Tafbotin snyurat nof Ratu ber soranyar uban nlengan nof ma tatanuk tor liliryar ma tomwatar to rkaul ral
1 Wangur, ka mireke desar ma myose ngrie ye baluan, iane feti mkyamis tomwat walyetar. Ma ka mireke desar ma myonri fakoran myof Ratu Smwangtany a nbal. Nempa nlengan desar e ka mireke ma myonri fakoran ma mifbotin snyurat nof Ratu. 2 Yak kfwalak farane fali tomwate ma Ratu Smwangtany nal fakoran ber i ma natanuk nor liliryar ma tomwatar to rkaul ral a ne, i to natanuk nor tomwatar nempa natanuk nor Ratu. Ma to tomwate fen lese ma nafai safe ma nfalak a ne, fali Ratu Smwangtany nose ma i nfalak na ngriar ma tomwatar to rkaul ral. 3 Nempa tomwate ma Ratu Smwangtany nal fakoran ber i ma nafbotin snyurat nof Ratu, i natanuk ber tomwatar. Ma safe ma nfalak a ne la nsurat soranyar, nafkoran sir, ma nafsenange dalmir. 4 Tomwate ma natanuk nor liliry ma tomwatar to rkaul ral, ni liliri ne la nafkoran a nbali i. Nempa tomwate ma nafbotin snyurat nof Ratu, i a ne nafkoran soranyar monuk ma raktem a rafburat sir. 5 Yak kswenang resi ma kmi monuk mitanuk myor liliryar ma tomwatar to rkaul ral. Nempa keta ktwafal ma kswenang a nbal farlan kmi monuk bise ma mifbotin snyurat nof Ratu. Fali tomwate ma nafbotin snyurat nof Ratu, ubany desar nlengan nof tomwate ma natanuk nor liliryar ma tomwatar to rkaul ral. Nempa farlan i bise ma nfalyole liliryar a ne isin, iane la nafkoran soranyar monuk.
6 Mpa wangur, farlan kmwa ma kukmat a kmi ma kutanuk kor liliryar ma to mkyaul myal, iane to uban ber a kmi. Nempa ma uban desar e farlan kutanuk kor liliryar ma kmi mkyaul myal ma kufbotin safe ma Ratu nfalak luryain a ne, nre kfwalyole kabanir na Ratu, nre kufbotin Ni snyurat, nre kuftutu Ni anftutwar ber a kmi. 7 Contoh farlan buli ma kulele ma to rsanau ne. Farlan tomwatar to roup buli fengamone nre rampuat lamain kulele ne, keta tomwat walyetar to rafai feti beu safe ma roup nre rampuat a ne. 8 Contoh sa nbal farye: Tomwatar ka roup a tburi neluk faniak ber tomwat walyetar nema rasusan sir ma rti raprang. Nempa farlan roup lamain tburi ne keta to tomwate fen lese ma nasusan i ma nti naprang. 9 Iane feleles farlan ma mitanuk myor liliryar ma tomwatar to rkaul ral. Farlan to mpyaki ngribatnir ma rkaul ral keta sir to rafai feti mfyalak safe. Ma safe ma mfyalak a ne nti letkyape motak.
10 Liliryar felnir mpane na saryamprene ye. Ma to fen lese ma isnir to ramin. 11 Nempa farlan tomwatar sa natanuk ber yakw ma to kwaul kal ni liliri, keta to bise ma kutbwarin kor i. Ma i to bise ma natbwarin nor yakw fali to nkaul nal ningw liliri nbal. 12 Iane farlan kmi a nbal ma mireke ma myonri fakoran ma Ratu Smwangtany nal ber kmi a ne. Mpa ni ngafele e ka mtyak Ratu Smwangtany ma nal fakoran ber a kmi ma mpyaki la mifkoran soranyar.
