Omwana wa Inaama kaasuruumura imboyero ya kataanu na ebhiri
8
1 Neeya, Omwana wa Inaama ˆnaasuruumura imboyero ya kataanu na ebhiri ya obhurimbo, na mu‑rwire eyo nikabha kajibhijibhi muno omwanya gwa saa esinja kutya. 2 Nejire neeya, nindora bhamaraayika bhataanu na bhabhiri bhanu abheemereeguruga imbere ya Nyamuwanga na bhuri umwi weebhwe ˆnaayaanwa ingʼombi.3 Maraayika owundi ˆnaaja, ˆneemereeguru imbere ya echigabhiro. Maraayika oyo aariga agwatire ribhakuri rya inaaryo ya okwotera‑mo obhubhaani. ˆNaayaanwa obhubhaani bhwafu korereki abhusaasye na risabhwa rya abheeru bhoone bha Nyamuwanga, abhituure bhyone ku‑chigabhiro cha inaaryo chinu chiri imbere ya echitebhe cha ingʼoma. 4 Ingesi ya obhubhaani obhwo aamwi na risabhwa rya abheeru nibhiriinya inguru ku‑Nyamuwanga okusooka mu‑kubhoko kwa maraayika oyo.
5 Neeya maraayika oyo ˆnaagega ribhakuri ryaye, ˆnaawokoora amakara ga omuriro ku‑chigabhiro, ˆnaageejusya mu‑mabhakuri omwo, ˆnaayeesa ku‑chaaro anu. Nibhubha‑wo obhuraka bhwa ribharuka, nijibha‑wo jindabhyo na rinyamutikima rya echaaro.
Bhamaraayika bhana abhabhuma jingʼombi jeebhwe
6 Niwo bhamaraayika bhataanu na bhabhiri bhanu bhaariga bhari na jingʼombi etaanu na ebhiri, nibhatengeeja okubhuma jingʼombi jeebhwe.
7 Maraayika wa okwamba ˆnaabhuma ingʼombi yaaye. Niwo niigwa ingʼubha ya amabhuyi na omuriro bhisasikeene na isagama, nibhyeswa ku‑chaaro. Omuriro ogwo nigusingaarisya orubhaara orumwi ku‑mbaara esatu ja echaaro na amati, nigusingaarisya amanyaasi amabhisi goone ku‑rubhaara orumwi orwoorwo.
8 Maraayika wa kabhiri wone ˆnaabhuma ingʼombi yaaye. Niwo echiinu rwa echiima echinene muno chinu echaaka omuriro, nicheeswa mu‑nyanja. Omwanya gunu ꞉chaaguuwe mu‑nyanja, ribhaara erimwi ku‑mbaara esatu ja inyanja niriyiinduka niribha isagama. 9 Ku‑rubhaara orumwi orwoorwo, ebhibhumbwa bhyone nibhifwa na jingarabha nijisingaarika chimwi.
10 Maraayika wa kasatu wone ˆnaabhuma ingʼombi yaaye. Niwo injota inene niigwa okusooka mu‑rutumba. Injota eyo, yaariga niseekaana rwa echisiriira, niigwa kw‑ibhaara rya kasatu rya emisima na erya emimiro ja amanji. 11 Injota eyo, yaariga niitogwa ati, Nyabhusungu. Niyindura ribhaara rya kasatu rya amanji nigabha amaruru kabhukabhu. Mbe, abhaanu bhaafu nibhafwa, kwa okubha ꞉bhaanyweye amanji amaruru kabhukabhu ago.
12 Maraayika wa kana wone ˆnaabhuma ingʼombi yaaye. Niwo ribhaara erimwi ku‑mbaara esatu ja risuubha, ja okwesi na ja jinjota, niribhumwa niribha chisuute. Orubhaara rwa kasatu rwa mu‑mwisi na mu‑ngeta nichibha chisuute chaafu muno.
13 Niwo nindora ingʼona inene niigurukaga ku‑rutumba. Ninuungwa, niyaamura obhuraka, niyayikaga ati, “Jiribhabhona, jiribhabhona, jiribhabhona, emwe bhanu mwikaaye ku‑chaaro, aribha jaabhumwa jingʼombi jisatu jinu jisigaaye. Bhamaraayika abho bhatengeejere okujibhuma woori kutya!”