Yakobus ni surat
Salam
1 Ye surat nof yakw Yakobus.
Yakw ye Ratu ma Yesus ninr Ray Silai Nir mangkaryae.
Ma Yesus ye ninr Mangnrure nbal.
Salam ber tomwatar monuk ma ralele Yesus ma ramin mpenempen.
Ka dedesar ma milele Ratu noak ma mtyungan anteman
2 Soranyar mir kateman,
farlan mtyungan anteman yadin e,
ka mlyangun myor dalmir senange.
3 Fali koko kmi mifai lo nre!
Farlan kmi mtyungan anteman nempa milele dedesar Ratu,
keta bomir myal anteman a ne ma mtyafal ma mimkoran.
4 Mpa ka dedesar ma mimkoran ma milele Ratu,
nema bomir myal anteman,
ma tomwatar to bise ma rfasale kmi fali mir momorip nanglerap.
5 Ma farlan mkyoman suse ma to mifai ma myose farpe ka mtyak Ratu ma nal andaun ngamone,
mpe keta nal ber a kmi fali Ni dalam ngamone ma Ni lolompang ber tomwatar monuk.
6 Ma farlan msyampayang ma mtyak Ratu ma nal andaun ngamone ber a kmi e ka milele botuan ma kete dalmir tubun.
Fali tomwate ma to nalele botuan a ne i farlan lalawar na dol ma rlalau far dol far da.
7 Tomwate ma farane ka kete nalele feti keta nonri safe ma ntak nof Ratu ninr Mangnrure ne.
8 Fali to nalele botuan Ratu mpa keta ni andaun to ntai na safe kabain ma nose ne.
Tomwate ma nawatan ma tomwate ma naoskai
9 Soranyar mir kateman,
boloka miwatan nempa ka dedesar ma msyenang fali Ratu nafdas a kmi lo.
10 Ma ber kmi ma mioskai nbal,
ka msyenang farlan Ratu nafufu kmi ma nose ma to mir sasaf,
fali mangoskayar a ne keta nir momorip to dodo,
farlan uru fus ma namtabar.
11 Noak ma lere nfardue langit ma mefanas resi nwayat ma uru ne naplay ma fus a ne namtabar mpa to nangafel e lo.
Iane farlan mangoskayar ma lolone rurus nir safe-kabain ma metrat e rmat lo.
Ka mifkoran dalmir noak ma mtyungan anteman
12 Ngamone ber tomwatar ma bonir ral anteman.
Fali farlan bonir ral anteman lo keta Ratu nal momorip dedesar ber sir,
far ma I nyoding ber tomwatar ma rkamis I a ne.
13 Farlan tomwatar sa ntungan anteman ma nose kabain yatkar,
ka kete nfalak feti Ratu nteman i ma nose kabain yatkar a ne.
Fali to tomwate fen lese ma nteman nal Ratu ma nose kabain yatkar,
ma I to nateman tomwate fen lese nbal ma nose kabain yatkar.
14 Ma ni botuan e tomwatar rtungan anteman ma rose kabain yatkar,
fali nir makeus yatkar dedesar ma nkete sir,
nwayat ma rdaun lan kabain yatkar.
15 Ma farlan rlarat nir makeus yatkar a ne keta sir rose sale.
Ma farlan rose sale dedesar keta famudi e rmat na neraka dalam.
16 Soranyar mir katemany,
farlan tomwatar rfalak feti Ratu nteman a kmi ma myose kabain yatkar e,
ka kete milele sir!
17 Fali safe-safe monuk ma rangafel ma kit tonri ne iane nof lan Ratu ma namin surga.
Ratu ne ma nose kabanir ma itkir na langit.
Kabanir a ne keta ralikur sir ma itkir ma to itkir,
nempa Ratu Ni ngamone ber kit a ne to terik,
ma to far kabanir ma ralikur sir a ne .
18 I nal kit neluk angkir nlarat Ni mpempeang,
fali tlangun Ni anftutw botunar,
iane Ratu Ni ngribatnir.
I nose farane nema bise ma tlengan tof safe-safe monuk ma I nose.
Ka tdengar Ratu Ni ngribatnir ma tose tlarat
19 Soranyar mir kateman ma kwamis a kmi,
mdyengar fengamone!
kmi ka misnyalik ma mdyengar,
nempa ka kete misnyalik ma mitanuk ma mires.
20 Fali tomwate ma nares keta to bise ma nose kabain ngamonar nlarat Ratu Ni mpempeang.
21 Mpa myebas monuk mir adat yatkar ma kabain yatkar.
Ma noak ma mdyengar Ratu Ni ngribatnir ma I nau na dalmir a ne kete mifdas a kmi.
Fali ngribatnir a ne ni kuase ma nalin kit nof ninr salar nema Ratu to nukun kit.
22 Mpa ka kete mdyengar motak Ratu ni ngribatnir nempa ka myose mlyarat.
Fali farlan to myose mlyarat iane mlyepusuk a mbyali kmi.
23 Fali tomwate ma ndengar motak Ratu Ni ngribatnir nempa to nose nlarat,
i farlan tomwate ma ntot a nbali souny.
24 Lama ntot monuk souny ma nbali e,
namlufe desar felan lo.
25 Ratu Ni ngribatnir a ne to fen lese ma sale.
Ma Ni ngribatnir a ne ni kuase nbal ma nalin tomwatar rof salar nema Ratu kete nukun sir.
Mpa tomwate ma dedesar ma nfarnyobak fengamone Ratu Ni ngribatnir a ne,
ma nose nlarat,
keta Ratu nberkat i na safe-safe ma nose.
26 Tomwate ma nfalak feti nlarat monuk agame ni yayatrwar nempa to najake sukan,
i nlepusuk a nbali i,
ma to uban ma nlarat agame ni yayatrwar a ne.
27 Tomwate ma nlarat botuan agame ni yayatrwar ma nanglerap na Ratu soun lury iane feti nsalan kanak watkar ma bat somar ma rawatan.
Ma ka najake i nema kete nlarat kabain saryamprenar.
Farlan nose farane iane nafsenange Ratu dalamy.