Maraayika wa echitabho echitooto
10
1 Nejire neeya, nindora maraayika owundi wa obhuturo bhwafu, ˆneekaga okusooka mu‑rwire. Maraayika oyo, aariga afwaye eriire na omutwe gwaye gwariga gwiyindirwe‑ko rikoma rya ryabhaasi. Obhusu bhwaye bhwariga nibhungʼarabhya rwa risuubha. Amaguru gaaye gaariga gari rwa jingʼingi jinu ejiseekana omuriro. 2 Mu‑kubhoko kwaye aariga ari na echitabho echitooto, chifumbuywe. ˆNeemereeguru okuguru kwaye kwa ebhuryo kutajire mu‑nyanja na okuguru kwaye kwa ebhumoosi kutajire ku‑chaaro. 3 ˆNaamura obhuraka rwa itare kutyo eyiruuta. Ejire maraayika oyo aamara okwamura obhuraka, amabharuka gataanu na gabhiri, nigeetabhirisya. 4 Omwanya gunu amabharuka ago ꞉geetabhiirisiisye, naariga nineenda okukaama emisango jinu jaayikwaga na amabharuka ago, nawe ninuungwa obhuraka okusooka mu‑rwire nibhumbwira ati, “Emisango ja amabharuka ejo, siga okujikaama! Emisango ejo ni mbisike!”5 Neeya, maraayika unu aariga eemereeguuyu okuguru kwaye okumwi kutajire mu‑nyanja na okumwi kutajire ku‑chaaro, ˆneenamusya okubhoko kwaye kwa ebhuryo nikuroreerera inguru mu‑rwire. 6 ˆNaarayira kw‑isiina rya Nyamuwanga unu ari omuwanga akajaanende koone, omubhumbi wa orutumba, echaaro, inyanja na bhinu bhiri‑mo. Maraayika oyo, ˆnaayika ati, “Omwanya gwa okurindirira rindi gutachaari‑wo. 7 Omwanya gunu maraayika wa kataanu na kabhiri aribhuma ingʼombi yaaye, Nyamuwanga arikuumisya obhutinge bhwa imbisike yaaye. Irikuumisibhwa rwa kutyo ꞉aaraasisiisye abhakosi bhaaye abharagi.”
8 Niwo obhuraka bhurya okusooka mu‑rwire nibhumbirikira rindi, nibhumbwira ati, “Genda ku‑maraayika unu eemereeguuyu okuguru kwa ebhuryo kutajire mu‑nyanja na okundi kutajire ku‑chaaro. Uramire echitabho echitooto chirya chifumbuywe chinu chiri mu‑kubhoko kwaye.”
9 Mbe ningenda, nimubhwira anaane echitabho chirya echitooto, omwene ˆnaansubhya ati, “Chichi anu! Ramira uchirye. Mu‑kanwa kaawo echija okununuurira rwa obhuuki, nawe mu‑nda yaawo echija okubha chiruru kabhukabhu.” 10 Niiramira echitabho echitooto echo okusooka mu‑kubhoko kwa maraayika oyo, niichirya. Mu‑kanwa kaani, chaanunuuriraga rwa obhuuki, nawe nejire naachimira mu‑nda yaani nichirura kabhukabhu.
11 Nimbwirwa ati, “Owukenwa usoosye obhuragi rindi inguru ya jingʼanda nyafu, ebhyaro bhyafu, jinyaayika nyafu na abhakama bhaafu.”