Echitabho na Omwana wa Inaama
5
1 Nejire neeya, nindora unu aariga eenyanjire ku‑chitebhe chirya cha ingʼoma ari na echitabho mu‑kubhoko kwaye kwa ebhuryo. Echitabho echo, chaariga chikaamirwe mbaara joone ebhiri, ka wone chaariga chibhoyerwe na jimboyero etaanu na ebhiri ja obhurimbo. 2 Niwo nindora maraayika owa obhuturo bhwafu, ˆnaamura obhuraka ˆnaayikaga ati, “Niga unu eeyire okusuruumura jimboyero ja obhurimbo ejo na okufumbura echitabho echo?” 3 Nawe ꞉ataabheeye‑wo omuunu noorwo umwi, mu‑rwire eyo, amwi ku‑chaaro anu, noorwo mu‑nyombe eyo, unu aariga eeyire okufumbura echitabho echo na okuchisoma.4 Mbe, ninaamba okurira muno, kwa okubha ꞉ataabhonekeene omuunu woonewoone unu aariga eeyire okuchifumbura noorwo okuchisoma. 5 Niwo umwi wa abhakaruka bharya ˆnaambwira ati, “Siga okurira! Ringira! Itare ya mu‑ruganda rwa Yuuda,a unu ari orwibhuro orukuru rwa omukama Dawudi, ayigire. Omwene niwe eeyire okusuruumura jimboyero ja obhurimbo etaanu na ebhiri ku‑chitabho echo na okuchifumbura.”
6 Niwo nindora Omwana wa Inaamab eemereeguuyu ayeeyi na echitebhe cha ingʼoma. Wone aariga eyindirwe na ebhibhumbwa bhina bhirya na abhakaruka makumi gabhiri na bhana bharya. Omwana wa Inaama oyo, aariga ˆnaabhonekana wuti atemerwe omutwe. Ka wone aariga ari na amayembe gataanu na gabhiri na ameeso gataanu na gabhiri. Ameeso ago ni emyoyo etaanu na ebhiri ja Nyamuwanga jinu jaariga jitumirwe bhuri orubhaara ku‑chaaro choone. 7 Omwana wa Inaama oyo ˆnaagenda, ˆnaaramira echitabho chirya okusooka mu‑kubhoko kwa ebhuryo kwa unu aariga eenyanjire ku‑chitebhe cha ingʼoma. 8 Ejire aaramira echitabho echo, ebhibhumbwa bhirya na abhakaruka bharya nibhagwa bhwifumbike imbere yaaye. Bhuri umwi weebhwe aariga ari na indono na amabhakuri ga inaaryo geejuuywe obhubhaani. Obhubhaani obhwo niryo risabhwa rya abheeru bha Nyamuwanga.c 9 Nibheembira Omwana wa Inaama orwimbo oruyaaya runu rwayikaga ati,
“Awe wiiyire okuramira echitabho echo
na okusuruumura jimboyero jaacho ja obhurimbo.
Okubha awe ꞉waatemerwe omutwe
na ku‑sagama yaawo, nuugurira Nyamuwanga
abhaanu bha jingʼanda joone, jinyaayika joone,
jinyaami joone na abha amaanga goone.
10 Awe ꞉waakorere abhaanu abho,
bhabhe obhukama bhwa abhagabhisi,
bhakorere Nyamuwanga emirimu,
wone bharitunga ku‑chaaro.”
11 Niwo nindora na okuungwa bhamaraayika bhaafu muno, ebhiwumbi na ebhiwumbi, bhaariga bhari bhanyatabharwa. Bhamaraayika abho bhaariga bheeyindire echitebhe chirya cha ingʼoma, ebhibhumbwa bhirya na abhakaruka bharya. 12 Ninuungwa nibhaamura obhuraka, nibheemba ati,
“Omwana wa Inaama unu ꞉aatemerwe omutwe,
eeyire okuramira obhuturo, obhuniibhi na obhwengeeso.
Amanaga, echibharo, rikusyo na jikuma ni bhyaye!”
13 Niwo ninuungwa ebhibhumbwa bhyone mu‑rwire eyo, ku‑chaaro anu, mu‑nyombe eyo na mu‑nyanja nibhiimba aamwi,
“Omwene unu eenyanjire ku‑chitebhe cha ingʼoma,
na Omwana wa Inaama,
bhakusibhwe, bhayaanwe echibharo,
bhayaanwe rikusyo na obhuturo akajaanende koone!”
14 Ebhibhumbwa bhina bhirya nibhiitabhirisya, nibhyayikaga ati, “Jibhe kutyo!” Abhakaruka bharya wone nibhagwa bhwifumbike, nibharamya Nyamuwanga na Omwana wa Inaama.