Ka takamis kit nlengan nof safe-safe monuk
1 Wangur! Boloka yakw bise ma kutanuk kor tomwatar monuk nir liliryar nre malaektar nir liliryar, nempa farlan to kwamis tomwatar, keta ningw ngribatnir a ne nti letkyape motak, feleles farlan ma rbabal lamain tong kape. 2 Ma boloka Ratu Smwangtany nal fakoran ber yakw ma kufbotin snyurat nof Ratu, ma yakw kufai safe-safe monuk ma tomwatar to rafai fuky, nre kwaul kal safe-safe monuk na Ratu Ni anftutwar, ma kumkoran ma kulele Ratu mpa bise ma kfwalak ber bubuar ma nbie nof ain, nempa farlan to kwamis tomwat walyetar, keta fakornar ma Ratu Smwangtany nal ber yakw ne to uban sasaf.
3 Ma boloka yak kswaman monuk ningw kabanir ber tomwatar ma rawatan, ma kunrenre yakw ma tomwatar rapu yakw, nempa farlan yakw to kwamis tomwat walyetar keta monuk-monuk a ne to uban.
4 Tomwate ma nkamis tomwat walyetar ka i farye: nsabar, dalam nangamon, to dalam maninik tomwatar ma rlengan i, to natanuk la ndangin i, ma to nafdas i. 5 Ma nmarkein, to ndaun lan tenany, to nares rut, ma to nakedan. 6 Tomwate ma nkamis tomwat walyetar, keta to nsenang farlan tomwatar rose kabain yatkar. Nempa i keta nsenang farlan tomwatar rmorip a rlarat anftutw botunar. 7 Tomwate ma nkamis tomwat walyetar, i boan nal ma nabare safe-safe motak. Ma dedesar ma nalele safe-safe motak ma rangamon, nalele kabain ngamonar ber tomwatar, ma i nsabar na safe-safe motak.
8 Tomwate ma nkamis tomwat walyetar, keta ni ankamis a ne to terik. Botuan feti Ratu Smwangtan nal fakoran ber tomwatar ma rafbotin snyurat nof Ratu nempa keta nater. I nal fakoran ber tomwatar ma ratanuk ror liliryar ma tomwatar to rkaul ral, nempa keta nater a nbal. Ma I keta nal anfai ma rkaul ral safe-safe monuk na Ratu Ni anftutwar a ne nempa keta nater a nbal. 9 Fali safe-safe monuk ma tafai ne to dengan. Ma to bise ma tafbotin snyurat nof Ratu fengamone fuky. 10 Nempa nait ni tewat e safe-safe monuk ma to dengan a ne rlai ma Ratu nose ma safe-safe monuk a ne dengan.
11 Contoh farye: Noak ma ningw kanak e kutanuk, kose kabanir, ma ningw andaun farlan kangkir. Nempa noak ma silai yakw e to kose ningw adat ma far kangkir lo. 12 Lere ye kit to tafai Ratu fengamone fali to tsalan I a fuky. Iane farlan ma tsalan ninr walun na totote nempa lolone bubul. Nempa keta ni tewat e kit bise tafone kit desar tor Ratu. Na lere ne keta yakw kufai I desar farlan ma I nafai yakw desar.
13 Mpa ntabw nof lere ye, lan ngriar tel ye ma ka tose: ka talele Ratu, ma ka dedesar ma tdaf I ma nafdiat safe ma nyoding, ma ka takamis kit. Nof ngriar tel ye ma ubany desar e ka takamis kit.