Kete misalan sou
1 Soranyar mir kateman,
Yesus ninr Ray Silai,
I a ne kit ninr Mangnrure ma tomwatar rdangin I.
Ma milele I a mpa ka kete misalan sou.
2 Contoh sa farye:
Noak ma mifburat a kmi e mangoskayar sa nma.
I nfonak rabit ngafele numur toslyangan mase.
Ne tomwat sa nma nbal.
Tomwate ne nawatan ma nfonak rabit yatak.
3 Ne kmi myalang tomwate ma nfonak rabit ngafele ne mpa noak ma nma e mfyalak ber i,
“Amangw,
mwa mumtoran kadere ye.”
Nempa ber tomwate ma nawatan a ne kmi mfyalak,
“Mtwi mumdir yo!”
nre “Mumtoran motak bab!”
4 Farlan myose farane ber tomwatar iane misalan sou.
Ma mir andaun yatkar mpa msyalan sa nlengan nof sa.
5 Soranyar mir kateman ma kwamis a kmi,
mdyengar fengamone!
Ratu nfil tomwatar ma rawatan a na saryamprene ye,
ma nose ma rtafal ma ramkoran ma ralele I.
I nfil sir ma ronri berkat noak ma neluk Rai ma nfarete sir farlan ma nyoding ber tomwatar ma rkamis I a ne.
6 Nempa kmi mifmeat desar tomwatar ma rawatan.
Ma myalang lan mangoskayar safo sir a ne ma rtean a kmi ma rakei kmi far mangtetak.
7 Ma sir ye ma rfalak kabain yatkar ma rafmpusuk Yesus ngarany.
Safo ngarany ne Ratu nal ber a kmi la nfatutu feti Ni tomwatar ber a kmi,
iane ngarany ma tomwatar rdangin.
8 Na Kitap Lelerap dalam rarengi feti,
“Ka mkyamis tomwatar farlan ma mkyamis a kmi a mbyali.”
Farete ye ma uban desar nof Ratu Ni faretar monuk.
Mpa farlan kmi myose mlyarat farete ne iane myose ngamone lo.
9 Nempa farlan misalan sou tomwatar,
iane myose sale ma mlyangas Ratu Ni faretar lo.
10 Fali ise ma nose nlarat monuk Ratu Ni faretar nempa nlanre lese motak e iane nlanre monuk Ratu Ni faretar lo.
11 Ratu nfalak Ni farete farye,
“Kete milalin” ma nfalak a nbal “Kete mifen.”
Mpa farlan to milalin nempa mifen iane mlyanre Ni faretar monuk.
12 Kit tafai feti Ratu keta nukun kit nlarat yayatrwar ma bise nalin kit nof ninr salar.
Mpa ka tajake ninr tnyangkwar ma ninr wewelmpampane.
13 Fali noak ma Ratu nukun saryamprene,
I keta to nlompang tomwatar ma to nir lolompang ber tomwatar,
ma nukun sir.
Nempa tomwatar ma nir lolompang ber tomwatar,
keta Ratu to nukun sir.
Ninr adat ngamonar nfatutu feti talele Ratu
14 Soranyar mir kateman!
To uban ber tomwate ma nfalak feti i nalele Yesus ninr Ray silai nempa to nose nlarat Ni mpempeang.
Ni botuan e tomwate ma nalele Ratu nor dalam tubun ma farane Ratu keta to nfair i nof ni salar.
15 Contoh sa farye,
mir soranyar sa ma lerar e to ni tnyam ma to ni rabit.
16 Ne kmi mfyalak ber i,
“Mbwali ko mor maline lo ma mfwonak ko,
ma mtwame ma mubotan!”
Farlan mfyalak farane motak nempa to myal safe ma nperlu a ne iane to uban.
17 Mpe feleles farlan tomwate ma nfalak feti nalele Yesus ninr Ray Silai nempa to nose nlarat Ni mpempang keta safe ma nfalak a ne to uban.
18 Nempa farlan tomwatar sa nfalak,
“Tomwatar ketnir a ne Ratu nfair sir fali ralele lan Yesus ninr Ray Silai,
ma ketnir a nbal e Ratu nfair sir fali rose lan kabain ngamonar.”
Mpe keta kfwalak ber i,
“Farlan to mose kabain ngamonar,
ko to bise ma mfwatutu feti mulele Yesus ninr Ray Silai,
nempa yakw e bise ma kfwatutu feti kulele Yesus ninr Ray Silai kof kabain ngamonar ma kose ne.”
19 Kmi milele feti Ratu lan lese.
Iane nangafel.
Nempa smwangat yatkar a ne ralele farane nbal.
Iane nwayat ma ramtaut ma rngangasar.
20 Hei modar a kmi!
Kmi mpyeang ma kfwatutu ber a kmi e,
feti to uban ma mfyalak feti milele Yesus ninr Ray Silai nempa to myose mir adat ngamonar.
21 No msyalan empninrar Abraham.
Ratu nlangun i ma nfadiat i na soun lury fali safe ma nose ne,
noak ma nau anaky Ishak na snyompe ain ber Ratu.
22 Kit tafai safe ma Abraham nose ne lo nre!
Safe ma nose ne nfatutu feti nalele Ratu.
Abraham dedesar ma nlarat Ratu Ni mpempeang,
ma iane nfatutu feti nalele botuan Ratu nor dalamy katemany.
23 Iane farlan ma luryain e rarengi na Kitap Lelerap dalam feti,
“Abraham nalele Ratu,
mpa nlangun i ma nafdiat i nof ni salar.
Iane nwayat ma i neluk Ratu tbwariny.
24 Mpa Ratu to nafdiat tomwatar nof lan ma ralele I.
Nempa ni botuan e nafdiat sir ma ralele I ma rose kabain ngamonar a ne.
25 No msyalan a nbal Rahab,
bat yatak a ne.
Ratu nafdiat i nof ni salar fali kabain ngamone ma i nose.
I ntulung tomwat Israelar ketnir ma namudim sir na ni das.
Sir a ne rma ma ranaumat ni pnue nempa nfatutu dalamten walyete ber sir ma rbie rof pnue ne.
26 Mpa farlan tfalak feti talele Ratu nempa to tose ninr adat ngamonar iane to uban.
Feleles farlan tomwatar ma to smwangtir iane feti rmat lo.