Ratu Smwangtany nal fakoran ber kit e to feleles
1 Wangur, yak kpweang ma kfwalyole na fakoran ma Ratu Smwantany nal ber a kmi. Yakw kpweang ma mifai botuan ngriar a ne. 2 Ka minremi feti noak ma kmi to milele Ratu fuky e kabanir rfule kmi nwayat ma mlyarat ma msyampayang ber ratwawatar ma to ratanuk a ne. 3 Tomwate ma Ratu Smwangtany namin i, keta to bise ma nafbwere Yesus. Ma tomwate ma Ratu Smwangtany to nor i, keta to bise nbal ma nyoding feti Yesus ye ni Mangnrur Silai.
4 Wangur, Ratu Smwangtany nal fakoran ber kit la tafmpwane Ni karyayar. Nempa fakoran ma nal ber kit mpane ne to feleles, ma monuk monuk a ne nof lan Smwangtany lese, iane Ratu Smwangtany. 5 Ma karyayar ma Ratu nal ber kit la tlangun I a ne felnir mpane. Boloka farane lan lese ma tlangun I, iane ninr Mangnrur Silai. 6 Kit ninr fakoran felnir yadin la tafmpwane Ni karyayar a ne. Nempa lan lese ma nal fakoran ber kit la tafmpwane karyayar monuk a ne iane Ratu.
7 Ratu Smwangtany nal Ni fakoran ber tomwatar mpane, nema bise ma rose kabain ngamonar la ratulung sir. 8 Ratu Smwangtany nal fakoran ber tomwatar sa ma natanuk nor anfai silai. Ma Ni Smwangtany a ne nbal ma nal fakoran ber tomwat walyetar ma rkaul ral Ratu Ni anftutwar la ratanuk. 9 Ma Ni Smwangtany a ne nbal ma nal fakoran ber tomwatar sa nema namkoran ma nalele ninr Ray Silai. Ma I a nbal ma nal fakoran ber tomwat walyetar la rafngamone tomwatar. 10 Ma I nal fakoran ber tomwatar ketnir ma rose kabain mpasalnar, ma nal fakoran a nbal ber ketnir ma rafbotin snyurat nof Ratu. Ma ketnir e I nal fakoran ber sir nema bise ma rafai feti kuase mpeye ma nof Ratu Smwangtany, ma impe ma to nof Ratu Smwangtany. Ma I nal fakoran ber ketnir a nbal ma bise ma ratanuk ror liliryar ma tomwatar to rkaul ral. Ma ketnir a nbal e I nal fakoran ber sir ma bise ma rfalyole liliryar a ne isnir. 11 Lan lese ma nose safe-safe monuk a ne iane Ratu Smwangtany. Ma lan I ma nal fakoran ma to feleles ber tomwatar mpane, nlarat Ni mpempeang.
Kit ma talele Yesus ninr Ray Silai ne farlan tene lese boloka yadin kit
12 Wangur no msyalan tomwatar tenir, boloka lan lese nempa ulnir, matnir, tlingnir, irnir, emnir, limnir, ramin monuk. Iane farlan kit ma tamin Yesus ninr Ray Silai tenany, boloka yadin kit nempa tabut kit ma lese na I tenany. 13 Kit monuk ye to feleles: ketnir e Yahudi sir ma ketnir e to Yahudi sir. Ketnir e reluk kawar ma ketnir a nbal e to reluk kawar. Boloka farane kit monuk bise ma tabut kit ma teluk tene lese, fali lan lese ma Ratu nal ma nadiris kit monuk, iane Ni Smwangtany. Ma I nal Ni Smwangtany a ne nbal ma namin dalminrar.
14 Wangur, tomwate tenany ye to lan emany nre limany ma namin, nempa uluny, tlingany, matany ma iriny ramin monuk. 15 Contoh farye: eman nfalak ber tenany, “To limar ber yakw mpa to kumin tenam.” Nempa iane to botuan fali boloka nfalak farane, i dedesar ma namin tenany. 16 Contoh sa nbal farye: tlingan nfalak ber tenany, “To matmar ber yakw mpa to kumin tenam.” Nempa iane to botuan fali boloka nfalak farane, i dedesar ma namin tenany. 17 Mpa farlan teninrar ye nfen ber lan matnirar keta tadengar farpe? Ma farlan teninrar ye nfen ber lan tlingninrar keta taangat kabanir farpe? 18 Ratu to nose teninrar ma farane, nempa I nau ulninrar, matninrar, limninrar, ma emninrar ma ramin mpane anir na teninrar nlarat Ni mpempeang. 19 Farlan Ratu nose safe-safe ma ramin teninrar ye feleles monuk, iane tenany tate. 20 Mpa ni botuan e teninrar ye lan lese ma safe-safe ma ramin a ne yadin nempa to feleles.
21 Farlan farane matninrar to bise ma rfalak ber limninrar, “Yakw to kpwerlu ko.” Ma ulninrar to bise ma nfalak ber emninrar, “Yakw to kpwerlu ko.” 22 Ni botuan e safe-safe ma ramin teninrar ye ma kit tdaun feti to ramkoran, sir a ne ma uban desar ber teninrar. 23 Ma safe-safe ma ramin teninrar ye ma tdaun feti to uban, ka tajake sir ma nangafel. Ma safe-safe ma ramin teninrar ma tomwatar to bise ma rsalan, ka teri sir fengamone. 24 Nempa safe-safe ma ramin teninrar ye ma tsalan feti rangafel lo, keta to tperlu ma tsalan sir. Noak ma Ratu nose tomwatar kit, I nau safe-safe na teninrar ye na anir mpane, nema safe-safe ma tdaun feti to ubnir a ne, ka dedesar ma tsalan sir fengamone. 25 Ratu nose farane nema safe-safe ma ramin teninrar ye kete rakes rasam sir, nempa ka rasalan sir. 26 Mpa farlan safe-safe ma namin teninrar ye sa nkoman maninik, keta teninrar kateman maninik. Ma farlan tomwatar rdangin safe-safe ma namin teninrar ye lese motak e keta teninrar kateman rsenang.
27 Wangur, kmi monuk ye farlan ninr Ray Silai tenany. Ma kmi mpane myeluk matnir, limnir, emnir ma ramin tenany a ne. 28 Ratu nfil tomwatar ketnir nof soranyar. Baluan e I nfil Ni mangsidkwar, nabyar, betno tuanggurwar. Ne I nfil tomwatar ketnir ma rose kabain mpasalnar, ma rafngamone tomwatar, ma rlangun tomwatar. Ma I nfil ketnir a nbal ma reluk mangnrure ber tomwatar, ma ratanuk ror liliryar nof Ratu Smwangtany ma tomwatar to rkaul ral. 29 Mpa to monuk-monuk bise ma reluk nabyar, mangsidkwar, tuanggurwar, nre bise ma rose kabain mpasalnar. 30 Ma to monuk-monuk ma Ratu nal fakoran ber sir ma rafngamone tomwatar, ma ratanuk ror liliryar ma tomwatar to rkaul ral, nre rfalyole liliryar a ne isnir.
31 Mpa ka mireke ma Ratu Smwangtany nal fakoran ma uban desar ma mpyaki la mtyulung tomwatar. Nempa keta kfwatutu ber a kmi feti impe ma nangafel desar ma ka myose mlyarat.