Abhabhambaasi bhabhiri bha Nyamuwanga
11
1 Nejire neeya, niiyaanwa risekeyanda rinu ryariga riri rwa isimbo ya okurengera. Nimbwirwa ati, “Genda urenge Riyekaru rya Nyamuwanga na echigabhiro. Ubhare wone abhaanu bhoone bhanu abharamya omwo. 2 Nawe waasiga okurenga orubhuga rwa Riyekaru rya Nyamuwanga,a kwa okubha orwo bhayaaywe abhanyamanga. Abhaanu abho bharitajirira Yerusareemu omusi omweru ku‑mwanya gwa ameesi makumi gana na gabhiri. 3 Nirituma abhabhambaasi bhaani bhabhiri, niribhayaana obhuturo bhwa okusoosya obhuragi, ku‑mwanya ogwoogwo gwa siku echiwumbi chimwi, magana gabhiri na makumi gataanu na rimwi (1,260). Bharisoosya obhuragi obhwo bhafwayega amagunira okweresya obhusurumbaaye bhwebhwe.”4 Abhabhambaasi abhabhiri abho ni mijeyituuni ebhiri na ebhituumo bhibhiri bhya okwikasya‑mo jidara bhinu ebhibhaga imbere ya Raatabhugenyi unu atungire echaaro choone.b 5 Omuunu woonewoone aakeenda okubhawutaasya, omuriro okusooka mu‑minwa jeebhwe gurimwita. Nikwo kutyo omuunu woonewoone unu aryenda okubhawutaasya, arifwa. 6 Abhabhambaasi abhabhiri abho bhari na obhuturo bhwa okuyingirira ingʼubha, korereki isige okugwa omwanya gunu bharisoosyaga obhuragi bhwebhwe. Omwanya gwonegwone bhaakeenda, abhatura okuyindura amanji okubha isagama na okureeta ku‑chaaro chinu itambara yooneyoone irya.
7 Omwanya gunu bharimara okusoosya obhuragi bhwebhwe inguru ya Nyamuwanga, niwo rityanyi rinu ꞉ryariinyire okusooka mu‑ryobho rinu ritari na obhuteero, ririrwana nabho. Niribhayiga na okubheeta. 8 Emitumbi ja abhabhambaasi abho jirimaama kw‑iparapara rikuru rya omusi omukuru. Ogwo nigwo omusi gunu Raatabhugenyi weebhwe ꞉aabhambirwe ku‑musarabha. Omusi ogwo guri na itungwa rwa ya Sodoma na ya echaaro cha Miisiri. 9 Abhaanu bha jinyaami joone, jingʼanda joone, jinyaayika joone na abha amaanga goone, bharirora emitumbi ja abhabhambaasi abhabhiri abho ku‑mwanya gwa masuubha gasatu na esinja. Ataribha‑wo omuunu unu ariikirisibhwa okubhasiika mu‑fwa. 10 Orufu rwa abharagi abhabhiri abho rurikora abhaanu bha ku‑chaaro anu bhakonderwe na okukora obhuregesi na okugenyana emigemu. Bharikora kutyo, kwa okubha abharagi abho ꞉bhaabhanyaasiisye muno.
11 Omwanya gwa amasuubha gasatu na esinja gwejire gwatura, Nyamuwanga ˆnaasubhya‑mo emyoyo abhabhambaasi abho, nibheemereeguru. Abhaanu bhoone bhanu ꞉bhaabharorere, nibhoobhaya muno. 12 Niwo abhabhambaasi abhabhiri abho nibhoongwa obhuraka obhunene okusooka mu‑rwire nibhubhabhwiraga ati, “Muuje inguru enu!” Nibhariinya mu‑rwire bhari mu‑riire, keenu abhasoko bheebhwe nibhabharingiraga. 13 Omwanya ogwoogwo, rinyamutikima rinene rya echaaro niritura, ribhaara rimwi kw‑ikumi rya omusi nirigwa. Rinyamutikima eryo nirireterera abhaanu bhiwumbi bhitaanu na bhibhiri (7,000) okufwa. Abhaanu bhanu ꞉bhaawonere, nibhoobhaya, nibhakuuya Nyamuwanga wa mu‑rwire.
14 Mbe, itambara ya kabhiri yaayitingʼene. Ringira, ichaari‑wo itambara ya kasatu inu eyiija.
Maraayika wa kataanu na kabhiri kaabhuma ingʼombi yaaye
15 Neeya, maraayika wa kataanu na kabhiri ˆnaabhuma ingʼombi yaaye. Niwo ninuungwa obhuraka bhunene bhwa bhamaraayika bhaafu mu‑rwire eyo, nibhwayikaga ati,
“Obhutungi bhwa echaaro bhwabheeye bhwa Raatabhugenyi Nyamuwanga weeswe,
aamwi na Kirisito waaye.
Nyamuwanga niwe aritunga akajaanende koone.”
16 Niwo abhakaruka makumi gabhiri na bhana bhanu bhaariga bheenyanjire ku‑bhitebhe bhyebhwe imbere ya Nyamuwanga, nibhagwa bhwifumbike na okuramya Nyamuwanga, 17 nibhaayikaga ati,
“Echikusiima Raatabhugenyi Nyamuwanga owa obhuturo bhwone.
Awe waariga uri‑wo noorwo woori uri‑wo.
Ku‑bhuturo bhwawo obhukuru
woori waamba okutunga echaaro choone.
18 Abhaanu bha amaanga ꞉bhaakusokere,
nawe omwanya gwa risungu ryawo gwakingire.
Woori ni omwanya gwawo gwa okuramura abhaanu bhanu ꞉bhaafuuwe.
Ka wone, nigwo omwanya gwa okuyaanira‑mo echiyaanwa abhakosi bhaawo abharagi,
na abheeru bhaawo bhoone bhanu abhakusya risiina ryawo,
abharera na abhakuru.
Gunu nigwo omwanya gwa okusingaarisya
abhaanu bhanu abhasingaarisya echaaro.”
19 Niwo, orwigi rwa Riyekaru rya Nyamuwanga rya mu‑rwire nirwiguka. Risandikwa rya indagano ya Nyamuwangac niribhonekana mw‑Iyekaru eryo. Nindora jindabhyo na ninuungwa obhuraka bhwa ribharuka. Rinyamutikima rya echaaro niritura na niigwa ingʼubha nyafu muno ya amabhuyi amanene.