Inyarubha ku‑bhaanu bha mw‑ikanisa rya Yefeeso
2
1 Omuunu oyo, ˆnaagenderera okwayika ati, “Ukaamire maraayika wa mw‑ikanisa rya Yefeeso kutya,Anye niri na jinjota jirya etaanu na ebhiri mu‑kubhoko kwani kwa ebhuryo, anye eniribhataga agatigati ya ebhituumo bhitaanu na bhibhiri bhirya bhya inaaryo bhya okwikasya‑mo jidara. Mutegeresye jinu enibhabhwira!
2 Enimenya ebhikorwa bhyemwe, okwikomeesya kwemwe na obhwigumiirisya bhwemwe. Enimenya wone ati mutakutura okwigumiirisya abhaanu abhabhiibhi. Ka wone, mwaregeejere abhaanu bhanu abheetoga ati ni jitumwa, keenu bhatari jitumwa.a Mwabharegeeja, nimusongʼana ati, ni bhabheeyi. 3 Ka wone, enimenya ati, mwanyaakire muno inguru yaani, nawe mwigumiirisiisye, noorwo woori muchaari okuyigwa.
4 Nawe, muri na omusango gumwi gunu guchaannyaasya. Musigire eryenda ryemwe rinu mwariga muri naryo omwanya gunu ꞉mwaambire okunnyikirisya. 5 Mwichuke kutyo mwariga muri muchaari okusiga eryenda ryemwe. Mukamara mute ebhibhiibhi bhyemwe, mukore rindi jinu mwariga nimukora omwanya gurya. Mukarema okuta, niribhaaja‑ko na okusoosya‑wo echituumo cheemwe cha okwikasya‑mo jidara. 6 Nawe guri‑wo omusango gunu omukora kisi. Omufuruurusibhwa na emisango emijabhi jinu Abhanikoraayib abhakora. Ejo ejinfuruurusya muno noorwo anye wone.
7 Unu kaategeresya, noongwe emisango jinu Mwoyo Mweru kaabhwira amakanisa. Woonewoone unu ariyiga, nirimwikirisisya okurya amatwasyo ga riiti rinu erisoosya obhuwanga bhwa akajaanende koone. Riiti eryo riri mu‑rwire mw‑isambu rya Nyamuwanga.c
Inyarubha ku‑bhaanu bha mw‑ikanisa rya Simuriina
8 “Ukaamire maraayika wa mw‑ikanisa rya Simuriina kutya,
Anye niri wa okwamba na owa obhuteero. ꞉Naafuuwe, ninsuuruka! Mutegeresye jinu enibhabhwira!
9 Enimenya ebhinyaasyo bhyemwe na obhutaka bhwemwe. Nawe chimari emwe muri bhaniibhi! Ka wone, enimenya amafumo ganu omufumwa. Amafumo ago agasoosibhwa na bhanu abheetoga ati, ni bhaana bha Nyamuwanga, nawe bhatari abhaana bha Nyamuwanga, abheene ni bharuubhirisya bha Syetaani.d 10 Musige okuubhaya ebhinyaasyo bhinu bhiribhaaja‑ko. Muringire! Syetaani aribharegeeja kwa okutuura abhandi agati yeemwe mw‑ibhoyero. Emwe murinyaaka siku ekumi. Nawe mubhe abheeyikanyibhwa kw‑anye noorwo okukingira mufwe, anye niribhayaana orutengya rwa obhuwanga bhwa akajaanende koone.
11 Unu kaategeresya, noongwe emisango jinu Mwoyo Mweru kaabhwira amakanisa. Omuunu woonewoone unu ariyiga, atarikuunibhwa‑ko noorwo kutooto na orufu rwa kabhiri. Orufu orwo nirwo omuriro gwa akajaanende koone.e
Inyarubha ku‑bhaanu bha mw‑ikanisa rya Perigaamo
12 “Ukaamire maraayika wa mw‑ikanisa rya Perigaamo kutya,
Niri na imbanda eya amoogi gabhiri. Mutegeresye jinu enibhabhwira!
13 Anye enimenya ati, mwikaaye anu Syetaani atungire. Nawe omugenderera okwikirisya risiina ryani. Noorwo omwanya gurya omubhambaasi waani omwiyikanyibhwa Atipaasi, ꞉eetiiywe mu‑musi gwemwe gwa Perigaamo anu Syetaani eekaaye, ꞉mutaanyigaanire wuri.
