Omwana wa Inaama na abhaana bhaaye 144,000
14
1 Nejire neeya, nindingira, nindora Omwana wa Inaama eemereeguuyu ku‑chiima chinu echitogwa Sayuuni na aariga ari aamwi na abhaanu bhisira egana na makumi gana na bhana (144,000). Abhaanu abho bhaariga bhakaamirwe ku‑bhisuusu bhyebhwe, risiina rya Omwana wa Inaama na risiina rya Esemwene. 2 Ninuungwa obhuraka okusooka mu‑rwire bhuri rwa echiwurumo cha amanji amaafu ganu agooromoka kwa amanaga na rwa obhuraka bhwa ribharuka rinene. Ka wone, obhuraka obhwo, bhwariga bhuri rwa obhuraka bhwa abhabhumi bhaafu bha jindono bhanu abhabhumira aamwi jindono jeebhwe.3 Abhaanu abho, bhaariga bheemereeguuyu imbere ya echitebhe cha ingʼoma chirya, na imbere ya ebhibhumbwa bhina ebhiwanga bhirya na abhakaruka bharya makumi gabhiri na bhana. Abhaanu abho, bhaariga nibheemba orwimbo oruyaaya na atari‑wo omuunu owundi unu ꞉aaturire okwiyigira okwimba orwimbo orwo, tari abho bhaariga bhagurirwe okusooka ku‑chaaro. 4 Abhaanu abho nibho abharuubha Omwana wa Inaama woonewoone anu kaaja. Ka wone, ꞉bhateejabhiyasiisye na abhagasi, okubha bhaariga bhari bhimura. ꞉Bhaagurirwe okusooka agatigati ya abhaanu abhandi, nibhasoosibhwa wone okubha echoogoa cha ebhigeswa cha okwamba ku‑Nyamuwanga na ku‑Mwana wa Inaama. 5 Bhaariga bhachaari wone okwayika orubheeyi, noorwo bhaariga bhatari‑ko esoro ryoneryone.
Bhamaraayika bhasatu abharaasya omusango gwa Nyamuwanga
6 Nejire neeya, nindora maraayika owundi ˆneejungajunga ku‑rutumba. Maraayika oyo, aariga ari na Emisango ja Ekisi ja akajaanende okuraasisya abhaanu bhanu bheekaaye ku‑chaaro, abhaanu bha amaanga goone, jingʼanda joone, jinyaayika joone na abha jinyaami joone. 7 Mbe, maraayika oyo, ˆnaamura obhuraka ˆnaayika ati, “Mugayuke, muramye na okukuuya Nyamuwanga, okubha omwanya gwa okuramura abhaanu gwakingire. Muramye unu ꞉aabhumbire orutumba, echaaro, inyanja na emimiro ja amanji.” 8 Neeya, maraayika owundi ˆnaaruubhira ˆnaayikaga ati, “Gwasingaarika! Omusi omukuru gwa Bhaabheeri gwasingaarika chimwi! Omusi ogwo ꞉gwanywesiisye abhaanu bha amaanga goone echifuufu echiruru kabhukabhu. Echifuufu echo ni obhuromesi bhwagwo.”
9 Mbe, ˆnaabhonekana maraayika owundi wa kasatu. ˆNaamura obhuraka ˆnaayika ati, “Araabha omuunu akaramya rityanyi eryo na risusano ryaryo, na okutuurwa‑ko orunabho ku‑chisuusu amwi ku‑kubhoko, 10 omuunu oyo wone arinywa echifuufu. Eryo niryo risungu rya Nyamuwanga, ni ruru kabhukabhu rwa obhwarwa bhunu bhutasasiibhwe‑mo amanji. Nyamuwanga omwene ariisuka mu‑mutawo gwaye gwa risungu, na okuyaana omuunu oyo korereki anywe. Omuunu oyo arinyaaka, mu‑muriro omururu gwa emisimu ja echibhiriiti gunu ogwaka, imbere ya bhamaraayika abheeru na imbere ya Omwana wa Inaama. 11 Ingesi ya okurungura kwebhwe iririinya inguru akajaanende koone. Abhaanu abho bharinyaaka mu‑ngeta na mu‑mwisi, kwa okubha bharamiisye rityanyi na risusano ryaryo na okukaamwa‑ko risiina rya rityanyi eryo.” 12 Woori, abheeru bha Nyamuwanga abhakenwa bheegumiirisye. Abho nibho abhagwata ebhiraagiro bhya Nyamuwanga na okwikirisya Yeesu.
13 Ninuungwa obhuraka okusooka mu‑rwire, nibhumbwira ati, “Kaama ati, okwambira woori, bhari na amabhando abhaanu bhoone bhanu abhafwa bheekirisiisye Raatabhugenyi Yeesu.”
Neeya Mwoyo wa Nyamuwanga ˆnaayika ati, “Cha, bharibhona amabhando maafu. Bhariisya omwoyo okusooka ku‑mirimu jeebhwe emisito, okubha bhariyaanwa ebhiyaanwa inguru ya ebhikorwa bhyebhwe bhya ekisi.”
Ebhigeswa bhya echaaro
14 Niwo nindingira rindi, nindora eriire eryeru. Ku‑riire okwo, aariga eenyanjire‑ko omuunu ˆnaasusana rwa Omwana wa Omuunu.b Ku‑mutwe gwaye, aariga afwaye orutengya rwa inaaryo. Mu‑kubhoko kwaye aariga agwatiriiye omuworo gwa obhuugi bhwafu.
15 Neeya, maraayika owundi ˆnaasooka mw‑Iyekaru rya Nyamuwanga mu‑rwire eyo, ˆnaamura obhuraka ˆnaabhwira unu aariga eenyanjire ku‑riire okwo ati, “Gega omuworo gwawo ugende okugesa, kwa okubha ebhigeswa bhya echaaro bhyakomeeye na omwanya gwa okugesa gwakingire.” 16 Niwo omuunu oyo, ˆneesya omuworo gwaye ku‑chaaro, ˆnaagesa ebhigeswa bhya echaaro choone.
17 Neeya, maraayika owundi ˆnaasooka mw‑Iyekaru rya Nyamuwanga mu‑rwire eyo. Omwene wone, aariga agwatiriiye omuworo gwa obhuugi bhwafu. 18 Niwo, maraayika owundi ˆnaasooka ku‑chigabhiro. Omwene aariga ari na obhuturo ku‑muriro. ˆNaamura obhuraka ˆnaabhwira maraayika wa omuworo gwa obhuugi bhwafu ati, “Iisya omuworo gwawo ogwo, uteme amatwasyo ga emijabhiibhu ja echaaro, kwa okubha amatwasyo gaayiiye.” 19 Niwo maraayika oyo, ˆneesya omuworo gwaye, ˆnaatema amatwasyo ga amati ga emijabhiibhu ja echaaro, ˆnaagatuura mw‑iswejisyo rinene. Riswejisyo eryo eryeresya risungu rya Nyamuwanga. 20 Amatwasyo ago, nigatajiirirwa mw‑iswejisyo anja ya omusi omukuru. Nigasoosya isagama, isagama eyo niibha omusima mureera. Obhureera bhwagwo, bhwariga bhuri kiromeeta magana gasatu (300) na obhwima, bhwariga bhuri echita chimwi na esinja.