Orwimbo rwa Omwana wa Inaama na Muusa
15
1 Nejire neeya, nindora echibharikisyo echindi echinene na cha okuruguusya mu‑rwire. ꞉Naarorere bhamaraayika bhataanu na bhabhiri nibhareetaga jitambara etaanu na ebhiri ja obhuteero. Jitambara ejo ejikuumisya risungu rya Nyamuwanga. 2 Ka wone, nindora echiinu chinu chaariga chiri rwa inyanja ya rirore, inu isasikeene na omuriro. Ku‑mbarimbari awo, bhaariga bheemereeguuyu‑wo abhaanu bhanu ꞉bhaayigire rityanyi rirya, risusano ryaryo, aamwi na obhukumi bhwa risiina ryaryo. Abhaanu abho bhaariga bhagwatiriiye jindono mu‑mabhoko geebhwe ganu bhaariga bhayaaywe na Nyamuwanga korereki bhamuramye. 3 Abhaanu abho bhaariga nibheemba orwimbo rwa Muusa, omukosi wa Nyamuwanga. Orwimbo orwoorwo nirwo rwa Omwana wa Inaama. Bheembaga ati,“Raatabhugenyi awe Nyamuwanga owa obhuturo bhwone,
ebhikorwa bhyawo ni bhikuru na ebhya okuruguusya.
Awe, niwe Omukama wa amaanga goone,
na jinjira jaawo ni ja obhurengeresi na ja echimari.
4 Raatabhugenyi, niga unu atarikuramya?
Raatabhugenyi, niga unu atarikuuya risiina ryawo?
Okubha awe omwene era, niwe Omweru.
Abhaanu bha amaanga goone bhariija na okukuramya,
kwa okubha ebhikorwa bhyawo bhya obhurengeresi ebhibhonekana abhwerubhweru.”
Bhamaraayika bhataanu na bhabhiri bha jitambara
5 Ejo jejire jaawa, nindora Riyekaru riguuywe mu‑rwire. Riyekaru eryo, niryo riyeema munu Nyamuwanga aabhuganaga na abhaana bhaaye. 6 Bhamaraayika bhataanu na bhabhiri bharya bha jitambara etaanu na ebhiri nibhasooka omwo. Bhamaraayika abho, bhaariga bhafwaye emyenda jibhafuta jiinyeru, nijibharangisya na ku‑bhifubha bhyebhwe, bhaariga bhafwaye emichipi jingari ja inaaryo. 7 Owumwi wa ebhibhumbwa ebhina bhya obhuwanga bhirya, ˆnaayaana bhuri owumwi wa bhamaraayika bhataanu na bhabhiri abho, ribhakuri rya inaaryo rinu riijuuye risungu rya Nyamuwanga, omuwanga akajaanende koone. 8 Mw‑Iyekaru omwo, niyijura‑mo ingesi inu ꞉yaasookere mw‑ikusyo rya Nyamuwanga na obhuturo bhwaye. ꞉Ataabheeye‑wo omuunu unu ꞉aaturire okwingira mw‑Iyekaru rya Nyamuwanga rindi, okukingira anu jitambara etaanu na ebhiri jirya ja bhamaraayika bharya, jaakakuumiiye.