Ka Tajake Sukninrar Fengamone
1 Soranyar mir kateman!
Ka kete mpyeang ma myeluk monuk tuanggur agamar.
Fali kmi mifai feti Ratu keta nsidang tuanggurwar a ne maberat a nlengan nof tomwat walyetar.
2 Fali kit monuk ye dedesar ma tose sale.
Mpa ise ma to lain sa ma natanuk sale ber tomwatar,
keta to bise ma rfasale i fali nliak nal tenany.
3 Contoh farlan kude,
ka tkete sukan tor tali nema bise nlarat ninr mpempeang.
Farlan tose farane bise ma tfarete i motak.
4 Farlan kaplar sa na dol.
Boloka kabal a ne silai i ma mnaur silai bise ma nafpwane i,
nempa mangomat wilin bise ma nfule kabal a ne nor wilin ma kayanak a ne nlarat ni mpempeang.
5 Farlan kerninrar a nbal boloka kayanak i nempa kit bise ma tpaki i la tafdas kit na kabain silayar.
Feleles farlan au boloka marumat i nempa bise ma nane nafere alas silayar sa.
6 Kerninrar ye bise ma nafyatak kit feleles farlan au.
Kerninrar ye namin teninrar nempa nof lan kerninrar,
teninrar monuk bise ma nayatak.
Kerninrar ye farlan au nof neraka,
ma bise nafyatak monuk ninr momorip.
7 Kit bise tafmaup monuk binatngar ma rtalir,
ma rlar,
ma rmorip a na dol,
ma mangkyar,
fali tomwatar rafmaup sir lo.
8 Nempa kit to tafmaup tal kerninrar.
Ma to tomwate fen lese ma najake nal kerin.
Fali kerninrar ye nayatak ma nfen ber racun ma bise nfen kit.
9 Kit tpaki kerninrar la tdangin ninr Mangnrure iane Amninrar Ratu.
Ma tpaki nbal ma tangoak tomwatar ma Ratu nose sir nlarat I felan a ne.
10 Boloka sukninrar lan lese nempa tpaki la tdangin Ratu ma tangoak tomwatar.
Mpa soranyar ka kete tose farane.
11 No mdyaun,
wey matnir sa bise ma nmpumput wey matelas ma weye ma mamal e?
12 Farlan katutun ara nbal keta to buany zaitun,
nre katutun anggur keta to buany ara.
Feleles farlan weye matany matelas keta to nmpumput weye ma mamal.
Andaun ngamone nof Ratu
13 Soranyar,
farlan nof a kmi e tomwatar sa ma ni andaun ngamone ma ni anfai nres,
ka i nfatutu na ni wewelmpampane ma kabain ngamonar ma nose.
Ma ka nmarkein ma nose kabanir a ne nor ni andaun ngamone.
14 Nempa farlan mikaden a kmi ma mdyaun lan tenmir,
kete mifdas a kmi myor mir andaun ngamone ma mir anfai ne.
Farlan myose farane iane feti mlyepusuk ma mlyangas Ratu Ni anftutw botunar.
15 Ratu to nal andaun ngamone ma farane.
Nempa andaun ngamone ma farane iane nof lan saryamprene,
ma mir makeus,
ma nof smwangat yatkar.
16 Fali farlan mikedan a kmi ma mdyaun lan tenmir keta myose kabain yatkar yadin ma myose mbyal ma nuse mayoi mayai.
17 Nempa tomwate ma Ratu nal andaun ngamone ber i ka ni adat farye:
dalam nanglerap,
nmorip e nangamon nor tomwatar,
nmarkein,
ma nalarat liry.
I ka ni lolompang ber tomwatar,
nose kabain ngamonar,
to nasalan sou,
ma sukan to ntarful.
18 Tomwate ma nmorip e nangamon nor tomwatar ma nose ma tomwat walyetar rangamon ror tomwatar,
iane feleles farlan mangosboe ma ngabo ma ntanam ni lete keta nait e ni lete ne nangafel.