Maraayika wa kataanu kaabhuma ingʼombi yaaye
9
1 Neeya maraayika wa kataanu wone ˆnaabhuma ingʼombi yaaye. Niwo nindora injota inu yaariga isookere mu‑rutumba, iguuye ku‑chaaro anu. Injota eyo, niiyaanwa orwiguriro rwa orwigi rwa eryobho rinu ritari na obhuteero.a 2 Niyiigura eryobho eryo, ingesi nyafu muno rwa ingesi ya obhuyi bhunene niisooka‑mo. Orutumba na risuubha nibhifundikirwa, nichibha chisuute ku‑songa ya ingesi eyo. 3 Mu‑ngesi omwo nijisooka‑mo jiisige, nijiswirana ku‑chaaro. Nijiyaanwa obhuturo bhwa okuruma kwa obhusungu rwa bhwa jinge. 4 Jiisige ejo, nijiragirirwa ati, jisige okusingaarisya obhunyaasi, ebhiimesya noorwo amati goonegoone. Nawe jirume era abhaanu bhanu bhaariga bhatari na orunabho orwa Nyamuwanga ku‑bhisuusu bhyebhwe.b 5 Ka wone, ꞉jaayaanirwe obhuturo bhwa okunyaasya abhaanu ku‑mwanya gwa ameesi gataanu era, nawe nijigaanywa ati, jisige okubheeta. Obhusungu bhwajo bhwariga bhuri rwa obhusungu bhwa okurumwa na inge. 6 Mu‑siku ejo, abhaanu bharyenda bheetwe, nawe bhatariitwa. Bharigomba okufwa, nawe orufu orwene ruribheeruka.7 Jiisige ejo, jaariga jiri rwa jifwaraasi jinu jiraabhirwe okuja okurwana riremo. Ku‑mitwe jaajo, bhyariga bhiri‑ko ebhiinu wuti jitengya ja inaaryo na obhusu bhwajo bhwariga nibhususana rwa obhusu bhwa abhaanu. 8 Ka wone, jaariga jiri na jifwiri, jifwiri ejo jaariga jiri ndeera rwa ja abhagasi. Ameeno gaajo gaariga gari rwa ameeno ga itare. 9 Ku‑bhifubha bhyajo, jaariga jifwaye echiinu rwa ingubha ya echuuma. Omwanya gwa okuguruka, omurundumo gwa jimbabha jaajo, gwariga guri rwa omurundumo gwa amabhirigiti maafu ga jifwaraasi jinu ejibhirima okuja mw‑iremo. 10 Emikira jaajo jaariga jiri na jimboreera rwa ja jinge. Obhusungu bhwajo bhwariga bhuri na obhuturo bhwa okureterera abhaanu obhwasye omwanya gwa ameesi gataanu. 11 Jiisige ejo, jaariga jiri na omukama waajo. Omukama oyo aariga ari maraayika omukuru wa mu‑ryobho rinu ritari na obhuteero. Maraayika oyo, mu‑Chiyebhuraniya kaatogwa Abhadooni na mu‑Chiyunaani kaatogwa Aporiyooni. Obhugajuro bhwagwo ni “Omusingaarisi.”
12 Mbe, itambara ya okwamba yaayitingʼene. Ringira, jichaari‑wo jitambara ebhiri jinu ejiija.
Maraayika wa kataanu na umwi kaabhuma ingʼombi yaaye
13 Neeya, maraayika wa kataanu na umwi ˆnaabhuma ingʼombi yaaye. Niwo ninuungwa obhuraka okusooka ku‑mbaara jiina jirya ja echigabhiro cha inaaryo, chinu chiri imbere ya Nyamuwanga. 14 Obhuraka obhwo nibhubhwira maraayika wa kataanu na umwi unu aariga ari na ingʼombi mu‑kubhoko kwaye, nibhwayika ati, “Suruumura bhamaraayika bhana bhanu bhabhoyerwe mu‑musima omunene gunu ogutogwa Efuraati.” 15 Bhamaraayika bhana abho nibhasuruumurwa, korereki bheete ribhaara erimwi kw‑isatu rya abhaanu bhoone ku‑chaaro. Bhamaraayika abho bhaariga bheerabhirwe ku‑mwanya ogwo, ku‑rusuku orwo, ku‑kwesi okwo na ku‑muguuga ogwo. 16 Nibhiija ebhise bhyafu bhya abhasirikare bhanu bhaariga bhariinyire ku‑fwaraasi. Ninuungwa ati obhukumi bhwebhwe bhwariga bhuri bhiwumbi makumi gabhiri kwiya bhiwumbi ekumi rimwi (200,000,000). 17 Mu‑bhiroro bhyani, ꞉naarorere jifwaraasi ejo na bhanu bhaariga bhajiriinyire‑ko. Abhasirikare abho, bhaariga bhafwaye jingubha ja echuuma mu‑bhifubha bhyebhwe. Jingubha ejo jaariga jiri tukurasi kaa, ja obhururu na ja amayaayi. Nindora emitwe ja jifwaraasi jiri wuti emitwe ja jiitare. Mu‑minwa jaajo, nijisooka‑mo jimbeesi ja omuriro, ingesi na emisimu ja echibhiriiti jinu ejaaka. 18 Ribhaara erimwi kw‑isatu rya abhaanu nibheetwa ku‑tambara jisatu ejo. Jitambara jisatu ejo, nijo jimbeesi ja omuriro, ingesi na emisimu ja echibhiriiti jinu ejaaka okusooka mu‑minwa jaajo. 19 Obhuturo bhwa jifwaraasi ejo bhwariga bhuri mu‑minwa ka wone ku‑mikira jaajo. Okubha emikira jaajo jaariga jiri rwa jinjoka jinu jiri na emitwe ja okuwutaasisya abhaanu.
20 Abhaanu bhanu ꞉bhataafuuwe ku‑tambara jinu ꞉jaabhwene abheejaabho, ꞉bhataataaye ebhibhiibhi bhyebhwe. ꞉Bhaagendereeye okuramirisya amasambwac na amasusano ga inaaryo, jipirya, isyabha, amabhuyi na jimbawu ganu ꞉bhaakonjere abheene. Amasusano ago gatakurora, gatakungwa, noorwo gatakuribhata. 21 ꞉Bhataataaye ebhibhiibhi bhyebhwe bhya okwitana, okuroga, okukora obhuromesi, noorwo obhwifi.