Rityanyi rya okwamba
13
1 Nejire neeya, nindora rityanyi nirisooka mu‑nyanja. Rityanyi eryo, ryariga riri na emitwe etaanu na ebhiri na amayembe ekumi, na bhuri riyembe ryariga riri na orutengya. Bhuri mutwe gwariga gukaamirwe‑ko risiina rya okufumirisya Nyamuwanga. 2 Rityanyi rinu ꞉naarorere ryariga nirisusana rwa ingo, nawe amaguru gaaryo gaariga gari rwa ga ritarago na omunwa gwaryo gwariga guri rwa gwa itare. Riyoka rirya, niriyaana rityanyi eryo, amanaga gaaryo, echitebhe chaaryo cha obhutungi na obhuturo bhwafu. 3 Omutwe gumwi gwa rityanyi eryo gwariga guri na riwuta ebhiibhi muno rya okufwa. Nawe riwuta eryo ꞉ryaworere! Echo nichikora abhaanu bhoone ku‑chaaro nibhariruguura na okuriruubha. 4 Nibharamya riyoka rirya, kwa okubha ꞉ryayaanire rityanyi eryo obhuturo bhwa okutunga. Abhaanu nibharamya wone rityanyi eryo, nibhaayikaga ati, “Atari‑wo omuunu owundi rwa rityanyi rinu! Ka wone, atari‑wo unu kaatura okurwana naryo!”5 Mbe, rityanyi eryo, niriyaanwa obhuturo bhwa okwikumangya na okwayika emisango ja okufumirisya Nyamuwanga. Niriyaanwa wone obhuturo bhwa okutunga echaaro omwanya gwa ameesi makumi gana na ebhiri. 6 Rityanyi eryo niryamba okufumirisya Nyamuwanga, risiina ryaye, obhwikaro bhwaye na bhoone bhanu bheekaaye mu‑rwire. 7 Niriikirisibhwa okurwana na abheeru bha Nyamuwanga, niribhayiga. Niriyaanwa obhuturo bhwa okutunga abhaanu bha jingʼanda joone, jinyaami joone, jinyaayika joone na abha amaanga goone. 8 Abhaanu bhoone ku‑chaaro choone bhariramya rityanyi eryo, nawe abhaanu bhoone bhanu amasiina geebhwe gakaamirwe mu‑chitabho cha obhuwanga, okusookerera echaaro chichaari okubhumbwa bhataririramya. Echitabho echo ni cha Omwana wa Inaama unu ꞉aatemerwe omutwe.
9 Omuunu unu kaategeresya, noongwe.
10 Omuunu unu ꞉aakarariiywe okusirwa mu‑bhugaya,
arisirwa mu‑bhugaya.
Omuunu unu ꞉aakarariiywe okwitwa kwa imbanda,
ariitwa kwa imbanda.
Woori abheeru bha Nyamuwanga, abhakenwa bheegumiirisye mu‑riikirisya.
Rityanyi rya kabhiri
11 Nejire neeya, nindora rityanyi erindi niririinyagisya okusooka mu‑si. Rityanyi eryo ryariga riri na amayembe gabhiri matooto rwa ameyembe ga omwana wa inaama, nawe obhuraka bhwaryo bhwariga bhuri rwa obhwa riyoka. 12 Nirikorera obhuturo bhwone bhwa rityanyi rirya rya okwamba na inguru yaaryo eryene. Rityanyi rya kabhiri eryo nirisinyiirisya abhaanu bhoone bha ku‑chaaro bharamye rityanyi rya okwamba rinu ryariga riri na riwuta rya okufwa rinu ꞉ryaworere. 13 Rityanyi rya kabhiri ꞉ryakorere ebhibharikisyo bhya okuruguusya, noorwo nirikora omuriro nigwika ku‑chaaro okusooka mu‑rutumba keenu abhaanu nibharora abhwerubhweru. 14 Ku‑bhibharikisyo bhinu ꞉ryayaaywe okukora imbere ya rityanyi rya okwamba rirya, nirijiga abhaanu bha ku‑chaaro anu. Niribhwira abhaanu bhabhaaje risusano rya okuyaana echibharo rityanyi rya okwamba, rinu ꞉ryawutasiibhwe kwa imbanda, nawe niriwora, nirigenderera okwikara.
15 Rityanyi eryo niriyaanwa obhuturo bhwa okuyembera omwika gwa obhuwanga mw‑isusano rya rityanyi rya okwamba, korereki riture okwayika na okukora bheete abhaanu bhoone bhanu ꞉bhaaremere okuriramya. 16 Rityanyi rya kabhiri eryo nirisinyiirisya abhaanu bhoone, bha echibharo na bhanu bhatari na echibharo, abhaniibhi na abhataka, abha obhwitaage na abhagaya, bhatuurwe‑ko orunabho ku‑kubhoko kwa ebhuryo amwi ku‑chisuusu. 17 Ka wone, omuunu woonewoone unu ꞉ataateeywe‑ko orunabho ꞉ataaturire okugura amwi okugusya echiinu choonechoone. Orunabho orwo ni siina rya rityanyi rya okwamba rirya, amwi obhukumi bhwa jinyuguta joone ja risiina ryaryo.a
18 Owukenwa ubhe na obhwengeeso korereki usombookerwe omusango ogwo. Omuunu unu kaasombookerwa, abhare obhukumi bhwa rityanyi eryo, kwa okubha ni obhukumi bhwa risiina rya omuunu. Obhukumi bhwaryo ni magana gataanu na rimwi na makumi gataanu na rimwi na etaanu na imwi (666).