Abhaana bha Nyamuwanga abhatuurwa‑ko orunabho
7
1 Ejo jejire jaawa, nindora echiroro echindi. ꞉Naarorere bhamaraayika bhana, bhuri umwi eemereeguuyu ku‑sonde imwi ya jisonde jiina ja echaaro. Bhuri umwi weebhwe aariga ˆnaayingirira omuyaga ku‑rubhaara rwaye, korereki gusige okuyemba ku‑chaaro, noorwo mu‑nyanja, noorwo okukuura riiti ryoneryone. 2 Bhamaraayika abho bhaariga bhayaaywe obhuturo bhwa okunyamura echaaro na inyanja. Nejire neeya, nindora maraayika owundi ˆnaariinyagisyaga inguru okusooka ebhuwuruka esuubha ari na orunabho rwa Nyamuwanga omuwanga. ˆNaaragirisya bhamaraayika bhana abho, 3 ˆnaayikaga ati, “Murindirire okwamba! Musige okunyamura echaaro, inyanja noorwo amati, okukingira anu chirimara okutuura‑ko orunabho ku‑bhisuusu bhya abhakosi bha Nyamuwanga weeswe.”4 Nejire neeya, nimbwirwa obhukumi bhwa abhaanu bhanu bhaariga bhateeywe‑ko orunabho rwa Nyamuwanga. Obhukumi bhwebhwe bhoone bhwariga bhuri bhisira egana na makumi gana na bhana (144,000) okusooka mu‑ngʼanda joone ekumi na ebhiri ja Abhayisirayeeri. 5 Abhaanu ebhiwumbi ekumi na ebhiri okusooka bhuri oruganda ꞉bhaateeywe‑ko orunabho orwo.
Ebhiwumbi ekumi na ebhiri okusooka mu‑ruganda rwa Yuuda,
ebhiwumbi ekumi na ebhiri okusooka mu‑ruganda rwa Rubheeni,
ebhiwumbi ekumi na ebhiri okusooka mu‑ruganda rwa Gaadi.
6 Ebhiwumbi ekumi na ebhiri okusooka mu‑ruganda rwa Asyeri,
ebhiwumbi ekumi na ebhiri okusooka mu‑ruganda rwa Naafitaari,
ebhiwumbi ekumi na ebhiri okusooka mu‑ruganda rwa Manaase.
7 Ebhiwumbi ekumi na ebhiri okusooka mu‑ruganda rwa Simiyooni,
ebhiwumbi ekumi na ebhiri okusooka mu‑ruganda rwa Raawi,
ebhiwumbi ekumi na ebhiri okusooka mu‑ruganda rwa Isakaari.
8 Ebhiwumbi ekumi na ebhiri okusooka mu‑ruganda rwa Jaabhurooni,
ebhiwumbi ekumi na ebhiri okusooka mu‑ruganda rwa Jejefu
na ebhiwumbi ekumi na ebhiri okusooka mu‑ruganda rwa Bhenjamiini.
Echise echinene cha abhaanu bha jinyaayika ejindi
9 Ejo jejire jaawa, nindingira, nindora echise echinene cha abhaanu chinu omuunu aariga atakutura okubhara. Abhaanu abho bhaariga bhasookere mu‑maanga goone, mu‑ngʼanda joone, mu‑nyaami joone na mu‑nyaayika joone. Abho bhoone bhaariga bheemereeguuyu imbere ya echitebhe cha ingʼoma na imbere ya Omwana wa Inaama. Abhaanu abho bhaariga bhafwaye emingiro jiinyeru na bhaariga bhagwatiriiye amatabhi ga jikinda mu‑mabhoko geebhwe. 10 Nibhaamura obhuraka, nibhaayikaga ati,
“Obhuchungusi obhusooka ku‑Nyamuwanga weeswe,
omwene niwe eenyanjire ku‑chitebhe cha ingʼoma,
ka wone obhusooka ku‑Mwana wa Inaama.”
11 Bhamaraayika bhoone bhaariga bheemereeguuyu bheeyindire echitebhe cha ingʼoma, abhakaruka bharya na ebhibhumbwa bhina bhirya. Nibhagwa bhwifumbike imbere ya echitebhe echo, nibharamya Nyamuwanga, 12 nibhaayikaga ati,
“Jibhe kutyo!
Jikuma na rikusyo,
obhwengeeso na risiima,
echibharo na obhuturo na amanaga
bhiri ku‑Nyamuwanga weeswe akajaanende koone.
Jibhe kutyo!”
13 Neeya, owumwi wa abhakaruka bharya, ˆnaambusya ati, “Angu, abhaanu bhanu bhafwaye emingiro jiinyeru ejo ni bhaaga? Angu, umenyere enu bhasookere?”
14 Niimusubhya ati, “Mwami waani, awe naawe umenyere.”
ˆNaambwira ati, “Abhaanu abho nibho ꞉bhaayigire ebhinyaasyo bhinene bhirya. ꞉Bhaafurire emingiro jeebhwe mu‑sagama ya Omwana wa Inaama, nijeera pee. 15 Nikwo okukora bhari imbere ya echitebhe cha ingʼoma cha Nyamuwanga. Abhamukorera emirimu mu‑ngeta na mu‑mwisi mw‑Iyekaru ryaye. Nyamuwanga omwene unu eenyanjire ku‑chitebhe cha ingʼoma, aribha aamwi nabho na okubharinda. 16 Bhataryungwa omweko rindi noorwo obhwiro bhwa amanji bhutaribheeta rindi. Omuumwi omururu gutaribhoocha noorwo bhataryungwa imbiita yooneyoone. 17 Okubha, Omwana wa Inaama unu ari yeeyi na echitebhe cha ingʼoma aribha omureefi weebhwe. Aribhatangasya bhoone okuja ku‑mimiro ja amanji ganu agasoosya obhuwanga akajaanende koone. Nyamuwanga omwene aribheeya amasiga geebhwe goone.”