Paulus ni surat ber Filemon
Salam
1 Ye surat nof yakw Paulus, ma waninrar Timotius, ber Filemon ko ma mkamis resi ko, ma taktem a tkarya ber Yesus. Yakw ye kumin sel fali kufwibar ibar na Yesus ninr Ray Silai. 2 Yak kurengi surat ye nbal ber Apfia ma tal i a teluk urninrar, ma ber tbwarninrar Arkhipus ma taktem a tabare susar monuk noak ma tafwibar ibar na Yesus. Ma surat ye nbal ber tomwatar monuk ma ralele Yesus ma biase rafburat sir a na nim das.
3 Kam mtak ma weni Amninrar Ratu ma Yesus ninr Ray Silai rfatutu nir dalam ngamone, ma ral maline ber a kmi.
Paulus nose alang ber Ratu
4 Waingw Filemon, noak ma yak kswampayang e to kumlufe ko. Ma yak kose alang dedesar ber Ratu ma kswatngur ber I a ne, 5 fali yak kdwengar feti ko mkwamis tomwatar ma ralele Yesus, ma dedesar ma mulele Yesus ninr Mangnrure. 6 Waingw, kit tatbwarin lo fali taktem ma talele ninr Ray Silai. Ma yak kswampayang nema nof ma tatbwarin a ne, kit monuk bise ma tafal ma tkaul tal kabain ngamonar ma Ratu nal ber kit fali dalminrar lese tor ninr Ray Silai. 7 Ko nim ankamis ber tomwatar ma ralele Yesus ne nose ma yakw kswenang resi ma dalangw namkoran. Ma kswenang a nbal fali ko mose ma tomwatar monuk ma ralele Yesus rsenang.
Paulus ntak Filemon ma nlangun a nbali ni kawar Onesimus
8 Waingw Filemon, ni botuan e bise motak ma kfwarete ko ma mose safe-safe motak fali ningw kuase nof ninr Ray Silai. 9 Nempa to kose farane fali yak kwamis ko, ma ko a nbal e mkwamis resi tomwatar ma ralele Yesus mpa ni ngafele e yakw ktwak kof ko. Ma yak ktwak ma mose farane nbal fali yakw ye kumaken lo ma lere ye yakw kumin sel fali kufwibar ibar na Yesus ninr Ray Silai. 10 Yakw ktwak ko ma mswalan Onesimus. Yak kal i a kweluk anakw lo fali kuftutu i ma nalele Yesus ninr Ray Silai noak ma kumin sel. 11 Luryain e i to uban ber ko, nempa lere ye i uban desara ber tadu.
12 Ma lere ye yakw klwuan anakw ma kwamis resi i a ne ma nbali i ber ko. 13 Ni botuan e kpweang ma ktwayan i ma nlikur ko. Yak kose farane nema bise ma ntulung yakw noak ma kumin sel fali kufwibar Ibar Ngamone na Yesus. 14 Nempa to kose farane fali ko to myoding a fuky. Yak kpweang ma mtwulung yakw mlwarat nim suke ma kete mtwulung yakw fali kpwaksa ko.
15 Nre kete Ratu nose ma nakese Onesimus far dodo nof ko nema i bise ma nalele Ray Silai, ma ko bise ma mlwangun i a mbwali terik ma dedesar. 16 Luryain e i neluk kawar, nempa lere ye nlengan nof kawar fali neluk waninrar ma tkamis i ma taktem a talele Ray Silai. Koko yakw desar e kwamis i, ma keta ko e mkwamis i nlengan a nbal, fali i ye nim kawar ma waim, ma miktem a milele ninr Mangnrure.
17 Farlan mdwaun feti yakw ye tbwarim ma taktem a tkarya ber Ratu, ktwak desar ma mlwangun i farlan ma mlwangun yakw nbal. 18 Ma farlan nose sale nre ni utngar a na ko e mwal monuk ber yakw ma kubare. 19 Yakw Paulus. Koko yak ma kurengi feti keta kbwaras monuk ni utngar a ne. (Ma ko e kete mumlufe nim utang na yakw fali kuftutu ko ma mulele Ray Silai nema bise ma monri momorip dedesar). 20 Waingw, kit taktem talele ninr Mangnrure mpa yak ktwak desar kof ko ma mtwulung yakw ma mlwangun a mbwali Onesimus, nema dalangw a nsenang fali dalminrar lese tor Ray Silai lo.
21 Yakw kurengi surat ye ber ko fali kulele feti keta mose mlwarat safe ma yak kfwalak ye, ma keta mose mlengan a nbal. 22 Yak ktwak a nbal ma ka mnau anir sa na nim das ber yakw, fali kulele feti keta Ratu ndengar mir sampangar a ne ma nose ma tabut kit a tbali.
Salam penutup
23 Filemon, tbwaringw Epafras ma maktem a mamin sel ye nkirim salam ber ko. I namin sel fali nafwibar ibar na Yesus ninr Ray Silai a nbal. 24 Ma Markus, Aristarkhus, Demas ma Lukas ma maktem a mkarya ne, rkirim salam ber ko a nbal.
25 Yakw ktwak ma weni Yesus ninr Ray Silai nfatutu Ni dalam ngamone ber kmi monuk. Nater lan ye. Salam nof yakw, Paulus.