Snyurtar ber mangoskayar
1 Ber mangoskayar a kmi mdyengar fengamone.
Ka mtyasing ma milol fali keta mkyoman suse.
2 Mir anoskai ne nayatak lo ma langatrar rane rafere mir rabtyar lo.
3 Mir masar ma perkar a ne ramemetam lo fali mnyau motak sir.
Ma memetmar a ne rfatutu mir dalam yatak.
Mpa Ratu keta nukun a kmi farlan au ma nane nafere katutun,
iane feti mkyoman suse desar.
Nempa kmi dedesar ma mibutin mir kabain saryamprenar terik lere ma Ratu nukun saryamprene.
4 Kmi to myal sewe ber tomwatar ma rkarya na mir lete.
No mdyengar ma rnrok a ne!
Mpe sir rnrok dedesar ber Ratu ma ntulung sir mpa Ratu mangkuase ndengar nir nronrokar a ne.
5 Kmi myorip na saryamprene ye mioskay ma msenang lo.
Kmi mifdunak a kmi farlan mifdunak binatngar sa ma keta myose ma mfyen i.
6 Kmi myukun ma mfyen tomwate ma to ni sal,
ma to boany nal ma nbangal a kmi.
Ka dedesar ma tafkoran dalminrar noak ma tkoman suse
7 Soranyar mir kateman!
Ratu keta nukun mangoskayar ma rtean kmi a ne,
mpa ka dedesar ma msyabar titerik ma Yesus ninr Ray Silai nma nbali saryamprene.
No msyalan mangosboe ne,
i ka ndaf udan ma natrumpu ni kabanir,
ma ka ndaf udan a nbal la naisi ni lete ma nangafel.
Mpe keta ndaf dedesar terik ma nal let isnir a ne.
8 Ma kmi a nbal e ka msyabar ma mifkoran dalmir,
fali to dodo a nbal e Yesus ninr Mangnrure nma lo.
9 Soranyar,
ka kete nroke nraki kmi ma mfyasale kmi,
nema Ratu kete nukun a kmi.
Fali ni botuan e Ratu,
ninr Mangtetak a ne sesedin ma nma lo.
10 No msyalan nabyar ma luryain e Ratu nsiduk sir ma rafwibar Ni ngribatnir a ne.
Boloka sir rkoman susar nempa rsabar ma rabare susar a ne.
Mpa soranyar,
ka myose mlyarat sir.
11 Fali ni botuan e kit tfalak tomwatar ma bonir ral ma rabare suse ne feti sir rsenang resi.
Kmi mdyengar na Ayub lo nre,
i dedesar ma nsabar ma nabare ni suse terik ma Ratu nberkat i.
Ratu nose farane fali dalam ngamone ma nlompang tomwatar.
Kete msyompe ma ka msyampayang ber mangafansar
12 Soranyar,
mdyengar fengamone safe ma kfwalak ye fali snyurat ye uban desar nlengan nof snyurtar monuk ma kfwalak a ne.
Ka kete mlyang langit,
saryamprene nre safe-safe motak la mifkoran safe ma mfyalak a ne.
Farlan botuan e,
ka mfyalak feti,
“Au,
botuan” ma farlan tate e,
ka mfyalak feti,
“Tate” nema Ratu kete nukun a kmi.
13 Farlan tomwatar sa nof a kmi ye nkoman suse e ka nsampayang.
Ma farlan tomwatar sa ma nsenang e ka nbeu la ndangin Ratu.
14 Ma farlan tomwatar sa ma nafanas,
ka ntak mangonbain gerejar ma rsampayang ber i ma ral ngule la rsok i ror Yesus ninr Mangnrure ngarany.
15 Farlan mangonbanir a ne ralele botuan Yesus ninr Mangnrure keta rsampayang e mangafanas a ne nangamon,
ma farlan i nose sale e keta Ratu nlure i.
16 Mpa ka mbyet mpane mir salar ma sa nsampayang ber sa nema mingamon.
Noak ma tomwatar ma rmorip a rlarat Ratu Ni mpempeang a ne rsampayang,
keta Ratu nfatutu Ni kuase ma nbali nir tatakar a ne.
17 Minremi nabi Elia ne nre!
I ye tomwat biase farlan kit a nbal.
Nempa noak ma nsampayang nor dalam kateman,
ma ntak ma udan to ntompur,
mpe udan to ntompur desar terik ngarkar tely lian.
18 Ne i nsampayang a nbal ma ntak udan,
mpe udan desar,
nwayat ma kabanir ratrump a rbali.
19 Soranyar mir kateman,
farlan tomwatar sa nof a kmi to nlarat Ratu Ni anftutw botunar,
ma tomwatar sa nma ma nsurat i nema nbali i ber Ratu,
20 ka minremi,
“tomwate ma nsurat wainy ma ntate nir salar a ne,
iane nfair i nof ni salar.
Ma nose ma Ratu to nukun i.
Ma nose nbal ma Ratu nlure tomwate ne ni salar ma yadin a ne.
Salam nof yakw,
Yakobus.