Omugasi na Riyoka
12
1 Niwo, inguru ku‑rutumba eyo, nichibha‑wo echibharikisyo cha okuruguusya muno. Ku‑rutumba okwo aariga ari‑ko omugasi unu aariga afwaye risuubha na amaguru gaaye gaariga gatajire ku‑kwesi. Ka wone, ku‑mutwe gwaye aariga afwaye orutengya runu ruri na jinjota ekumi na ebhiri. 2 Omugasi oyo aariga afugaaye na aariga ari yeeyi okwibhura. Ebhinyonyi mbimuruma, ˆnaamura obhuraka ˆnaarira inguru ya obhusungu bhwa okwibhura.3 Nikwiya, ku‑rutumba okwo, nichibha‑ko echibharikisyo echindi cha okuruguusya. Mbe rora! Riyoka rinene ritukurasi kaa nirisoromoka. Riyoka eryo ryariga riri na emitwe etaanu na ebhiri na amayembe ekumi, bhuri omutwe gwariga guri na orutengya. 4 Omukira gwa riyoka eryo, nigukurura ribhaara erimwi kw‑isatu rya jinjota mu‑rutumba, nigujeesa ku‑chaaro anu. Ryejire ryamara, niriimereeguru imbere ya omugasi oyo, unu aariga ari yeeyi okwibhura, korereki rirye omwana, akeebhurwa. 5 Neeya omugasi oyo ˆneebhura omwana wa echirume. Omwana oyo aritunga amaanga goone ga echaaro ku‑bhuturo obhukuru. Nawe riyoka eryo richaari okurya omwana oyo, ˆnaasaakurwa, ˆnaasirwa ku‑Nyamuwanga, ku‑chitebhe chaaye cha ingʼoma. 6 Omugasi oyo, ˆnaabhirimira mw‑ibhara, anu Nyamuwanga aariga amwiraabhiiye, korereki amwangarire ku‑mwanya gwa siku echiwumbi chimwi na magana gabhiri na makumi gataanu na ekumi rimwi (1,260).
7 Niwo niribha‑wo riremo mu‑rwire. Maraayika omukuru, unu kaatogwa ati Mikayeeri, aamwi na bhamaraayika bhaaye, nibharwana na riyoka na bhamaraayika bhaaryo. 8 Nawe, riyoka na bhamaraayika bhaaryo, nibhabhumwa na okubhirimibhwa okusooka mu‑rwire. 9 Riyoka eryo, niryeswa ku‑chaaro anu. Eryo, niyo injoka ya kara irya, inu eyitogwa ati, Mubheeyeresya amwi Syetaani. Eyijiga abhaanu bhoone ku‑chaaro bhakore ebhibhiibhi. Chimari ryeserwe ku‑chaaro anu aamwi na bhamaraayika bhaaryo.
10 Mbe, ninuungwa obhuraka obhunene okusooka mu‑rwire nibhwayika ati,
“Woori, Nyamuwanga weeswe achungura abhaana bhaaye.
Ku‑bhuturo bhwaye ambisya obhukama bhwaye!
Eeresya obhuturo bhwa Kirisito waaye.
Okubha omubhuusi wa abheekirisya abheejaasu eeserwe ku‑chaaro,
omwene aariga ˆneemereeguru imbere ya Nyamuwanga okubhabhuura mu‑ngeta na mu‑mwisi.
11 Woori abheekirisya abheejaasu bhaayigire Syetaani ku‑sagama ya Omwana wa Inaama
na ku‑bhubhambaasi bhunu bhasoosiisye.
Okubha ꞉bhateeganire obhurame bhwebhwe,
bhaariga bhatengeejere noorwo okufwa.
12 Kurwa ejo, mukonderwe,
emwe bhoone bhanu mwikaaye inguru mu‑rwire eyo!
Jaabhabhona emwe bhanu mwikaaye ku‑chaaro na ebhibhumbwa bhya mu‑nyanja,
okubha Syetaani eeserwe emwaro eyo agatigati yeemwe.
Abhiyiriwe muno, kwa okubha kaamenya ati jisiku jaaye ni nooto.”
13 Mbe, riyoka rirya, ryejire ryarora ati, ryeswa ku‑chaaro anu, niriruubha omugasi unu aariga eebhuuye omwana wa echirume. 14 Nawe Nyamuwanga ˆnaayaana omugasi oyo amabhabha gabhiri rwa ga ingʼona inene, korereki aguruke agende mw‑ibhara mu‑bhwikaro bhunu Nyamuwanga aariga amwiraabhiiye, abhe kura na injoka eyo. Mw‑ibhara eyo aryangarirwa ku‑mwanya gwa emiguuga esatu na ameesi gataanu na kumwi.
15 Injoka eyo niifubhura amanji maafu muno okusooka mu‑kanwa karyo, ngawurura rwa omusima inyuma ya omugasi oyo, korereki amanji ago gamugege. 16 Nawe iisi niisakira omugasi oyo. Niyaatika, niyaasama rwa omunwa, niimira amanji goone okusooka mu‑kanwa aka riyoka eryo. 17 Riyoka eryo, niribhiyirirwa muno omugasi oyo, ndigenda okurwana na abhaana abhandi bha omugasi oyo bhanu bhaariga bhasigaaye. Abhaana abho nibho bhanu abhagayuka ebhiraagiro bhya Nyamuwanga na okusoosya obhubhambaasi inguru ya Yeesu. Mbe, riyoka eryo, niriimereeguru ku‑njekekera ya inyanja.