Inyarubha ya Pawuro
ku‑Bhayefeeso
Obhutangati
Inyarubha inu, ꞉yaakaamirwe na Pawuro, itumwa ya Yeesu Kirisito, inguru ya abheekirisya bha Yefeeso. Inyarubha ku‑Bhayefeeso na inyarubha ku‑Bhakorosaayi ꞉jaakaamirwe mwanya gumwi. Pawuro ꞉aakaamiiye abheekirisya bha Yefeeso, noorwo kutyo inyarubha inu itari na obhukeesya ku‑muunu noorwo umwi rwa kutyo inyarubha ku‑Bhakorosaayi eyitogora. Ku‑songa eyo, eyiturikana ati inyarubha ku‑Bhayefeeso yaariga ikarariiywe iyiinde na okusomwa mu‑makanisa amarebhe ganu gaariga gari mu‑mukoowa ogwo. Ka wone, Pawuro keeresya ati aariga abhoyerwe mw‑ibhoyero omwanya gunu ꞉aakaamire inyarubha inu (3:1, 4:1, 6:20). ꞉Aayaaye Tukiiko inyarubha eyo, ˆnaagenda nayo mu‑rugendo rwaye rwa okugosorera rikanisa rya Yefeeso (6:21-22).
Yefeeso gwariga guri musi mukuru na obhwikaro obhukuru bhwa Echiruumi mu‑mukoowa gwa Asiya Inooto. Omusi ogwo gwariga gumenyekeene muno inguru ya riyekaru ryagwo rinu ryariga ryawuuywe inguru ya risambwa rigasi rya Echiyunaani. Risambwa eryo ryatogwaga Ariteemi (Ebhikorwa bhya Jitumwa 19:23-31). Rikanisa rya Yefeeso ryariga riri na eriikirisya enene omwanya gunu ꞉ryambisiibhwe, nawe ndikingira omwanya nirikeeyerwa amanaga gaaryo ga eriikirisya rya ku‑bhwambiro (Obhusweruro 2:1-7).
Pawuro keeresya mu‑muryango gwa 1‑3 kutyo Nyamuwanga ꞉aawuuwe abhaanu na okubhachungura okusooka mu‑bhibhiibhi bhyebhwe ku‑njira ya Yeesu Kirisito. Kaasusanya rikanisa na omubhiri, na Kirisito rwa omutwe gwaryo. Ka wone, kaasusanya rikanisa na inju, na Kirisito rwa ribhuyi rinene rya orufuka rwa inju eyo. Mu‑muryango gwa 4‑6, Pawuro keeresya inguru ya okurama obhurame bhwa Echikirisito.