Inyarubha ku‑bhaanu bha mw‑ikanisa rya Sariidi
3
1 Niwo omuunu oyo ˆnaagenderera okwayika, ˆnaambwiraga ati, “Ukaamire maraayika wa mw‑ikanisa rya Sariidi kutya,Anye, naanye nitungire emyoyo etaanu na ebhiri ja Nyamuwanga na niri na jinjota etaanu na ebhiri jirya. Mutegeresye jinu enibhabhwira!
Enimenya ebhikorwa bhyemwe. Muri na jikuma ja okubha abhaanga echinyamwoyo, keenu mufuuwe. 2 Mubhe mutengeejere! Murumatanye emisango emitooto ja ekisi jinu jichaari okufwa, kwa okubha ejeene wone jiri yeeyi okufwa. Enirora ati ebhikorwa bhyemwe bhichaari okukuumira rwa kutyo Nyamuwanga waani keenda. 3 Mwichuke jinu ꞉mweeyigisiibhwe, nimujungwa. Mbe, muruubhe ejo na okuta ebhibhiibhi bhyemwe. Mukarema okutengeeja, niriija rwa kutyo omwifi kaaja na mutarimenya omwanya gunu niribhaaja‑ko.
4 Nawe mw‑ikanisa rya Sariidi eyo, agati yeemwe bhari‑wo bhatooto bhanu bhachaari okukootya emyenda jeebhwe kwa okukora ebhibhiibhi. Mbe, bharibha aamwi na anye na bharifwafibhwa emyenda emyeru, kwa okubha bheeyire bhafware kutyo. 5 Omuunu woonewoone unu ariyiga, nirimufwafya emyenda emyeru rwa abho. Nitarisoosya‑mo risiina ryaye kata mu‑chitabho cha obhuwanga,a tari nirimwikirisya imbere ya Raata waani na bhamaraayika bhaaye ati unu ni waani.
6 Unu kaategeresya, noongwe emisango jinu Mwoyo Mweru kaabhwira amakanisa.
Inyarubha ku‑bhaanu bha mw‑ikanisa rya Firadeefiya
7 “Ukaamire maraayika wa mw‑ikanisa rya Firadeefiya kutya,
Anye niwe omweru na wa echimari. Ka wone, niri na orwiguriro rwa omukama Dawudi.b Nikeegara orwigi, atari‑wo owundi unu kaatura okurwigura. Nikarwigura, atari‑wo owundi unu kaatura okurwigara. Mutegeresye jinu enibhabhwira!
8 Enimenya ebhikorwa bhyemwe. Mutegeresye! Anye naabheegurira orwigi na atari‑wo omuunu unu kaatura okurwigara. Enimenya ati muri na amanaga amatooto, nawe mugwatire ameeyigisyo gaani, noorwo ꞉muteegaanire risiina ryani. 9 Mutegeresye! Niribhareeta abharuubhirisya bha Syetaani. Abheene abheetoga ati ni bhaana bha Nyamuwanga keenu bhatari nibho, tari ni abhabheeyi. Mbe abho, niribhakora bhaaje bhabharamye. Niwo abho bhoone bharimenya ati nibheendere emwe.
10 Woori kwa okubha ꞉mwegumiirisiisye rwa kutyo ꞉naabharagiriiye, niribharinda omwanya gwa inyaako inu irireetwa ku‑chaaro choone okuregeeja abhaanu bhoone. 11 Eniija bhwangu! Mubhe abheeyikanyibhwa, korereki omuunu woonewoone aasiga okubhateesya orutengya rwemwe.
12 Omuunu woonewoone unu ariyiga, nirimukora abhe ingʼingi mw‑Iyekaru rya Nyamuwangac waani, wone atarisooka omwo rindi. Nirikaama inguru yaaye risiina rya Nyamuwanga waani na risiina rya omusi gwa Nyamuwanga waani. Omusi ogwo ni Yerusareemu inyaaya, gunu guriika okusooka mu‑rwire ku‑Nyamuwanga waani. Ka wone, nirikaama inguru yaaye risiina ryani riyaaya.
13 Unu kaategeresya, noongwe emisango jinu Mwoyo Mweru kaabhwira amakanisa.
Inyarubha ku‑bhaanu bha mw‑ikanisa rya Rawodeekiya
14 “Ukaamire maraayika wa mw‑ikanisa rya Rawodeekiya kutya,
Anye, naanye Jibhe kutyo, omubhambaasi omwiyikanyibhwa wa echimari inguru ya Nyamuwanga. Anye, naanye obhusimukwa bhwa ebhibhumbwa bhyone bhinu Nyamuwanga ꞉aabhumbire. Mutegeresye jinu enibhabhwira!
15 Enimenya ebhikorwa bhyemwe. Enimenya ati muri abha ribhirabhira. Ni akiri mwakanyiriiye jubhujubhu amwi mwakabhirire rugurugu! 16 Nawe kwa okubha muri na ribhirabhira, mutakubhira rugurugu noorwo mutanyiriiye jubhujubhu, enija okubhatanaka musooke mu‑kanwa kaani. 17 Omwayika ati, “Eswe chiri abhaniibhi. Chaniibhire muno. Chiri na bhuri echiinu chinu echikena!” Nawe mutakumenya ati emwe mutari na amanaga, muri bhaanu bha okufwirwa echigongo, muri bhataka, muri bhawofu, ka wone muri tuyu. 18 Kurwa ejo, enibhatongera mugure kw‑anye inaaryo inu yesiibhwe mu‑muriro korereki mubhe abhaniibhi. Mugure wone emyenda emyeru, muswikire obhutuyu bhwemwe korereki mutariiswara. Mugure omuti gwa okubhambaga ku‑meeso geemwe korereki mubhe na obhuturo bhwa okurora.
19 Anye, enigonya na okufyetura jisimbo abhaanu bhoone bhanu eneenda. Mbe, mwikomeesye na okuta ebhibhiibhi bhyemwe. 20 Mutegeresye! Anye niimereeguuyu ku‑muryango enibhirikira. Omuunu akoongwa obhuraka bhwani na okunyiigurira omuryango, eningira mu‑nju yaaye na okurya aamwi nage.
21 Omuunu woonewoone unu ariyiga, nirimwikirisisya okwinyanja aamwi na anye ku‑chitebhe chaani cha ingʼoma, rwa kutyo anye wone ꞉naayigire, woori niinyanjire na Raata waani ku‑chitebhe chaaye cha ingʼoma.
22 Unu kaategeresya, noongwe emisango jinu Mwoyo Mweru kaabhwira amakanisa.”