teninrar saryamprene. Lama nose farane betno I nlikur teninrar a ne nor teninrar nof surga. 47 Ratu nose tomwat baluan nof ompak ngarany Adam ma namin saryamprene ye. Nempa ninr Ray Silai ma rtar feti Adam kedua ne I nma nof surga. 48 Tomwatar monuk ma rmorip a na saryamprene ye tenir farlan Adam fali empun nusin ber sir. Nempa tomwatar ma dalmir lese ror Yesus ninr Ray Silai keta tenir feleles farlan I a nbal ma nof surga. 49 Lere ye teninrar farlan tomwat baluan ma Ratu nose i nof ompak. Nempa na lere ma nma ne, noak ma Ratu nafmorip a nbali kit, I keta nal teninrar ma feleles farlan Adam kedua ma nma nof surga.
50 Wangur, yak kfwalak farane iane feti, teninrar ma rof saryamprene ye keta to bise ma ramin ain ma Ratu nfarete. Fali keta tmat ma teninrar rlor, mpa to bise ma tmorip a na ain ma tomwatar rmorip dedesar a na, tor teninrar ma rlor a ne. 51 Mdyengar fengamone, fali safe ma kufbotin ber a kmi a ne tomwatar to rafai fuky. Iane feti to monuk-monuk nof kit ye ma keta tmat, nempa Ratu nose ma kit monuk felninrar beberi rbali. 52 Ma metrat motak e Ratu nose farane. Ma na lere ne nbal keta tomwatar rdengar ma tburi delak la nfatutu feti ler famudi lo. Ma noak a ne Ratu nafmorip a nbali mangmwatar ma nose ma tenir to bise ma rlor. Ma kit monuk ma lolone tmorip ye keta I nose nbal ma teninrar beberi. 53 Fali Ratu keta nlikur teninrar ma bise ma rlor ye, nor teninrar ma keta to bise ma rlor. Ma I keta nlikur teninrar ma bise rmat ye, nor teninrar ma to bise ma rmat. 54 Mpa farlan Ratu nlikur teninrar ma bise ma rmat nre rlor a ne, nor teninrar ma keta to bise ma rmat nre rlor, iane feti Ratu nafdiat safe ma rarengi na Kitap Lelerap dalam farye:
“Ratu nafufu mamate ber kit lo
ma to nkuase kit lo.”*
55 “Ma mamate to ni fakoran lo.
Mpa to bise ma nafngal kit lo.”*
56 Tomwatar ka rmat fali rose sale lo. Ma tomwatar ma rose sale ka Ratu nukun sir fali rlangas Ratu Ni faretar ma nal ber Musa ne. 57 Nempa ka tose terima kasih ber Ratu fali I nose ma tmenang nof safe ma Yesus ninr Ray Silai ma neluk ninr Mangnrure ne nose na katutun sangwalu. 58 Mpa wangur ma kwamis a kmi, yak ktwak kof a kmi ma ka mimkoran ma milele Yesus, ma ka dedesar ma dalmir a ramkoran. Ma ka mngyabo ma mkyarya ber Ratu, fali mifai feti mir karyayar ber Ratu ne keta to nti letkyape.