13 Mpa farlan Ratu Smwangtany nal fakoran ber tomwatar sa ma natanuk nor liliry ma tomwatar to rkaul ral, ka ntak Ratu ma nal fakoran ber i nema bise ma nfalyole liliryar a ne isnir a nbal. 14 Yak kfwalak farane fali noak ma kswampayang kor liliry ma tomwatar to rkaul ral, iane yak kswampayang na dalangw kor ngribatnir ma Ratu Smwangtany nal ber yakw, nempa to kwaul kal safe ma kfwalak a ne. 15 Mpa ka kose farpe? Keta kswampayang kor ngribatnir ma Ratu Smwangtany nal ber yakw. Nempa keta kswampayang a nbal kor ningw ngribatnir nema tomwatar rkaul ral. Ma keta kbweu kor ngribatnir ma Ratu Smwangtany nal ber yakw. Nempa keta kbweu nbal kor ngribatnir ma tomwatar rkaul ral. 16 Mpa farlan msyampayang ma myose alang ber Ratu myor liliri ma tomwatar to rkaul ral, keta sir ma rdengar a ne to bise ma rfalak “Amen” la rafdiat mir sampayang a ne, fali to rafai safe ma mfyalak. 17 Boloka msyampayang ma myose alang ber Ratu ma nangafel desar, nempa keta mir sampangar a ne to uban fali to bise ma ntulung soranyar ma ramkoran.
18 Wangur, yak kose alang ber Ratu fali kutanuk kor liliryar nof Ratu Smwangtany ma tomwatar to rkaul ral a ne nlengan nof kmi monuk. 19 Nempa farlan tomwatar ma ralele Ratu rafburat sir ma rsampayang, ni ngafele e kutanuk kor ngribatnir lese due ma tomwatar rkaul ral la kuftutu sir. Ma iane nlengan nof ma kutanuk kor ngribatnir yadin nof Ratu Smwangtany ma tomwatar to rkaul ral.
20 Wangur, kete mir andaun far kangkir, nempa ka myose mlyarat sir ma to rdaun kabain yatkar. Ma ka mir andanwar rangafel farlan makene batmakene. 21 Na Kitap Lelerap dalam rarengi farye,
Ratu nfalak, “La kswiduk nus walyetar
ma ratanuk ror liliryar ma tomwatar to rkaul ral.
Ma keta ral liliryar a ne ma ratanuk ror ningw tomwatar.
Boloka farane keta to rdengar safe ma kfwalak ne.”
22 Mpa farlan Ratu Smwantany nal fakoran ma ratanuk ror liliryar ma tomwatar to rkaul ral, iane neluk faniak ber tomwatar ma to ralele Ratu, ma to ber tomwatar ma ralele Ratu. Nempa farlan I nal fakoran ma rafbotin Ni snyurat, iane neluk faniak ber tomwatar ma ralele Ratu, ma to ber tomwatar ma to ralele Ratu. 23 Contoh farye: kmi monuk mifburat a kmi ma msyampayang, ma kmi monuk mitanuk myor liliryar nof Ratu Smwangtany ma tomwatar to rkaul ral. Ma tomwat beberyar ketnir nre tomwatar ma to ralele Ratu ma rlarat mir sampayang faburat a ne nbal, keta rfalak feti mfyukat. 24 Nempa farlan kmi monuk mifbotin snyurat nof Ratu, ma tomwat beberyar ketnir nre tomwatar ma to ralele Ratu ne rdengar safe ma mfyalak, keta snyurat ma rdengar a ne nose ma ratenak na dalmir, ma rfenai feti tomwat salar sir. 25 Ma keta Ratu nafbotin safe-safe monuk ma ramudim na dalmir a ne. Iane nwayat ma rsatngur ber Ratu ma rfalak, “Botuan Ratu nor a kmi.”
