Nyamuwanga kaaramibhwa mu‑rwire
4
1 Ejo jejire jaawa, nindora echiroro echindi. Ringira! ꞉Naarorere orwigi rwiguuywe‑wo mu‑rwire! Mbe, obhuraka rwa bhwa ingʼombi bhunu ꞉noonguuwe obhwa okwamba nibhumbwira ati, “Iija, riinya inguru enu, korereki nikweresye emisango jinu ni bhusibhusi jikorekane aribha ejo jaatura.”2 Awoawo Mwoyo Mweru ˆneeka inguru yaani, nindora echitebhe cha ingʼoma mu‑rwire eyo chiyanjirwe‑ko omuunu. 3 Oyo aariga eenyanjire‑ko, aariga ˆnaangʼarabhya muno rwa irangi ya ekisi itukurasi ya amabhuyi ga obhugusi obhurambu. Echitebhe echo chaariga chiiyindirwe na rikoma rya ryabhaasi rinu ryariga niringʼarabhya muno rwa ribhuyi rya obhugusi obhurambu. 4 Ka wone, echitebhe cha ingʼoma echo chaariga chisingiywe na ebhitebhe ebhindi makumi gabhiri na bhina bhya obhutungi. Ku‑bhitebhe ebhyo, bhaariga bheenyanjire‑ko abhakaruka makumi gabhiri na bhana. Abhakaruka abho, bhaariga bhafwaye emyenda emyeru na ku‑mitwe jeebhwe bhaariga bhafwaye jitengya ja inaaryo. 5 Echitebhe cha ingʼoma echo chaariga nichisoosya jindabhyo na amabharuka. Imbere yaacho, jaariga jiri‑wo jidara etaanu na ebhiri nijaakaga. Jidara ejo, nijo emyoyo etaanu na ebhiri ja Nyamuwanga. 6 Ka wone, imbere ya echitebhe cha ingʼoma chaariga chiri‑wo echiinu wuti inyanja ya rirore. Inyanja eyo, yaariga iri rwa ribhuyi rinu eringʼarabhya muno.
Agati ya echitebhe cha ingʼoma na abhakaruka bharya, bhyariga bhiri‑wo ebhibhumbwa bhina ebhya obhuwanga. Ebhibhumbwa ebhyo bhyariga bhisingiiye echitebhe cha ingʼoma mbaara joone. Ka wone, bhyariga bhiswirire ameeso bhuri orubhaara ku‑mibhiri jabhyo. 7 Echibhumbwa cha okwamba chaariga nichisusana rwa itare. Echibhumbwa cha kabhiri chaariga nichisusana rwa iingʼa indume. Echibhumbwa cha kasatu chaariga chiri na obhusu rwa bhwa omuunu. Echibhumbwa cha kana chaariga nichisusana rwa ingʼona inu eyiguruka. 8 Ebhibhumbwa ebhina ebhyo, bhuri chimwi chaariga chiri na amabhabha gataanu na rimwi. Bhyone kutyo, bhyariga bhiswirire ameeso bhuri orubhaara, noorwo ku‑mabhabha. Ebhibhumbwa ebhyo bhyariga nibhiimba mu‑ngeta na mu‑mwisi okujibhira wuri. Orwimbo runu bhyembaga ni runu,
“Mweru, Mweru, Mweru
ni Raatabhugenyi Nyamuwanga owa obhuturo bhwone,
aariga ari‑wo, ari‑wo na aribha‑wo.”
9 Ebhibhumbwa bhina ebhyo bhyariga nibhikuuya, nibhiyaana echibharo na okusiima unu eenyanjire ku‑chitebhe cha ingʼoma. Omwene oyo, niwe omuwanga akajaanende koone. 10 Bhuri omwanya Nyamuwanga aariga ˆnaakuuyibhwa na ebhibhumbwa bhirya, abhakaruka makumi gabhiri na bhana bharya, bhaariga nibhagwa bhwifumbike imbere ya unu eenyanjire ku‑chitebhe cha ingʼoma na okumuramya. Omwene oyo, niwe omuwanga akajaanende koone. Wone bhaariga nibhafuura jitengya jeebhwe, nibhajituura imbere ya echitebhe cha ingʼoma, nibhaayikaga ati,
11 “Raatabhugenyi na Nyamuwanga weeswe, wiiyire ukuuyibhwe,
okuyaanwa echibharo na okubha na obhuturo bhwone.
Okubha awe ꞉waabhumbire ebhiinu bhyone,
mu‑kwenda kwawo ꞉bhyabhumbirwe, ka wone bhiri‑wo.”