14 Nawe, muri na emisango emitooto jinu jichaannyaasya. Agati yeemwe bhari‑wo abhaanu bhanu abharuubha ameeyigisyo ga Bharaamu. Bharaamu oyo, ꞉eeyigisiisye Bharaaki okuteganya Abhayisirayeeri korereki bhakore echibhiibhi cha okurya ebhiryo bhinu bhyariga bhisoosiibhwe echoogo ku‑masusano na okukora obhuromesi.f 15 Nyabhuriko, bhari‑wo abhandi agati yeemwe bhanu abharuubha ameeyigisyo ga Abhanikoraayi. 16 Mbe mute ebhibhiibhi bhyemwe! Mukarema okuta, niribhaaja‑ko bhwangu korereki nirwane na abhaanu abho ku‑mbanda inu eyisooka mu‑kanwa kaani.
17 Unu kaategeresya, noongwe emisango jinu Mwoyo Mweru kaabhwira amakanisa. Omuunu woonewoone unu ariyiga, nirimuyaana ribhaara rya ebhiryo bhya emanug inu ibhisirwe. Nirimuyaana wone ribhuyi eryeru. Ribhuyi eryo rikaamirwe‑ko risiina riyaaya. Atari‑wo omuunu unu arimenya risiina eryo, tari unu ariyaanwa ribhuyi eryo.
Inyarubha ku‑bhaanu bha mw‑ikanisa rya Tiyaatira
18 “Ukaamire maraayika wa mw‑ikanisa rya Tiyaatira kutya,
Anye, naanye Omwana wa Nyamuwanga.h Ameeso gaani gari rwa jimbeesi ja omuriro na amaguru gaani agangʼarabhya muno rwa echuuma echitukurasi chinu chikuubhirwe muno. Mutegeresye jinu enibhabhwira!
19 Enimenya ebhikorwa bhyemwe. Enimenya wone eryenda ryemwe, eriikirisya ryemwe, obhukosi bhwemwe na obhwigumiirisya bhwemwe. Ka wone, enirora ati, emwe woori omukora kisi muno, okukira kutyo mwariga nimukora ku‑bhwambiro. 20 Nawe, muri na omusango gumwi gunu guchaannyaasya. Emwe omwikirisisya omugasi unu kaatogwa ati Yejebheeri. Omwene keetoga ati ni omuragi, nawe atari omuragi. Mumwikirisiisye abhajige emwe abhakosi bhaani, kwa okubheeyigisya mukore obhuromesi na okurya ebhiryo bhinu bhisoosiibhwe echoogo ku‑masusano. 21 Anye naamuyaana omwanya agwa okuta ebhibhiibhi bhyaye, nawe omwene atakwenda okusiga obhuromesi bhwaye. 22 Mutegeresye! Woori ku‑songa eyo, nirimuteemera obhurwaye bhunu bhurikora asige okusooka ku‑bhuriri. Bhoone bhanu abhakora obhuromesi aamwi nage, aribha bhaarema okuta ebhikorwa bhyebhwe ebhibhiibhi, niribhanyaasya muno. 23 Ka wone, chimari niriita chimwi abharuubhirisya bhaaye. Niwo abhaanu bha amakanisa goone bharimenya ati, anye enitatirisya kisi omutima na obhwiganirisya bhwa bhuri muunu. Ka wone, niririya bhuri owumwi weemwe okuruubhana na ebhikorwa bhyaye.
24 Woori emwe mw‑ikanisa rya Tiyaatira, agati yeemwe bhari‑wo abhandi bhanu bhari abheeyikanyibhwa. Abhaanu abho bhatakuruubha ameeyigisyo ga Yejebheeri oyo, noorwo bhatakumenya emisango jinu abhaanu abhandi abhatoga ati ni emisango ja imbisike muno. Chimari emisango ejo ni meeyigisyo ga Syetaani! Tari abhaanu abheeyikanyibhwa bharya, enibhabhwira ati, nitaribhoongesya‑ko omugugu ogundi, 25 tari mubhe abheeyikanyibhwa okukingira anu niriija.
26 Omuunu woonewoone unu ariyiga na okugenderera okukora okwenda kwani okukingira ku‑bhuteero, nirimuyaana obhuturo bhwa okutunga amaanga goone. 27 Aribhatunga kwa okubhafyetura jisimbo ja echuuma, aribhaata bhabhe bhibhaarabhaara rwa ebhiyaamba bhya jimbiga.i Aribhona obhuturo rwa kutyo anye ꞉naaramiiye obhuturo okusooka ku‑Raata waani. 28 Ka wone, nirimuyaana rinyamaananga.j
29 Unu kaategeresya, noongwe emisango jinu Mwoyo Mweru kaabhwira amakanisa.”