Omwana wa Inaama kaasuruumura jimboyero ja obhurimbo
6
1 Nejire neeya, nindora Omwana wa Inaama ˆnaasuruumuraga imboyero irya ya okwamba ya obhurimbo ku‑mboyero jirya etaanu na ebhiri. Ka wone, ninuungwa echibhumbwa echimwi ku‑bhina bhirya, nichaamura obhuraka rwa bhwa ribharuka, nichaayikaga ati, “Iija!” 2 Niwo nindingira, nindora ifwaraasi iinyeru na omuunu ayiriinyire‑ko. Omuunu oyo aariga agwatiriiye obhukoma, ˆnaayaanwa orutengya rwa obhuyigi. ˆNaasooka mu‑rwire ari muyigi wa riremo korereki agenderere okuyiga rindi.3 Neeya, Omwana wa Inaama ˆnaasuruumura imboyero ya kabhiri ya obhurimbo. Niwo ninuungwa echibhumbwa chirya cha kabhiri, nichaayika ati, “Iija!” 4 Mbe, niisoromoka ifwaraasi eyindi itukurasi kaa. Omuunu unu aariga ayiriinyire‑ko, ˆnaayaanwa imbanda inene na obhuturo bhwa okureeta riremo ku‑chaaro, korereki abhaanu bharwane na okwitana.
5 Neeya, Omwana wa Inaama ˆnaasuruumura imboyero ya kasatu ya obhurimbo. Ninuungwa echibhumbwa chirya cha kasatu, nichaayika ati, “Iija!” Nindingira, nindora ifwaraasi inyirafuru. Omuunu unu aariga ayiriinyire‑ko aariga ari na indengero mu‑kubhoko kwaye. 6 Ninuungwa wuti obhuraka nibhusooka agatigati ya ebhibhumbwa ebhina bhirya, nibhwayika ati, “Omuyeero gwa orusuku rwone gurigura echisengo chimwi era cha jisyano ja obhuro. Ka wone, omuyeero gwa orusuku rwone gurigura ebhisengo bhisatu era bhya jisyano ja isyayiri.a Nawe waasiga okunyamura amafuta noorwo echifuufu.”b
7 Neeya, Omwana wa Inaama ˆnaasuruumura imboyero ya kana ya obhurimbo, ninuungwa echibhumbwa chirya cha kana, nichaayikaga ati, “Iija!” 8 Mbe, nindingira, nindora ifwaraasi inyeererefu. Omuunu unu aariga ayiriinyire‑ko aariga ˆnaatogwa ati, Orufu. Nyombe yaariga niiruubhana nage. Bhabhiri bhoone nibhayaanwa obhuturo bhwa okwita ribhaara erimwi kw‑ina rya abhaanu ku‑chaaro ku‑njira ya riremo, omweko, amarwara na jityanyi jinduru ja ibhara.
9 Neeya, Omwana wa Inaama ˆnaasuruumura imboyero ya kataanu ya obhurimbo. Mw‑ifuufu rya echigabhiro, nindora emitima ja abhaanu. Abhaanu abho bhaariga bheetirwe ku‑songa ya okwikirisya omusango gwa Nyamuwanga na okuguraasya ku‑bhaanu abhandi. 10 Niwo, nibhaamura obhuraka nibharira, nibhaayika ati, “Raatabhugenyi awe, Nyamuwanga owa obhuturo bhwone, unu uri mweru na wa chimari, mbawo owukoora! Uriramura ri abhaanu bha ku‑chaaro na okuchisubhisya orusiima ku‑bhanu ꞉bhaachiitire?” 11 Niwo abhaanu bhoone bhanu ꞉bheetirwe, nibhayaanwa emingiro jiinyeru. Nibhabhwirwa ati, bharindirire‑wo katungu katooto, okukingira abhakosi bheejaabho, bhanu bhari abhayiri bheebhwe mu‑riikirisya, wone bheetwe rwa kutyo abheene ꞉bheetirwe. Niwo obhukumi bhwebhwe obhuja okukuumira.
12 Nejire neeya, nindora Omwana wa Inaama ˆnaasuruumura imboyero ya kataanu na imwi ya obhurimbo. Omwanya gunu ꞉aayisuruumuuye, niribha‑wo rinyamutikima rinene muno rya echaaro. Risuubha ndiirabhura ti rwa amakara, okwesi nikutukura ka rwa isagama. 13 Jinjota nijigwa ku‑chaaro bhuyagayaga okusooka mu‑rutumba, rwa amatwasyo amaworofya kutyo agawunguruka omwanya gunu riiti erisingisibhwa na omuyaga omwafu. 14 Orutumba nirusooka‑wo rwa kutyo orufunjo orufunywa. Ebhiima bhyone na amasinga goone nibhisoosibhwa anu bhyariga bhiri.
15 Niwo abhakama bha echaaro, abhatangasya, abhakuru bha riremo, abhaniibhi, abhaanu bha echibharo, aamwi na abhaanu abhandi bhoone, bhabhe bhanu bhari na obhwitaage amwi abhagaya, bhoone nibheeyibhisa mu‑senga na emwaro ya amabhuyi ga mu‑bhiima. 16 Nibhabhwira ebhiima ebhyo na amabhuyi ago ati, “Muchigwire! Muchibhise, korereki unu eenyanjire ku‑chitebhe cha ingʼoma asige okuchirora. Muchibhise, chiiruke risungu rya Omwana wa Inaama. 17 Woori, orusuku rurya orukuru rwa risungu riruru okusooka ku‑Nyamuwanga na Omwana wa Inaama rwakingire! Chimari atari‑wo omuunu noorwo umwi unu kaatura okurwigumiirisya.”