Safe-safe ma soranyar ka rose na sampayang faburat
26 Mpa wangur, noak ma mifburat a kmi ma msyampayang, ni ngafele e ka mpyaki fakoran ma Ratu Smwangtany nal mpane ber a kmi a ne ma myose farye: ketnir e rbeu beu dadangin, ketnir e raftutu Ratu Ni anftutwar, ketnir e rafbotin snyurat nof Ratu, ketnir e ratanuk ror liliryar ma tomwatar to rkaul ral, ma ketnir a nbal e rfalyole liliryar a ne isnir. Ma monuk-monuk a ne ka myose la mifkoran soranyar. 27 Ma farlan Ratu Smwangtany nal fakoran ber tomwatar ketnir ma ratanuk ror liliryar ma tomwatar to rkaul ral, ni ngafele e tomwatar fen du nre tel motak. Ma sir ye ka ralikur sir ma ratanuk. Ma ka tomwatar sa nbal ma nfalyole liliryar a ne isnir. 28 Nempa farlan to tomwate fen lese ma bise nfalyole liliryar a ne isnir, ka tomwatar a ne ramlin, ma ratanuk motak na dalmir ber Ratu.
29 Ma farlan Ratu Smwangtany nal fakoran ber tomwatar ketnir ma rafbotin snyurat nof Ratu, ni ngafele e tomwatar fen du nre tel motak. Ma soranyar walyetar ka rasaitling feti safe ma rfalak a ne botuan nre tate. 30 Nempa farlan metryat ma Ratu Smwangtany nal fakoran ber tomwatar sa nbal ma namin a ne ma nafbotin snyurat nof Ratu, ka tomwate ma natanuk baluan a ne namlin, nema tomwate ne bise ma natanuk. 31 Kmi myose farane nema bise ma milikur mpane kmi ma mifbotin snyurat nof Ratu, ma kmi monuk bise ma mkyaul myal Ratu Ni snyurat a ne ma mimkoran ma milele Ratu. 32 Tomwate ma Ratu Smwangtany nal fakoran ma nafbotin snyurat nof Ratu, ka i nafai feti bengfir e i natanuk, ma ka nsabar la ndaf ma tomwat walyetar ratanuk. 33 Fali Ratu npeang ma mir sampayang a ne npan ma nangafel ma to rngelir.
34 Ma noak ma Ratu Ni soranyar na mpenempen rafburat sir ma rsampayang, ka batar a ne ramlin. Ma sir to bise ma ratanuk fali ka ralang sawnir, farlan ma rarengi na tetetkar ma luryain e Ratu nal ber Musa. 35 Ma farlan rpeang ma rafai kabanir sa, ni ngafele e ka rbali sir far nir dasar, betno renrat sawnir. Fali farlan batar sa natanuk na sampayang faburat iane to nangafel.
36 Farlan tomwatar ketnir nof a kmi to rlangun ningw anftutwar, ka kete mdyaun feti kmi ye ma mlyangun Ratu Ni ngribatnir baluan. Ma ka kete mdyaun feti rafwibar Ratu Ni ngribatnir ber lan kmi. 37 Farlan tomwatar sa ndaun feti Ratu nal fakoran ber i ma nafbotin snyurat nof Ratu, nre ndaun feti Ratu nal fakoran ber i a nbal ma nose kabain walyetar, ka tomwate ne nyoding feti safe ma kurengi na surat dalam ye iane Ratu Ni farete. 38 Nempa farlan tomwatar sa to nlangun safe ma kfwalak ye, ka kete mdyengar i a nbal.
39 Mpa wangur, ka mireke desar ma myonri fakoran nof Ratu Smwangtany ma mifbotin snyurat nof Ratu. Nempa ka kete myose mtyeri tomwat walyetar ma ratanuk ror liliryar ma tomwatar to rkaul ral. 40 Nempa minremi feti ka myose kabanir monuk ye fengamone na mir sampayang faburat. Ma ka myose mlyarat sampayang faburat a ne ni yayatrwar a nbal.